Dawro Full Bible Ethiopic
ህዝቄላ 43
ጾሳ ቦንቹ ጌሻ ጎልያ ስሜዳ
ሄዋፐ ጉይያን፥ ሄ ብታኒ ታና አዋይ ዶልያ ባጋ ጼልያ ፐንግያኮ አሄዳ። ታን እስራኤልያ ጾሳ ቦንቹ አዋይ ዶልያ ባጋፐ ይያዋ በኣድ። አ ዩሳ ኮሻይ ዳሮ ሃ ኩንዋ ጉን ማላ፤ ቃይ ቢታይካ አ ቦንቹዋን ፖኤዳ።1 በኤዳ ሳጻይ ካሰ ጾሳይ የሩሳላመ ካታማ ይሳናዉ ዬዳ ዎደ በኤዳ ሳፃ ማላቴ፤ ቃይ ኮባራ ሻፋ ማታን ታን በኤዳ ሳጻካ ማላቴ። ሄዋ በኣደ፥ ታን ታ ሶምኡዋ ቢታ ጋደ ጉፋናድ። መና ጎዳ ቦንቹ አዋይ ዶልያ ባጋ ጼልያ ፐንግያና ጌሻ ጎልያ ግዶ ገሌዳ። ሄ ዎደ ጾሳ አያናይ ታና ፑደ ደንደ፥ ግዶ ዳባባ ገልሴዳ፤ በአ! መና ጎዳ ቦንቹ ጌሻ ጎልያ ኩሜዳ።
ሄዋን ሄ ብታኒ ታ ምይያን ኤቂደእሽን፥ እቱ ጌሻ ጎልያ ግዶፐ ታዉ ሃሳይሽን ስሳድ። እ ሀዋዳን ያጌዳ፤ “ላ አሳ ናአዉ፥ ሀዌ ታ አራታ ሳነ ታ ገዲ የያ ሳኣ። ታን እስራኤልያ አሳ ግዶን መናዉ ደአና። ሀዋፐ ስንዉ እስራኤልያ አሳ ግድና፥ ኡንቱንቱ ካተቱዋ ግድና፥ ሀራ ጾሳቶ ጎይንያዋን፥ ዎይ ሸምፑ ባይና ባረንቱ ካተቱዋ ሀዉልትያዉ ጎይንያዋን ታ ጌሻ ሱን ቱንስክኖ። ዋቲደ ጎፐ፥ እት ጎዳ ጻላላይ ታናነ ኡንቱንታነ ሻክና፥ ባረንቱ ፐንግያ ታዋ ምይያን፥ ባረንቱ ፐንገ ምካ ታዋ ምይያን ኤሴድኖ። ባረንቱ ሸነይያ ኦሱዋን ታ ጌሻ ሱን ቱንሴድኖ። ሄዋ ድራዉ፥ ታን ታ ሀንቁዋን ኡንቱንታ ይሳድ። ሀእ ስም ሀራ ጾሳቶ ጎይንያዋ አግኖ፤ ባረንቱ ካተቱዋ ሀዉልትያ ጎይንያዋ ታ ማታፐ ድግኖ። ያቶፐ፥ ታን ኡንቱንቱ ግዶን መናዉ ደአና።
“ላ አሳ ናአዉ፥ ታን ኔና በሴዳ ጌሻ ጎልያባ እስራኤልያ አሳዉ ኦዳ፤ ኡንቱንቱ ባረንቱ ኦዳ ናጋራን ዬላታና ማላ፥ አ መባነ እ ኬጸቴዳ ማራ ኡንቱንቶ ኦዳ። ኡንቱንቱ ባረንቱ ኦዳባን ዬላትያዋንታ ግዶፐ፥ ጌሻ ጎልያ ማላ፥ እ ኬጸቴዳ ማራ፥ ከስያ ሳአቱዋ፥ ገልያ ሳአቱዋነ አ ኩመን ምስልያ ኡንቱንቶ ቆንጭሳ። ሄዋዳንካ ቃይ፥ አ ዎጋ ኡባነ አ ህግያ ኡባ ኡንቱንታ ኤርሳ። ቃይካ ሄ ጎሊ ዎት ኬጸቴደንቶነ ኡንቱንቱ አ ዎጋ ኡባነ ህግያ ኡባ ናጋናዉነ ፖላናዉ ዳንዳያና ማላ፥ ኔን ኡንቱንቱ ጼልሽን ጻፋ።
“ጌሻ ጎልያ ህጊ ሀዋ: ጌሻ ጎሊ ኬጸቴዳ ደርያ ሁጲነ አ ዩሹዋን ደእያ ሄራይ ኡባይ ኡባፐ አዳ ጌሻ ግዳናዋ። ኤ፥ ጌሻ ጎልያ ህጊ ሀዋ።
ያርሽያ ሳአ
“ያርሽያሳይ ካሰ ጌሻ ጎልያ ልክያዳንካ፥ እት ዋ ቦላ ኦይዱ ብራቱዋ ጉጄዳ፥ አዱሳ ዋን ልከቴዳ። ያርሽያ ሳአ ባሱዋ ዩሹዋን እት ዋ ዝቂያነ እት ዋ አክያ ኦላይ ደኤ፤ ሄ ኦላዉ ካረ ባጋ ደይ እት ታካያ ቄ። ያርሽያ ሳአ ጌሳይ ሀዋ ማላ:2 ባሱዋፐ ቢደ፥ ኮይሮ ደ ጋካናዉ 2 ዋ፤ ላኤን ደይ እት ዋ ያርሽያ ሳኣኮ ሺቅ ዶሚደ፥ 4 ዋ ቄ፤ ቃይካ እት ዋ ያርሽያ ሳኮ ሺቂደ፥ ያርሹ ጹገትያ ጮጪ ደእያ ሄዘን ደይ 4 ዋ ቄ። እ ኦይዱ ምዛና ግዲደ፥ ኦይዱ ማርያንካ እት እት ካጪ ደኤ። ያርሹዋ ጹግያ ጮጪ ኦይዱ ሚዛናን ግዲደ፥ 12 ዋ፥ ጎምፓይካ 12 ዋ። ላኤን ደይካ ሄዋ ማላ ኦይዱ ምዛና ግዲደ፥ 14 ዋ፥ ጎምፓይካ 14 ዋ። ሄ ደዉ ካረ ባጋ ጋጻይ እት ታካ ቄ። ዩሹዋ ኡባን እት ዋ ግዴዳ ኦላይ ደኤ። ያርሽያ ሳ ፑደ አፍያ ደቱ አዋይ ዶልያ ባጋን ደኢኖ” ያጌዳ።
ቃይካ እ ታና ሀዋዳን ያጌዳ፤ “ላ አሳ ናአዉ፥ ኡባ ሞድያ መና ጎዳይ ሀዋዳን ያጌ፤ ‘ያርሽያ ሳአ ዎጋይ ሀዋ። ጹግያ ያርሹዋ ያርሻናዉነ ሱ ፑሻካዉ፥ ያርሽያ ሳአ ግምቢደ ፖልያ ጋላስ፥ ታኮ ሺቂደ፥ ታዉ ኦያ ጻዶቃ ያራፐ የለቴዳ ሌዊያ ዛረ ቄሳቶ ናጋራ ያርሹዋ ኦደ፥ እት ኮሩማ እማ። ኡባ ሞድያ መና ጎዳይ ሀዋ ኦዳይ። ኔን ሄ ሱፐ አካደ፥ ኦይዱ ካጨቱዋ፥ ላኤን ደ ኦይዱ ሚዛናነ ሄ ደዉ ጋጻ ኦካ። ሄዋዳን ኦደ፥ ያርሽያ ሳአ ቱናተፐ ጌሻ። ቃይ ናጋራ ያርሾ እመቴዳ ሄ ኮሩማ አካደ፥ ጌሻ ጎልያዋ ግዲደ፥ ጌሻ ሳኣፐ ካረ ባጋና አዉ አዛዘቴዳ ሳኣን ጹጋ።
“ ‘ዎንተ ጋላስ ትላ ቦላና ደእያ እት ዴሻ ኦርግያ አካደ፥ ናጋራ ያርሾ ያርሻ። ካሰ ኮሩማ ሱን ጌሼዳዋዳን፥ ሄ ዴሻ ኦርግያ ሱን ያርሽያ ሳአ ጌሻ። ጌሽያዋ ፖላደ፥ ትላ ቦላና ደእያ እት ኮሩማነ ትላ ቦላና ደእያ እት ዶርሳ ኦርግያ አካደ፥ ላኡዋካ መና ጎዳ ስን ሺሻ። ያቶፐ ቄሳቱ ኡንቱንቱ ቦላ ማጽንያ ቆሊደ፥ መና ጎዳዉ ጹግያ ያርሹዋ ኦደ ያርሽኖ።
“ ‘ላፑን ጋላሳ ኩመን፥ ሀች ሀች እት ዴሻ ኮልያ ናጋራ ያርሾ፥ ቃይ ትላ ቦላና ደእያ እት ኮሩማነ ትላ ቦላና ደእያ እት ዶርሳ ኦርግያ ሺሻ። ቄሳቱ ላፑን ጋላሳ ኩመን ያርሽያ ሳአ ቱናተፐ ጌሽኖ። ያቲደ ጾሳዉ አ ዱማይኖ። ሀ ጋላሳቱ ዉርያ ዎደ፥ ሆስፑን ጋላሳፐ ዶሚደ፥ ቄሳቱ ህንተ ጹግያ ያርሹዋነ ህንተ እትፐተ ያርሹዋ ያርሽያ ሳአ ቦላን ያርሽኖ። ሄ ዎደ ታን ህንተናን ናሸታና። ታን ኡባ ሞድያ መና ጎዳይ ሀዋ ኦዳይ’ ያጌ” ያጌዳ።3
Source notes (3)
- Cross-reference ህዝ. 10:3-4፣ 18-19፤ 11:22-23፤ ሳፃ 1:15
- Cross-reference ህዝ. 27:1-2፤ 2 ኦዱዋ 4:1
- Cross-reference ከሳ 29:35-37
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.