ኢስያሳ 55

ጾሳፐ ቤትያ ማሮታ

1ጾሳይ ሀዋዳን ያጌ፤1 “ህንተኖ ሳመቴዳዋንቶ፥ ኡባይካ ሃኮ ሃ ዪተ፤ ሻሉ ባይናዋንቶ፥ ሃይተ። ሻምተ፤ ሚተ። ሃ ዪደ፥ ሚሻ ጭገናን ጮ ዎይንያ ኤሳካ ማካ ሻምተ። 2ህንተ ሚሻ ቁማ ግደናባዉ አያዉ ከሲቴ? ካልሰናዋን ህንተ ዎልቃ አያዉ ዉርሲቴ? አነ ሎይደ፥ ታን ኦድያዋ ስስተ፤ ሎኦባ ሚተ፤ ቃይ ሞዋን ህንተ አሳተ ናሸችተ።

3“ታ አሳዉ፥ ስስተ፤ ታኮ ሃ ዪተ።2 ሸምፑዋና ፓጻ ደአና ጎፐ፥ ታን ኦድያዋ ስስተ። ታን ህንተናና መና ጫቁዋ ጫቀታና። ታን አንጃና ጋደ ዳዊታ አንጄዳዋዳን፥ ህንተናካ አንጃና። 4በእተ፥ ታን አ አሳዉ ማርካ፥ ካለያዋነ ካፑዋ ኡዳድ። 5በአ፥ ኔን ኤረና ካዉተቱዋ ጼሳና፤ ቃይ መና ጎዳ ነ ጾሳ እስራኤልያ ጌሻ ጋሱዋን፥ ኔና ኤረና ካዉተቱ ኔኮ ኤሌሊደ ያና። አያዉ ጎፐ፥ ጾሳይ ኔና ቦንቼዳ” ያጌ።

6መና ጎዳይ ቤትያ ዎደ አ ኮይተ፤ ማታን ደእያ ዎደ አ ጼስተ። 7ኢታይ ባረ ኦሱዋ፥ ናጋራንቻይካ ባረ ቆፋ አጎ፤ ጾሳኮ እ ስሞ። እ አ ማራና። እ ኑ መና ጎዳኮ ስሞ። እ አዉ ጮ አቶ ጋና።

8አያዉ ጎፐ፥ መና ጎዳይ፥ “ታ ቆፋይ ህንተ ቆፋ ማላ ግደና፤ ህንተ ኦጊካ ታ ኦግያ ማላ ግደና። 9ሳሎቱ ሳኣፐ ቂያዋዳን፥ ታ ኦጊ ህንተ ኦግያፐ ቄ፤ ታ ቆፋይካ ህንተ ቆፋፐ ቄ። 10እራይነ ሱፓ ሻቻይ ሳሉዋፐ ዎደ፥ ቢታ አሊደ፥ ሞካናዳንነ አይፋናዳን ኦያዋዳን፥ ቃይ ዘርያዎ ዘረ፥ ምያዋዉካ ካ እመናን ጉየ ሳሉዋ ስመናዋዳን፥3 11ታ ዶናፐ ከስያ ቃላይካ ሄዋ ማላ። እ ታን ሀልቼዳዋ ፖላና፤ ቃይ ኪቴዳዋ ኦናፐ አትና፥ ታኮ ጮ ስመና።

12“ህንተ ናሸቻን ከሳና፤ ሳሩዋን ሞይዘታና። ደረቱነ ከራቱ ህንተ ስንን ናሸቲደ የጻና፤ ደምባን ደእያ ምቱ ኡባይካ ባረንቱ ኩሽያ ባቃና። 13አጉን ድራዉ ጺዳይ፥ ጎምኦርያ ድራካ ጻይይ ሞካና። ሄዌ መና ጎዳይ ሀሳየትያዋነ መናዉ የና ማላታ ግዳናዋ” ያጌ።