Dawro Full Bible Ethiopic
ኢስያሳ 19
ጾሳይ ግብጻ ሙራና
ግብጼ ቢታ ጾሳይ ሀዋዳን ያጌ፤1 “በእተ፥ መና ጎዳይ ድርቢያ ሻርያ ቶጊደ፥ ግብጼ ዬ። ግብጼ ኤቃቱ አ ስንን ኮኮራና፤ ግብጼ አሳ ዎዛናይካ ኡንቱንቱ ግዶን ሲላና” ያጌ።
ኡባፐ ዎልቃማ ጾሳይ ሀዋዳን ያጌ፤ “ታን ግብጼ ጋድያ አሳ ግብጼ አሳ ቦላ ደንና፤ ኡንቱንቱ ባረንቱ ግዶን እሻይ እሻና፥ ሾሩ ሾሩዋና፥ ካታማይ ካታማና፥ ካዉተይ ካዉተና ኦለታና። ግብጼ አሳ አያናይ ጋገታና፤ ታን ኡንቱንቱ ሀልቹዋ ሀዳ ኦና። ኡንቱንቱ ኤቃቱዋነ ሞይትልያ ሃሳይስያ አሳቱዋ፥ ካይያዋንታነ ሻሬቾቱዋ ዞረታ ኦቻና። ቃይ ታን ግብጼ ጋድያ አሳ እት መቀ ባይና ጎዳ ኩሽያን አደ እማና፤ እት መቀ ባይና ካቲ ኡንቱንታ ሞዳና” ያጌ ኡባፐ ዎልቃማ መና ጎዳይ።
ናይለ ሻፋ ሃይ መላና፤ ሻፋይካ ሌላን ሌላን መል አጋና። ዜሮ ሃቱ ጽንቃና፤ ግብጼ ፑልቶቱ ጉጻናነ ቶአና። ሾምቦቆቱነ ጫረቱ ሹላና፤ ናይለ ሻፋ ማታን ደእያ ሳአቱ፥ አባ ማታቱ ኡባይ ኮለት መላ ግዳና። ናይለ ሻፋ ማታን ዘሬዳባይ ኡባይ መላና፥ ላለታናነ ያና። ሞልያ ኦይቂያዋንቱ ካዮታና። ናይለ ሻፋን ግትያ የግያ ኡባቱ ዬካና፤ ሃን ግትያ የግያዋንቱካ ዶጫና። ፓተቴዳ ታልባፐ ሊኑዋ ኦያዋንቱ፥ ቃይ ቦ ፑቱዋ ማዩዋ ዳድያ ሸማይነቱካ ዬላታና። ሽማይነቱነ ከራ ኦያ ኡባቱካ ካዮታና።
ጾኣነ ካታማ ሞድያዋንቱ ሙለካ ኤያ፤ አዳ ኤራንቻ ግያ ግብጼ ካትያ ዞርያዋንቱ ዞሪካ ዳማ። ያትና፥ ህንተ ግብጼ ካትያዉ፥ “ኑን አዳ ኤራንቻቱዋ ናናቱዋ፤ ኑን በን ካተቱ ናናቱዋ” ጋናዉ ዋኒደ ዳንዳዪቴ? ነ አዳ ኤራንቻ አሳቱ ያትና ሀእ ሀቃን ደኢኖ? ኡባፐ ዎልቃማ መና ጎዳይ ግብጼ ቦላ ኦናዉ ሀልቼዳዋ አነ ኡንቱንቱ ነዉ ኦድኖነ ኔና ኤርስኖ። ጾኣነ ካታማ ሞድያዋንቱካ ኤዬድኖ፤ መምፒሳ ካታማ ሞድያዋንቱካ ጭመቴድኖ። ግብጼ አሳ ዛርያ ግዶፐ አሳ ካለያዋንታ ጊደ ዎዳዋንቱ ግብጼ ባለድኖ። መና ጎዳይ ኡንቱንቱ ግዶን ጌላ አያና ዋላኬዳ፤ ያትና፥ ኡንቱንቱ ማቲደ አሳይ ባረ ጮሻን ጋንድጋርያዋዳን፥ ግብጼ ባረ ኦሶ ኡባን ጋንድጋራናዳን ኦድኖ። ግብጼዉ አ ሁጲ ዎይ አ ጎይናይ፥ አ ዛምባ ታሺ፥ ዎይ አ ሾምቦቁ ኦናባይ አያይነ ባዋ።
ግብጼቱ ጾሳዉ ጎይንያ ጋላሳይ ያና
ሄ ጋላስ ግብጼ ጋድያ አሳይ ማጫ አሳ ማላ ግዳናዋ። ቃይ ኡባፐ ዎልቃማ መና ጎዳይ ኡንቱንቱ ቦላን ዉጻክያ አ ኩሽያ በኢደ፥ ኡንቱንቱ ያሻን ኮኮራና። ይሁዳ ጋዲ ግብጼ ጋድያ አሳ ያሽያዋ ግዳናዋ፤ ኡባፐ ዎልቃማ መና ጎዳይ ኡንቱንቱ ቦላን ኦናዉ ቆፔዳ ቆፋ ድራዉ፥ ይሁዳባ ስስያ ኡባይ ያያና።
ሄ ጋላስ ግብጼ ጋድያን ደእያ እቼሹ ካታማቱ ካናነ ቃላን ሃሳይያዋንታነ ኡባፐ ዎልቃማ መና ጎዳዉ አማነታናዉ ጫቂያዋንታ ግዳና። ሄ ካታማቱዋፐ እቱ፥ “አዋ ካታማ” ጌተቲደ ጼሰታና።
ሄ ጋላስ ግብጼ ቢታዉ ግዱዋን፥ መና ጎዳዉ ያርሽያሳይ ጊጋና፤ ቃይ ግብጼ ጋድያ ዛዋንካ መና ጎዳዉ ቱሳይ ኤቃና። ሄዌ ኡባፐ ዎልቃማ መና ጎዳዉ ግብጼ ጋድያን ማላታነ ማርካ ግዳናዋ፤ ኡንቱንቱ ባረና ኡቁንያዋንቱፐ ደንዴዳዋን መና ጎዳኮ ዋስያ ዎደ፥ እ ኡንቱንቶ አሽያዋ ኪታና፤ ኡንቱንታ አሻና። ሄ ዎደ ጾሳይ ግብጼ ጋድያን ኤረቴዳዋ ግዳናዋ፤ ግብጼ አሳይካ ሄ ጋላስ ጾሳ ኤራናነ ያርሹዋነ ካ ያርሹዋ አክ ዪደ፥ አዉ ጎይናና። ኡንቱንቱ ጾሳዉ ሺቃናነ ባረንቱ ሺቆዋካ ጋና። መና ጎዳይ ግብጼ ሾጫና፤ ሾጫናነ ፓና። ኡንቱንቱካ መና ጎዳኮ ስማና፤ እካ ኡንቱንቱ ዋትዋቱዋ ስሲደ፥ ኡንቱንቱ ፓና።
ሄ ጋላስ ግብጼፐ አሶረ ጋካናዉ አኮ ኦገ ከሳና፤ አሶረ አሳይ ግብጼ፥ ግብጼ አሳይካ አሶረ ስመረታና፤ ቃይ ግብጼ አሳይ አሶረ አሳና እትፐ ጎይናና። ሄ ጋላስ እስራኤሊ ግብጼናነ አሶረና ሄዘን ቢታ ግዲደ፥ ሳኣ ግዶን አንጆ ግዳናዋ። ኡባፐ ዎልቃማ መና ጎዳይ ኡንቱንታ ሀዋዳን ያጊደ አንጃና፤ “ታ አሳዉ ግብጼ፥ ታ ኩሺ መዳ አሶረነ ታን ዶሬዳ እስራኤልያዉ አንጀቴዳዋንታ ግድተ” ያጋና።
Source notes (1)
- Cross-reference ኤር. 46:2-26፤ ህዝ. 29:1—32:32
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.