እብራዌ 9

ሳሉዋን ኦሰትያ አያና ኦሱ ሳኣን ኦሰትያ አያና ኦሱዋፐ አ

1ኮይሮ ጫቆ ጾሳዉ ጎይንያ ዎጋይነ አሳይ ኦዳ ጌሻ ጎሊ ደኤ። 2አያዉ ጎፐ፥ ኮይሮ ዱንካኒ ኤቄዳ፤ አ ግዱዋን ሙቃዳ ዎያዌ፥ ጻራጴዛይነ ጎዳ ስንን ዎያ ኡክይ ደኤ፤ ሄ ሳአይ ጌሻ ሳ ጊደ ጼሴቴ።1 3ላኤን ጋርዱዋ ጉየ ባጋና ኡባፐ አያ ጌሻ ሳኣ ጌተትያ ዱንካኒ ደኤ።2 4አ ግዱዋን እጻና ጩዋያናዉ ዎርቃፐ ኦዳ ሳጽኒነ ኡባ ሳና ዎርቃን ሼሼዳ ቃላ ጫቁዋ ታቦታይ ደኤ። ሄ ቃላ ጫቁዋ ታቦታን ማናይ ደእያ ዎርቃ ጻሩ፥ አሮና ጻምአይ አጬዳዌነ ቃይ ሙሴ ህጊ ጻፈቴዳ ላኡ ማሰቴዳ ሹቻቱ ደኢኖ።3 5ሄ ቃላ ጫቁዋ ታቦታፐ ቦላ ባጋና አቶ ግያ ሳኣ ቁምእያ ባረንቱ ቀፍያን ገንያ ቦንቾ ክሩበቱ ደኢኖ፤ ሽን ሀ ኡባባ ሀእ ዉርስ ኦዳናዉ ዳንዳዮኮ።4

6ሄዌ ሄዋዳን ጊግ ደእሽን፥ ቄሳቱ ኡባ ዎደ፥ ባረንቱ ኦሱዋ ኦናዉ ኮይሮ ዱንካንያ ገሊኖ።5 7ሽን ቄሳቱዋ ኡባቱዋ ካፑዋ ጻላላይ ላኤን ዱንካንያ ላይፐ እት ገደ ገሊደ ባረ ድራዉነ ኤረናን አሳይ ኦዳ ናጋራ ድራዉ፥ ጾሳዉ ያርሽያ ሱ አኪደ ገሌ።6 8ኮይሮ ዱንካኒ ኤቂደእሽን፥ ኡባፐ አያ ጌሻ ሳኣ አፍያ ኦጊ ብሮ ዶየትቤናዋ ጌሻ አያናይ ሄዋን ኤርሴ።

9ሄ ዱንካኒ ሀ ዎደዉ ሌምሱዋ፤ ሄዋ ግያዌ ጾሳዉ እምያ እሙነ ያርሹ ጎይንያዋ ሱረ ዎዛና ባላይ ባይናዋ ኦናዉ ዳንዳይክኖ። 10ሄዋንቱ ሙሳባ፥ ኡሻባነ ዱማ ዱማ ሜቻባ ኦድያ ካረ ባጋ ዎጋቱዋ፤ ኡንቱንቱ ኦራጽያ ዎዲ ጋካናዉ ኦሰትያ ዎጋቱዋ።

11ሽን ክርስቶስ ሀዋን ደእያ ሎኦባዉ ቄሳቱዋ ኡባቱዋ ካፑዋ ግዲደ ይ ድጌዳ። እ ገሊደ ኦያ ዱንካኒ ኡባፐ አያዋነ ባላይ ባይናዋ፤ ቃይ ሄ ዱንካንያ አሳይ ኦቤና፤ ሀ መቴዳ ሳኣባካ ግደና። 12ክርስቶስ ኡባፐ አያ ጌሻ ሳኣ ገልያ ዎደ፥ ዴሻ ሱነ ጋሎ ማራ ሱ ኦይቂደ ገልቤና፤ ሽን ባረ ሱ ኦይቂደ፥ ኑዉ መና አቶተ እሚደ፥ ላኤናን እት ገደ ገሌዳ። 13ቱኔዳ አሳ ቦላ ኮሩማ ሱነ ዴሻ ሱ ጫጫፊደ፥ ጉደቴዳ ኡሳት ብድን ቆልና፥ ሄ ኡራ ቱናተፐ ጌሻናዉ ዳንዳዮፐ፥7 14መና ጌሻ አያና ባጋና ባላይ ባይና ያርሹዋዳን፥ ጾሳዉ ባረና እሜዳ ክርስቶሳ ሱይ፥ ኑን ደኡዋ ጾሳዉ ኦና ማላ፥ ካሰ ኑ ሀይቄዳ ኦሱዋፐ ኑ ሱረ ዎዛና ዎት ጌሻንዴሻ!

15ሄዋ ድራዉ፥ ጾሳይ ጼሴዳዋንቱ እ እማና ጌዳ መና አንጁዋ ላታና ማላ፥ ክርስቶስ ኦራ ጫቆ ጋናቴዳ፤ ሄዌ ሀናና ዳንዳይያዌ፥ አሳይ ኮይሮ ጫቁዋፐ ጋርሳን ደኢደ ኦዳ ባላ አይለተፐ ከስያ ሀይቁ ደእያ ድራሳ።

16አያዉ ጎፐ፥ ሀይቂያ ኡራይ ዎይቴዳዌ ደኦፐ፥ ሄ ኡራይ ሀይቆዌ ኤረታናዉ ኮሼ። 17አያዉ ጎፐ፥ ዎይቴዳ ኡራይ ሀይቄዳ ዎደ፥ እ ዎይቴዳዌ ፖለቴዳ፤ ሄ ዎይቴዳዌ ፓጻ ደእሽን፥ አይነ ፖለተና።

18ሀራይ አቶ፥ ኮይሮ ጫቁካ ሱይ ባይናን እንጀትቤናዌ ሀዋሳ። 19-20አያዉ ጎፐ፥ ህግያን ደእያ አዛዙዋ ኡባ ሙሴ አሳ ኡባዉ ኦዴዳ፤ ሄዋፐ ጉይያን፥ ጋሎ ማራ ሱነ ዴሻ ሱ፥ ሃና፥ ዞኦ ዶርሳ እስክያናነ ህሶጵያ ግያ ም ቦንጭያና እትፐ አኪደ፥ “ሀዌ ህንተንታ ጾሳይ አዛዜዳ ጫቁዋ ሱ” ያጊደ፥ ህግያ ማጻፋ ቦላነ አሳ ኡባ ቦላ ጫጫፌዳ።8 21ሄዋዳንካ፥ ዱንካንያ ቦላነ ኦያ ሚሻ ኡባ ቦላ ሱ ሙሴ ጫጫፌዳ።9 22ህጊ ግያዋዳን፥ ቱሙካ አማሬዳዋፐ አትን፥ ኡባባይካ ሱን ጌዬ፤ ሱይ ጉካና ዮፐ፥ አቶተይ ባዋ።

ክርስቶስ ያርሸቴዳዌ ናጋራ ቁጭ ይሴ

23ሄዋ ድራዉ፥ ሳሉዋን ደእያዋንታ ማላትያዋንቱ ሄ ያርሹዋን ጌያናዉ ኮሼ፤ ሽን ሳሉዋን ደእያዋንቱካ ባረንቱ ሁጰዉ ጌያናዉ አያ ያርሹዋ ኡንቱንታ ኮሼ።

24አያዉ ጎፐ፥ ክርስቶስ ቱሙ ጌሻ ሳን ሌምሰትያ አሳይ ኦዳ ጌሻ ሳ ገልቤና፤ ሽን እ ሀእ ኑ ግሻታዉ ጾሳ ስንን ቤታናዉ ያ ሳሉዋ ገሌዳ። 25ቄሳቱዋ ኡባቱዋ ካፑ ላይን ላይን ባረ ሱ ግደናዋ ኦይቂደ፥ ጌሻ ሳኣ ገልያዋዳን፥ ክርስቶስ ባረና ኡባደ ያርሻናዉ ገልቤና። 26ሄዋ ግድንቶ፥ ክርስቶስ ሳአይ መቶደፐ ዶሚደ ዳሮ ገደ ዋየታናዉ ኮሼ፤ ሽን ሀእ ዎድያ ዉርሰን ናጋራ ይሳናዉ ባረና ያርሺደ፥ ላኤናን እት ገደ ቤቴዳ።

27አሳይ ኡባይ እት ገደ ሀይቃናዉ በሴ፤ ሄዋፐ ጉይያን ጾሳይ አሳ ፕርዳና። 28ሄዋዳንካ፥ ቃይ ክርስቶስ ዳሮ አሳ ናጋራ ይሳናዉ እት ገደ ያርሸቴዳ፤ ቃይ እ ባረና ሎይ ናግያዋንታ አሻናዉ ቤታናፐ አትን፥ ላኤን ናጋራ ቶካናዉ ቤተና።10