Dawro Full Bible Ethiopic
ኢስያሳ 51
የሩሳላመ ምንያ ቃላ
ጾሳይ ሀዋዳን ያጌ፤ “ህንተኖ ጽሎተ ካልያዋንቶ፥ ህንተኖ ታና፥ መና ጎዳ ኮይያዋንቶ፥ ስስተ። ህንተ ጳልቀቲደ አከቴዳ ሹቻነ ህንተ ቦከቴዳ ከሴዳ ኦላ ጼልተ። ህንተ አዉዋ አብራሃማኮነ ህንተና የሌዳ ሳርኮ ጼልተ። እ ባረካ ደእሽን፥ ታን አ ጼሳድ፤ አንጃድነ ፓይዱዋን ጮራያድ።
“መና ጎዳይ ጽዮነንነ አ ኮለቴዳ ሳአቱዋን ደእያ ኡባ አሳ ምንና። እ ባዙዋ ኤደነ ገነትያዳን፥ እ መላ ሳአቱዋካ መና ጎዳ አታክልትያ ሳኣዳን ኦና። ናሸቻይነ ሀሹ ጉሳይ ያን ደአና፤ ጋላታነ ማዝሙርያ ኮሻይ ያን ስሰታና።
“ታ አሳዉ፤ ታን ኦድያዋ ስስተ። ታ ካዉተዉ፥ ነ ሀይ ታኮ የጋደ ስሳ። አያዉ ጎፐ፥ ህጊ ታፐ ከሴ፤ ታ ሱረ ፕርዳይካ ካዉተቶ ፖኦ ግዳናዋ። ታ ጽሎተይ ኤሌሊደ ሺቃና፤ ታ አሹካ ከሲደ፥ ኦግያን ደኤ። ታ ቀሲ አሳ ሞዳና፤ አባ ዶና ቢታቱዋን ደእያ አሳይ ኡባይ ታናን አማነቲደ ናጋና፤ ቃይ ታን ኡንቱንታ ታ ዎልቃን አሻናዋ፥ ናሸቻ ኦደ ናጋና። ፑደ ቁ ጊደ፥ ሳሎቱዋ ጼልተ፤ ዱገ ሳኣካ ጼልተ። አያዉ ጎፐ፥ ሳሎቱ ጩዋዳን ፕስክ ጊደ ያና፤ ሳአይካ አፍላዳን ዉራና፤ አን ደእያ አሳይ ኡባይ ኡዱንጸቱዋዳን ሀይቃና። ሽን ታ አሹ መናዉ ደአና፤ ታ ጽሎተይካ ዉረና።
“ህንተኖ ጽሎተ ኤርያዋንቶ፥ ታ ህጊካ ህንተ ዎዛናን ደእያዋንቶ፥ ስስተ። አሳ ቦርናሾ ያዮፕተ፤ ኡንቱንቱ ቦርያዉካ ዳጋሞፕተ። አያዉ ጎፐ፥ ማዩዋ ምያዋዳን፥ ብልአይ ኡንቱንታ ማና፤ ዶርሳ እክስያ ምያዋዳን፥ ጉጹኒ ኡንቱንታ ማና። ሽን ታ ጽሎተይ መናዉ ደአና፤ ታ አሹካ የለታ ኡባዉ ጋካና” ያጌ።
አቤት ጾሳዉ፥ ቤጎታ! ቤጎታ! መና ጎዳ ቀስያዉ፥ ዎልቃ ማያ፤ ካሰ አዳ ዎደቱዋንነ የለታቱዋን ቤጎቴዳዋዳን ቤጎታ። ራኣባ ግያ ዳዊያ ቃንጸሬዳዌ፥ ሚምንትያካ ጫዴዳዌ ኔና ግድኪየ? አባነ ዎልቃማ ጪሙዋ ሃ መልሴዳዌ ኔና ግድኪየ? ኔን ዎዜዳዋንቱ ፕናና ማላ፥ ጪማ አባ ኦገ ኦዳዌ ኔና ግድኪየ? መና ጎዳይ ዎዜዳዋንቱ ስሚደ፥ የጺድ ጽዮነ ያና፤ ዪደ መና ናሸቻይ ኡንቱንቱ ቦላን ደአና፤ ኡንቱንቱ ናሸቻነ ሀሹ ግያዋ ደማና። ቃይ ካዩነ ዬኩ ኡንቱንቱፐ ሃካና።
ጾሳይ ሀዋዳን ያጌ፤ “ህንተና ምንያዌ ታና። ያትና፥ ሀይቂያ አሳዉ ያያናዉ፥ ማታዳን ኤለካ መልያ አሳ ናአዉ ያያናዉ ህንተ ኦኔ? ህንተ ሳሎቱዋ ምጬዳነ ሳኣ ባሱዋካ ባሴዳ መና ጎዳ፥ ህንተናካ መዳዋ ዶጌድቴ? ኡንቱንቱ ህንተና ይሳናዉ ጊግሴዳ፥ ህንተና ኡቁንያ አሳቱዋ ሀንቁዋ ጋሱዋን ጋላሳ ኩመን ያዬድታ። ሽን ህንተና ኡቁንያዋ ሀንቁ ሀቃን ደኢ? ኦሞደቴዳዌ ኤለካ ብለታና፤ ሀይቀና፤ ኦላንካ ገለና፤ አዉ ኡክይካ ፓጨና። አያዉ ጎፐ፥ ታን መና ጎዳ ነ ጾሳቴ። ቤታይ ዋሳናዳን፥ አባ ቃይ። ታ ሱንይ ኡባፐ ዎልቃማ መና ጎዳ። ሳሎቱዋ ምጫናዳን፥ ቢታ ባሱዋካ ባሳናዳን፥ ቃይ ጽዮነ፥ ‘ኔን ታ አሳ’ ጋናዳን፥ ታን ታ ቃላ ነ ዶናን ዎድ፤ ታ ኩሽያ ኩዋን ታን ኔና ገንድ” ያጌ።
መና ጎዳ ሀንቁዋ ጹኣ
ኔኖ፥ መና ጎዳ ኩሽያፐ አ ሀንቁዋ ጹኣ ኡሼዳ የሩሳላመ፥ ቤጎታ!1 ደንዳ! ኔን ጋንድጋርስያ ጹኣ ጭንግርሳደ ኡሻዳ። አ የሌዳ ናናቱ ኡባፐ እዞ ካለያባይ እቱነ ባዋ፤ ቃይ አ ድቼዳ ናናቱ ኡባፐካ እ ኩሽያ ኦይቂያዌ እቱነ ባዋ። ዳኮ ዳሮ ባሻይ ነ ቦላን ጋኬዳ፤ ያትና፥ ኔና ኦኔ ምንናዉ ዳንዳይያዌ? ሄዋንቱካ ኮለ፥ ኮሻነ ማሻ። ያትና፥ ታን ኔና ዋታደ ምንኔ? ነ ናናይ ላባኔድኖ፤ ኡንቱንቱ ግትያ ግዶን ገሌዳ ገንእያዳን፥ ኦገ ኡባ ጋጻን ኩንዴድኖ። ኡንቱንቱ መና ጎዳ ሀንቁዋንነ ነ ጾሳ ሴራን ኩሜድኖ።
ሄዋ ድራዉ፥ ነኖ፥ ዎይንያ ኤሳ ኡሸናን ማቴዳ መቶታንቻቴ፥ ሀዋ ስሳ። ነ ጾሳይ፥ ባረ አሳዉ ሞተትያ ኡባ ሞድያ መና ጎዳይ ሀዋዳን ያጌ፤ “በአ፤ ኔና ጋንድጋርስያ፥ ታ ሀንቁዋ ጹኣ ታን ነ ኩሽያፐ አካድ፤ ኔን ላኤንዋ አ ሙለካ ኡሻካ። ታን ሄዋ ኔና ቱጋይያዋንቱ ኩሽያን ዎና። ኡንቱንቱ ኔና፥ ‘ኑን ነ ቦላና ሀመቲደ አና ማላ፥ ዛቁላ’ ያጌድኖ። ኔን አና ጋካናዉ፥ ነ ዞክያ ኡንቱንቶ ቢታዳንነ ኦግያዳን ኦዳ” ያጌ።
Source notes (1)
- Cross-reference ሳፃ 14:10፤ 16:19
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.