ኢስያሳ 23

ጺሮሳባይ ትምቢትያን ኦደቴዳዋ

1ጺሮሳ ካታማዉ ኦደቴዳ ጾሳ ቃላይ ሀዋ።1

ህንተኖ ታርሴሳ ማርካብያ ላግያዋንቶ ዬክተ! አያዉ ጎፐ፥ ጺሮሳ ካታማይ ጎሊ ዎይ ሸምፕያሳይ ባይና መላ ከሴዳ፤ ሄ ኦዱ ኡንቱንቶ ቆጲሮሳ ጋድያፐ ዬዳ። 2ህንተኖ፥ አባ ማታን ደእያ አሳቶ፥ ህንተኖ ሲዶና ካታማ ዛልአንቻቶ፥ ጮኡ ጊተ! ህንተ ኪትያ አሳቱ አባ ፕኔድኖ። 3ህንተዉ ይያ ካይ ናይለ ሻፋፐ ጫከቴዳ ሽሆራ ጋድያ ካ። ህንተ ካዉተቱ ዛልእያ ዛልእያ ሳ ግዳና።

4ኔኖ ሲዶና ካታማዉ፥ አባ ጌሶ፥ አባይ፥ “ታን ናኣ የላበይከ፤ ታን አቱማ ናኣካ ማጫ ናኣካ ድቻበይከ” ያጊደ ሃሳዬዳ ድራዉ ዬላታ። 5ኦዱ ግብጼ ጋድያ ጋክያ ዎደ፥ ኡንቱንቱ ጺሮሳባ ስሲደ ሴለታና።

6ህንተኖ አባ ማታን ደእያ አሳቶ፥ ዝላልተ፤ ሄፍን ታርሴሳ ቢታ ፕንተ። 7በን ዎደ ኬጸቴዳ፥ ካረ ጋድያ ኦይቂደ ሞዳናዉ አ ገዲ አ ሃስ አፌዳነ፥ ህንተ አን ናሸትያ ጺሮሳ ካታማይ ሀዋዳን ሀኔዴ? 8ካላቻ ዎስያ ካታማ አ ዛልአንቻቱ ጋድያ ሞድያዋንታ ግዴዳነ አ ግዶን ዛልእያዋንቱነ ላምያዋንቱ ጋድያ ቦላን ቦንቼቴዳዋንታ ግዴዳ ጺሮሳ ካታማ ቦላ ሀዋ ሀልቼዳዌ ኦኔ? 9ኦቶረትያዋንቱ ቦንቹዋ ኡባ ጉናዉ፥ ቃይ ጋድያ ቦላን ቦንቼቴዳዋንታ ኡባ ካዉሻናዉ፥ ኡባፐ ዎልቃማ መና ጎዳይ ሀዋ ሀልቼዳ።

10ህንተኖ፥ ታርሴሳ ጋድያ አሳቶ፥ ህንተና ተእያባይ ባይና ድራዉ፥ ናይለ ሻፋዳን፥ ህንተ ጋድያ ቦላን ኩሚደ ጎግተ። 11መና ጎዳይ አባ ቦላን ባረ ኩሽያ ምጬዳ፤ እ ካዉተካ ቃዳ፤ ካናነ ጋድያ ጌሶቱዋ ላላና ማላ፥ ጾሳይ አዛዙዋ እሜዳ። 12ቃይ እ ሀዋዳን ያጌዳ፤ “ህንተኖ፥ ኡንኤቴዶ ሲዶና አሳቶ፥ ህንተ ናሸቻ ፖጩ ግያ ዎዲ ዉሬዳ። ደንድተ፤ ሄፍን ቆጲሮሳ ፕንተ። ሀራይ አቶ ያንካ ህንተንቶ ሸምፑ ቤተና” ያጌዳ።

13ባብሎነ ጋድያ በእተ፤ ሄ ጋድያ አሳይ ሀእ ፓናባ ግዴዳ። አሶረ ጋድያ አሳቱ ሄ ጋድያን ዶአይ ሲራናዳን ኦድኖ። ኡንቱንቱ ሄዋን ደእያ ዎጋ ጎለቱዋ ኮሊደ፥ ባረንቱ ጌሶቱዋ ግምቤድኖ፤ ቢታካ መላ ኦድኖ።

14ህንተኖ፥ ታርሴሳ ጋድያ ማርካብያ አሳቶ፥ ህንተ ጌሱ ላለቴዳ ድራዉ፥ ዝላልተ።

15ጺሮሳ ካታማይ ላፑን ታሙ ላይ ዶገቲደ ደአና ዎዲ ያና፤ ሄዌነ፥ እት ካትያ ላይ ኬሻ ግያዋ። ላፑን ታሙ ላይይ ዉርያ ዎደ፥ ሻርሙጻ ምሽራትዉ የጸትያ የ ማላይ፥ ጺሮሳ ካታማዉ የጸታና። ኡንቱንቱ፥ 16“ሀነ፥ ዶገቴዳ ሻርሙጻተ፥ ነ ዲ አካ፤ ካታማን ዩያ። ኔና አሳይ ሀሳያና ማላ፥ ማልኦ ቃላን ዳሮ የ የጻ” ያጋና።

17ላፑን ታሙ ላይይ ፖለትያ ዎደ፥ መና ጎዳይ ጺሮሳ ጾሞሳና። ሽን ሄዋፐ ጉይያን፥ አ በን ባረ ሻርሙጻ ኦሶ ስማና፤ ሳኣን ደእያ ካዉተቱዋ ኡባና ሻርሙጻና። 18ግዶፐነ፥ እዚ ዛልኢነ እ ድርጉ መና ጎዳዉ ዱማቴዳዋ ግዳና፤ እዚ ዛልኢ ዳሮ ቁማነ ሎኦ ማዩዋ ሻማናዉ፥ መና ጎዳዉ ኦያ አሳቶ እመታናፐ አትና፥ ሚሻ ጎልያንነ ምንጃ ጎልያን ኡተና።