እብራዌ 1

ጾሳይ ባረ ናኣ ባጋና ሃሳዬዳ

1ጾሳይ በን ዎደ፥ ኑ አዎቱ ናባቱዋ ባጋና ዱማ ዱማ ኦግያንነ ዳሮ ዎድያን ሃሳዬዳ። 2ሽን ሀ ዉርሰ ዎድያን፥ ኡባባ አ ላትሲደ፥ የለታ አ ባጋና መዳ ባረ ናኣ ባጋና ኑዉ ሃሳዬዳ። 3ናአይ ጾሳ ቦንቾ ፖኡዋ ጶሌ፤ ቃይ ኩመን ጾሳ ኤሻ አኪደ፥ ባረ ዎልቃማ ቃላን ሀ ሳኣ ናጌ፤ ያቲደ አሳ ናጋራፐ ጌሺደ፥ ኡባፐ ቦላ ጾሳፐ ኡሸቻ ባጋና1 ሳሉዋን ኡቴዳ።

ጾሳ ናአይ ኪታንቻቱዋፐ ቦላ

4ጾሳይ አዉ እሜዳ ሱንተይ ኪታንቻቱዋፐ ቃ ግድያዋዳንካ፥ ኡንቱንቱፐ አ ሎይ ቁ ኦዳ። 5አያዉ ጎፐ፥ ጾሳይ ባረ ኪታንቻቱዋፐ ኦና፥

“ኔን ታ ናኣ፤

ታን ሀቼ ነዉ አዉዋ ግዳድ”

ጌዴ? ዎይ ቃይ ኦና፥

“ታን አዉ አዉዋ ግዳና፤

እካ ታዉ ናኣ ግዳና”

ጌዴ?2 6ቃይ ጾሳይ ባረ ባይራ ናኣ ሀ ሳኣ የዳና ሀኒደ፥

“ታ ኪታንቻቱዋ ኡባቱካ አዉ ጎይንኖ”

ያጌዳ።3 7ጸሳይ ኪታንቻቱዋባ ሃሳዪደ፥

“ታን ታ ኪታንቻቱዋ ጫርኩዋ ከሳይ፤

ቃይ ታ ኦሳንቻቱዋካ ታማ ላጩዋ ከሳይ”

ያጌ።4 8ሽን ባረ ናኣዋ ሃሳዪደ፥

“ጾሳዉ፥ ነ ካዉተ ኦይዲ፥

መ መናዉ ደኤ።

ነ ካዉተ ጽሎተን አሃሳ።5

9ኔን ጽሎተ ሲቃደ፤

ናቁዋ እጻዳ።

ጾሳይ፥ ነ ጾሳይ ኔና፥

ነ ላገቱዋፐ አደ፥

ናሸቻን እልልስያ ዛይትያ ኦኬዳዌ ሀዋሳ”

ያጌ። 10ጾሳይ ሀዋዳን ያጌ፤

“ጎዳዉ፥ ኮይሮ ኔን ሳኣ መዳ፤

ሳሉዋካ ነ ኩሽያን መዳ።6

11ሄዋንቱ ኡባይ ያና፤

ሽን ኔን ደአና።

ኡንቱንቱ ኡባይካ አፍላዳን ዉራና።

12ኔን ኡንቱንታ ጋብያዳን ዳኮያና፤

ቃይ ኡንቱንቱ አፍላዳን ላመታናዋንታ።

ሽን ኔን ኔናካ፤

ነ ላይይ ኡባካ ዉረና”

ያጌ። 13ሽን ጾሳይ ባረ ኪታንቻቱዋፐ እቱዋነ፥

“ታን ነ ሞርከቱዋ ኔን

ገድያን የያዋ ኦና ጋካናዉ፥

ሀዋን ታፐ ኡሸቻ ባጋን ኡታ”

ግቤና።7 14ኪታንቻቱ ኡባይ ጾሳዉ ኦናዉነ አቶተ ደማና አሳቱዋ ማዳናዉ ጾሳይ ኪቴዳ አያናቱዋ ግድክኖዬ?