እብራዌ 13

ጾሳ ኑን ዎት ናሸቻናዉ በስንቶ

1ህንተንቱ እሻቱዋ ሲቅያዋ አጎፕተ። 2እማ ሞክያዋካ ዶጎፕተ። አያዉ ጎፐ፥ ያትያዋን እት እት አሳይ ኤረናን ኪታንቻቱዋ ሞኬዳ።1 3ቃሾ ጎለን ደእያዋንቱባ ህንተንቱካ ኡንቱንቱና እትፐ ቃሾ ጎለን ደእያዋዳን ቆፕተ፤ ቃይ ህንተንቱ ህንተንቱ ሁጰዉ ዋየትያዋዳን፥ ዋየትያዋንቱባ ቆፕተ።

4አክያዋነ ገልያዋ አሳይ ኡባይ ቦንቻናዉ በሴ፤ ቃይ አስናይነ ማቻታ እቱ እቶ አማነታናዉ በሴ፤ አያዉ ጎፐ፥ ጾሳይ ዎሹማናዉ ካጄልያዋንታነ ዎሹምያዋንታ ፕርዳና።

5ሚሻ ሲቁዋፐ ህንተንታ ናግተ፤ ህንተንቶ ደእያዌ ህንተንቶ ግዶ። አያዉ ጎፐ፥ ጾሳይ ባረ ሁጰዉ፥

“ታን ኔና ኡባካ የግከ

ዎይ አግከ”

ያጌዳ።2

6ሄዋ ድራዉ፥ ኑን ጻሊደ፥

“ጎዳይ ታና ማድያዋ፤

ታን ያይከ።

አሳይ ታና አይ ኦ?”

ያጌቶ።3

7ጾሳ ቃላ ህንተንቶ ኦዴዳ ህንተንታ ካለዳዋንታ ሀሳይተ፤ ኡንቱንቱ ዋን ደኤድኖንቶነ ሀሳይተ፤ ቃይ ኡንቱንቱዋዳን አማንተ።

8የሱስ ክርስቶስ ዝኖካ ሀቼካ መናዉካ ላመተና። 9ዱማ ዱማ ኦራ ትምርትያን ዎራ ቦፕተ። ኑ ዎዛናይ ጾሳ አ ኬካተን ምኖፐ ሎኦ ግድያዋፐ አትን፥ ቁማ ዎጋቶ አዛዘትያዋ ግደና፤ ሄዎ አዛዘቴዳዋንቱካ ማደትበይክኖ።

10ኑዉ ያርሽያሳይ ደኤ፤ ዱንካንያ ግዶን ኦያዋንቱ ሄ ያርሽያ ሳፐ ማናዉ ኡንቱንቶ ማታይ ባዋ። 11ቄሳቱዋ ኡባቱዋ ካፑ ናጋራ ድራዉ፥ መህያ ሱ ያርሻናዉ ኡባፐ አያ ጌሻ ሳኣ አፌ፤ ሽን ሄ መህያ አሹዋ ቃይ ድርሳፐ ካረና ጉዴ።4 12ሄዋ ድራዉ፥ የሱስካ ቃይ ናጋራፐ አሳ ባረ ሱን ጌሻናዉ፥ ካታማ ፐንግያፐ ካረና ዋየቴዳ። 13ስም ኑን እ ቦረቴዳ ቦርያ አኪደ፥ ድርሳፐ ካረ አኮ ከሶይተ። 14አያዉ ጎፐ፥ ኑዉ ሀዋን መናዉ ደእያ ካታማይ ባዋ፤ ሽን ኑን ያና ካታማ ናጌቶ።

15ስም ጾሳዉ የሱሳ ባጋና ኡባ ዎደ ጋላታ ያርሹዋ እሞይተ፤ ሄዋ ግያዌ መተርሻይ አ ሱንዉ እምያ ጋላታ ግያዋ። 16ሎኦባ ኦያዋነ እቱ እቱዋ ማድያዋ ዶጎፕተ። አያዉ ጎፐ፥ ጾሳ ናሸችያዌ ሄዋ ማላ ያርሹዋ።

17ህንተና ካለያዋንቶ አዛዘትተ፤ ቃይ ኡንቱንቱ አዛዝያዋካ ኦተ። ኡንቱንቱ ባረንቱ ኦዳዋ ጾሳዉ ኦዳና ድራዉ፥ ህንተንቱ ሸምፑዋ ሎይ ናጊኖ፤ ህንተንቱ ኡንቱንቶ አዛዘቶፐ፥ ባረንቱ ኦሱዋ ናሸቲደ ኦና፤ ሄዌ ዮፐ፥ ኡንቱንቱ ይሎቲደ ኦና፤ ሄዌ ህንተንታ አይነ ማደና።

18ኑዉ ጾሳ ዎስተ። ኑን ኡባ ዎደ ሎኦባ ኦናዉ ኮይያ ድራዉ፥ ኑና ዞርያ ሎኦ ዎዛናይ ኑዉ ደኤ። 19ጾሳይ ታና ህንተንቱኮ ኤለካ ዛራና ማላ፥ ጾሳ ህንተንቱ ሎይ ዎሳናዳን፥ ታን ህንተንታ ሎይ ዎሳይ።

ዎሳ

20ሳሮተ ጾሳይ፥ ኑ ጎዳ የሱሳ፥ ዶርሳቱዋ ሄንንቻ ዎልቃማ፥ መና ጫቁዋ ሱን ሀይቁዋፐ ደንዳ። 21ጾሳይ የሱስ ክርስቶሳ ባጋና ባረ ስንን ባረና ናሸችያዋ ህንተንታ ኦስሲደ፥ ህንተንቱካ እ ኮዬዳዋ ኦና ማላ፥ ሎኦ ኦሱዋ ኡባን ህንተንታ እ ጊግሶ፤ ጾሳይ መ መናዉ ቦንቼቶ። አመንእ።

ቁተ ቃላ

22ታናዳን አማንያዋንቶ፥ ታን ሀ ዳብዳቢያ ህንተንቶ ቃንን ጻፌዳ ድራዉ፥ ህንተንቱ ሀ ዞርያ ሳለተናን ስሳና ማላ፥ ታን ህንተንታ ዎሳይ።

23ኑ እሻይ፥ ጽሞቶስ ቃሹዋፐ ብለቴዳዋ ኤርተ። ኤሌል እ ሃ ዮፐ፥ ታን አናና ባደ ህንተንታ በአና።

24ህንተና ካለያ ኡባቱዋነ ጾሳ አሳቱዋ ኡባ ሳሮ ሳሮ ጊተ። ጻልያፐ ዬዳ አማንያዋንቱ ህንተንታ ሳሮ ሳሮ ጊኖ።

25አ ኬካተይ ህንተናና ኡባና እትፐ ግዶ። አመንእ።