Dawro Full Bible Ethiopic
ኢስያሳ 59
ትምቢትያ ኦድያዌ አሳ ናጋራ ፕርዴዳ
በእተ፥ መና ጎዳ ኩሺ ህንተና አሻናዉ ቃምቤና፤ አ ሀይይካ ስሰናን እጻናዉ ቱልቤና። ሽን ህንተ ናጋራይ ህንተፐነ ህንተ ጾሳፐ ግዱዋን ሻኮተ መዳ። ቃይ እ ስሰና ማላ፥ ህንተ ናጋራይ አ ዴሙዋ ህንተፐ ገንዳ። አያዉ ጎፐ፥ ህንተ ኩሺ ሱን፥ ህንተ ብራካ ናቁዋን ቱኔዳ፤ ህንተ ዶናይ ዎርዱዋ ሃሳየ፤ ህንተ እንጻርሳይካ ኢታባ ዙዙሜ።
ጽሎተን ሞትያዌ ባዋ፤ ቱማተን ፕርድያዌካ ባዋ። ኡንቱንቱ መላ ፓሉምያን ጬቀቲኖ፤ ዎርዱዋ ሃሳዪኖ። ቃይ መቱዋ ሻሃሪደ፥ ኢታተ የሊኖ። ኡንቱንቱ ሾሻ ቁቁልያ ቆጺኖ፤ ሻራሮትያ ጎልያካ ኬጺኖ። ኡንቱንቱ ቁቁለቱዋ ምያ አሳይ ሀይቄ፤ ቁቁልያፐ እቱ መኦፐ፥ ሾሻይ አ ግዶፐ ከሴ። ኡንቱንቱ ኬጼዳ ሻራሮታት ጎሊ ማያናዉ ኡንቱንታ ጎኤና። ኡንቱንቱ ባረንቱ መዳዋን ባረና ካምክኖ። ኡንቱንቱ ኦሱ ኢታ ኦሶ፤ ማካላ ኦሱ ኡንቱንቱ ኩሽያን ደኤ። ኡንቱንቱ ገደቱ ኢታባ ኦናዉ ዎጺኖ፤ ጽሉዋ ሱ ጉሳናዉካ ጃሚኖ። ኡንቱንቱ ቆፋይ ኢታ ቆፋ። ኡንቱንቱ ቤዳ ሳ ኡባን ቆሁነ ባሻይ ደኤ።1 ኡንቱንቱ ሳሮተ ኦግያ ኤርክኖ፤ ኡንቱንቱ ብያ ኦግያን ሱረ ፕርድ ባዋ፤ ኡንቱንቱ ባረንቱ ኦግያ ጌላዬድኖ፤ ሄ ኦገቱዋና ሀመትያ ኦንነ ሳሮተ ኤረና።
አሳይ ባረ ናጋራ ፓጼ
ሄዋ ድራዉ፥ ሱረ ፕርዳይ ኑፐ ሃኬዳ፤ ጽሎተይካ ኑኮ ጋከና። ኑን ፖኡዋ ኮዬቶ፤ ሽን በእተ፥ ማ ግዴዳ፤ ዎልቃማ ፖኡዋ ኮዬቶ፤ ሽን ማን ሀመቴቶ። ኑን አይፊ ባይና ቆቅያዳን፥ ድርሳ ግምቢያኮ ታታፌቶ። ሳአይ ለምእለምእና ሀመትያዋዳን፥ ሴታ ጋላስ በቴቶ። ቃይ ኩመን ዎልቃና ደእያ አሳቱዋ ግዶን ኑን ሀይቄዳ አሳቱዋ ማላ ግዴዶ። ኑን ኡባይካ ጋሙዋዳን ጉዴቶ፤ ሀራጰቱዋዳንካ ካዮቲደ ኦሌቶ። ኑን ሱረ ፕርዳ ኮዬዶ፤ ሽን ደምበይኮ። ቃይ አቶተካ ኮዬዶ፤ ሽን እ ኑፐ ሃኬዳ።
አያዉ ጎፐ፥ ኑ ባይዙ ነ ስንን ዳሬዳ፤ ኑ ናጋራይካ ኑ ቦላ ማርካቴ። ኑ ባይዙ ኑናና ደኤ፤ ኑ ናቁዋካ ኑን ኤሬቶ። ኑን ማካሊደ፥ ጾሳ ካዴዶ፤ ኑ መና ጎዳ ካልያዋ አጊደ፥ ጉየ ስሜዶ፤ ሱገነ ገንያ ሃሳዬዶ። ቃይ ኑን ሻሃሬዳ ዎርዶ ቃላ ኑ ዎዛናፐ የሌዶ። ሱረ ፕርዳይ ጉየ ሱገቴዳ፤ ጽሎተይካ ኑፐ ሃኬዳ፤ አያዉ ጎፐ፥ ቱማተይ ጉታራን በቴ፤ አማነትያ ሀኖታዉ ገልያ ሳአይ ዬዳ። ቱማተይ ሀቃንነ ቤተና፤ ኢታተፐ ሃክያ አሳይ ባረዉ ኦሞደቴ።
ጾሳይ ባረ አሳ አሻናዉ ጊግ ኡቴዳ
መና ጎዳይ በኢደ፥ ሱረ ፕርዳይ ባይናዎ ካዮቴዳ። ኡቁነቴዳዋንታ ማድያ አሳይ ባይናዋ ጾሳይ በኤዳ፤ ጋናትያ አሳይ ባይናዎ ጋራመቴ። ሄዋ ድራዉ፥ አ ቀሲ አዉ አቶተ አሄዳ። አ ጽልቶተይ አ ዘምፕሲደ ኦይቄዳ።2 ጾሳይ ጽሎተ ትራን ዎያ ኦላ ሚሻዳን ማዬዳ፤ ባረ ሁጲያንካ አቶተ ቆብያ ዎዳ። ሀሉዋ ከስያ ማዩዋካ ማዪደ፥ ምሹዋ ቁማዩዋ ቁማዬዳ።3 እ ኡንቱንቶ ኡንቱንቱ ኦሱዋዳን ኦሱዋዳን ዛራና፤ ባረ ሞርከቶ ሀንቁዋ፥ ባረ ባልጋራቶካ ሙሩዋ ዛራና። አባ ዶና ቢታቱዋን ደእያዋንቶ ኡንቱንቱ ኦሶ በስያዋ እማና። ሄዋ ድራዉ፥ አዋይ ዉልያ ባጋና ደእያዋንቱ መና ጎዳ ሱንዉ ያያና፤ አዋይ ዶልያ ባጋና ደእያዋንቱካ አ ቦንቹዋ ያያና። አያዉ ጎፐ፥ መና ጎዳ ጫርኩ ጋጋን የድና፥ ጎግያ ድኡዋዳን እ ያና።
መና ጎዳይ ሀዋዳን ያጌ፤ “ታን ጽዮነዉነ ያቆባ ዛራቱዋን ባረንቱ ናጋራፐ ስምያዋንቶ ዎዝያዋ ግዳደ ያና” ያጌ።4
ቃይካ መና ጎዳይ ሀዋዳን ያጌ፤ “ታና ግዶፐ፥ ታን ኡንቱንቱና ጫቀትያ ጫቁ ሀዋ: ህንተ ቦላን ደእያ ታ አያናይነ ታን ህንተ ዶናን ዎዳ ታ ቃላይ ሀችፐ ዶሚደ፥ መና ጋካናዉ፥ ህንተ ዶናፐ፥ ህንተ ናናቱ ዶናፐነ ህንተ ናናቱ ናናቱ ዶናፐ ሻከተና። ታን መና ጎዳይ ሀዋ ኦዳይ” ያጌ።
Source notes (4)
- Cross-reference ሮመ 3:15-17
- Cross-reference ኢሳ. 63:5
- Cross-reference ኤፈ. 6:14፣ 17፤ 1 ተስ. 5:8
- Cross-reference ሮመ 11:26
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.