Dawro Full Bible Ethiopic
ህዝቄላ 30
ጾሳይ ግብጻ ሙራና
ቃይካ መና ጎዳ ቃላይ ታኮ ሀዋዳን ያጊደ ዬዳ፤ “ላ አሳ ናአዉ፥ ሀዋዳን ያጋደ ትምቢትያ ኦዳ፤ ‘ኡባ ሞድያ መና ጎዳይ ሀዋዳን ያጌ፤ “ሄ ጋላሳዉ፥ አየ አና! ያጊደ ዝላልተ! አያዉ ጎፐ፥ ሄ ጋላሳይ ማቴዳ! መና ጎዳ ጋላሳይ ጋኬዳ! ሄ ጋላሳይ ሻሪ ስኬዳ ጋላሳነ ካዉተቱዋ ኡባዉ መቶ ጋላሳ ግዳናዋ። ግብጼ ቦላ ኦላይ ያና፤ ቶጵያ ቦላንካ ቱጋይ ያና። ዳሮቱ ግብጼ ቢታን ሀይቃና፤ ሄ ቢታ ዱረተይ ቦንቀታና፤ አ ባሱካ ባያና። ሄ ኦላይ ቶጵያ፥ ሊድያ፥ ሊብያ፥ አራባነ ታ ጫቆ ቢታ አሳ ኡባ ግብጼና ጋደ ዉርሳና” ያጌ።
“ ‘መና ጎዳይ ሀዋዳን ያጌ፤ “ግብጼ ማድያዋንቱ ኩንዳና፤ አ ኦቶረትያ ዎልቃይ ዉራና። ምግዶላፐ ቢደ አስዋነ ጋካናዉ፥ ኡንቱንቱ ማሻን ሀይቃና። ታን ኡባ ሞድያ መና ጎዳይ ሀዋ ኦዳይ። ግብጼ ቢታይ ቢታ ኡባፐ አዳ መላ ቢታ ግዳናዋ፤ አ ካታማቱካ ሀራ ኮለቴዳ ካታማ ኡባፐ አዋ ኮለቲደ ደአና። ታን ግብጼ ታማን ኦይያ ዎደነ አ ማድያዋንቱ ኡባይ ሀይቂ ዉርያ ዎደ፥ ታን መና ጎዳ ግድያዋ ኡንቱንቱ ኤራና።
“ ‘ “ሄ ጋላስ ታን ሳሮ ደእያ ቶጵያ አሳ ዳጋንናዉ አሳቱዋ ማርካብያን ኪታና። ግብጼ ሙረትያ ጋላስ ቶጵያ አሳ ቦላ ቱጋይ ያና። በእተ፥ ሄ ጋላሳይ ጋኬዳ!” ያጌ።
“ ‘ኡባ ሞድያ መና ጎዳይ ሀዋዳን ያጌ፤ “ባብሎነ ካትያ ናቡካዳናጾራ ኩሽያን ታን ግብጼ ዱረተ ይሳና። ካዉተቱዋ ኡባፐ አደ፥ መቀ ኢትያ ኦላንቻቱዋ ካለደ ዪደ፥ እ ቢታ ይሳና፤ ኡንቱንቱ ግብጼ አሳ ቦላን ማሻ ሾዲደ፥ ቢታን አሃ ኩንና። ናይለ ሻፋ ታን መልሳና፤ ታን ግብጼ ኢታ አሳቱዋ ኩሽያን አደ እማና፤ ኡንቱንታ፥ ሄ ቢታነ አን ደእያዋ ኡባ አላጋቱዋ ኩሽያን ይሳና። ታን መና ጎዳይ ሀዋ ኦዳድ” ያጌ።
“ ‘ኡባ ሞድያ መና ጎዳይ ሀዋዳን ያጌ፤ “መምፒሳ ካታማን ደእያ ኤቃቱዋነ ምስለቱዋ ኡባ ታን ይሳና፤ ግብጼ ቢታን ላኤን ካፖ ግድያዌ ደኤና፤ ቢታ ኡባ ታን ያሽሳና። ታን ፓትሮሳ ግያ ገድሳ ባጋ ግብጼ መላ ከሳና፤ ሁጲሳ ባጋና ደእያ ጾኣነ ካታማን ታማ የዳና፤ ቴብሳ ካታማካ ሙራና። ግብጼዉ ጌሶ ግዴዳ ፐሉስያማን ታ ሀንቁዋ ጉሳና፤ ቴብሳ አሳ ኡባ ዉርሳና። ታን ግብጼን ታማ ኦይና፤ ፐሉስያምካ ሎይ ቱጋታና፤ ቴብሳ ድርሳ ግምቢ ኮለታና፤ መምፒሳ ካታማን ዱጸና መቱ ጋካናዋ። ኦና ካታማ ያላጋ አሳቱነ ብባስታ ካታማን ደእያ ያላጋይ ኡባይ ማሻን ዉራና፤ ሄ ካታማቱካ ኦሞደቲደ ባና። ግብጼ ዎልቃ ታን መንሬያ ዎደ፥ ጻፍናሳን ጋላሳይ ቃማና፤ እ ኦቶረትያ ዎልቃይ ዉራና፤ ግብጻ ሻሪ ካማና፤ ጻፍናሳ ዩሹዋን ደእያ ካታማቱዋ ኡባን ደእያ አሳይ ኦሞዱዋን ባና። ታን ግብጻ ሄዋዳን ሙራና። ሄ ዎደ ታን መና ጎዳ ግድያዋ ኡንቱንቱ ሄዋን ኤራና” ያጌ’ ያጋ” ያጊደ ዬዳ።
ግብጼ ካቲ ጾነቴዳ
ኑን ኦሞደተዳ ታማነ እተን ላይን፥ ኮይሮ አግናን፥ ላፑን ጋላሳን፥ መና ጎዳ ቃላይ ታኮ ሀዋዳን ያጊደ ዬዳ፤ “ላ አሳ ናአዉ፥ ታን ግብጼ ካትያ ቀስያ መንድ፤ አ ዎሻንነ ጩርቃን ጻጽ ኮሊደ ፓያ ሂላይካ ባዋ፤ ሀዋፐ ስንናዉ እ ምኖተ አሂደ፥ ማሻ ኦይቃናዉ ዳንዳየና። ሄዋ ድራዉ፥ ኡባ ሞድያ መና ጎዳይ ሀዋዳን ያጌ፤ ‘ታን ግብጼ ካትያዉ ሞርከ። አዉ ካሰ መኦ ቀስያነ ፓጻ ደእያ ቀስያ ላኡዋካ ታን መንና፤ አ ማሻይካ አ ኩሽያፐ ሳኣን ዎናዳን ኦና። ግብጼቱዋ ካዉተቱዋ ግዶንነ ሀራ ቢታቱዋን ላላና።
“ ‘ታን ባብሎነ ካትያ ላኡ ቀስያ ምንሳደ፥ ታ ማሻ አ ኦይና። ሽን ግብጼ ካትያ ቀስያ መንና፤ ባረ ሞርክያ ስንን እ ሀይቃና ሀንያዌ ኦልያዋዳን ኦላና። ኤ፥ ታን ግብጼ ካትያ ላኡ ቀስያ ዳቡርሳደ፥ ባብሎነ ካትያ ቀስያ ምንና። ታን ባብሎነ ካትያ ታ ማሻ ኦይያ ዎደነ እ ግብጼ ቦላ አ ደንያ ዎደ፥ ግብጼቱ ታን መና ጎዳ ግድያዋ ኤራና። ግብጼቱዋ ታን ካዉተቱዋ ግዶንነ ቢታ ኡባን ላላና። ሄ ዎደ ታን መና ጎዳ ግድያዋ ኡንቱንቱ ሄዋን ኤራና’ ያጌ” ያጊደ ዬዳ።
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.