እብራዌ 3

የሱስ ሙሴፐ ቦላ

1ሄዋ ድራዉ፥ ጾሳይ ጼሴዳ ጌሻ እሻቶ፥ ኑ ማርካተ ጾሳይ ኪቴዳዋ ቄሳቱዋ ኡባቱዋ ካፑዋ፥ የሱስ ክርስቶሳ ቆፕተ። 2ሙሴ ባረ ኪታን ጾሳ ጎልያ ኡባን አማነቴዳዋ ግዴዳዋዳን፥ የሱስካ ባረና ዶሪደ፥ ሀ ኦሶ የዴዳ ጾሳዉ አማነቴዳዋ።1 3አያዉ ጎፐ፥ ኬጸትያ ጎልያፐ ኬጽያ ብታኒ ቦንቼትያዋዳን፥ ሙሴዋፐ አያ ቦንቹዋ እ አካናዉ በስያዌ ኤረቴዳዋ። 4አያዉ ጎፐ፥ ጎልያ ኡባ ኬጼዳዌ እት አሳ፤ ሽን ኡባባ ኬጼዳዌ ጾሳ። 5ሙሴ ጾሳ ጎልያ ኡባን አማነቴዳ ኦሳንቻ ግዲደ፥ ጾሳይ ስንፐ ጋናዋ ማርካቴዳ። 6ሽን ክርስቶስ ጾሳ ጎለን ናኣዳን አማነቴዳዋ፤ ኑን አካና ጊደ ናሸቻን ናግያዋ ጻላተንነ አማኑዋን ናጎፐ፥ ጾሳዉ ጎልያ ግዴቶ።

ጾሳ አሳይ ሸምፑዋ ደማና

7ሄዋ ድራዉ፥ ጌሻ አያናይ ሀዋዳን ያጌ፤

“ጾሳ ቃላ ህንተንቱ ሀቼ ስስያባ ግዶፐ፥2

8-9ህንተንቱ አዎቱ ታዉ እጽ ማካሊደ፥

ኦይታሙ ላይ ታ ኦሱዋ በኤዳ ባዙዋ ፓጭያ ጋላሳዳን፥

ህንተንቱካ ዞርያ አከናን እጾፕተ።

10ሄዋ ድራዉ፥ ታን፥

ሄ አሳ ሀንቀታደ፥

‘ኡንቱንቱ ኡባ ዎደ ባረንቱ ዎዛናን ባሊኖ።

ታ ኦግያካ ኤርበይክኖ’ ያጋድ።

11ሄዋዳንካ ቃይ፥

ታን ሀንቀታ ጫቃደ፥

‘ታን ሸምፕያ ሳ ኡንቱንቱ፥

ኡባካ ገልክኖ’ ያጋድ”

ያጌ።

12ታናዳን አማንያዋንቶ፥ ደኡዋ ጾሳፐ ህንተንታ ሻክያ ኢታ አማነና ዎዛናይ ህንተናን ኦናንነ ደኤና ማላ ናገትተ። 13ሽን ጾሳይ ህንተንታ ኡባ ጋላስ ሀቼ ጊደ ጼስሽን፥ ህንተፐ ኦናነ ናጋራይ ባለና፥ ዞርያ አከናን እጸና ማላ፥ እቱ እቱዋ ዞርተ። 14አያዉ ጎፐ፥ ኑን ኮይሮ ኑዉ ደእያ አማኑዋ ዉርሰይ ጋካናዉ ሎይ ናጎፐ፥ ክርስቶሳና እትፐ ሻካና። 15ጾሳ ማጻፋይ፥

“ጾሳ ቃላ ህንተንቱ፥

ሀቼ ስስያዋ ግዶፐ፥

ሄ ዎደ ኡንቱንቱ እጽ ማካሌዳዋዳን፥

ዞርያ አከናን እጾፕተ”

ያጌዳ።3

16ጾሳይ ግያዋ ስሲደ፥ አዉ ማካሌዳ አሳቱ ኦኔ? ሙሴ ግብጼፐ ካለና ከሴዳ ኡባቱዋ ግድክኖዬ?4 17ጾሳይ ኦይታሙ ላይ ኦናን ሀንቀቴዴ? አሃይ ዎራን አቴዳ አሳቱዋ፥ ናጋራ ኦዳዋንታ ግድክኖዬ? 18ቃይ ጾሳይ ባረዉ አዛዘተናን እጼዳዋንቱ እ ሸምፕያ ሳኣ ኡባካ ገለና ማላ፥ ኡንቱንቶ ጫቄዳዋፐ አትን፥ ኦስ ጫቄዴ? 19ኡንቱንቱ አማንቤና ድራዉ፥ ሸምፕያ ሳ ገላናዉ ዳንዳይቤናዋ ኑን በኤቶ።