ህዝቄላ 28

ጺሮሳ ሞድያዋንቱ ቦላ ያና ፕርዳ

1መና ጎዳ ቃላይ ታኮ ሀዋዳን ያጊደ ዬዳ፤ 2“ላ አሳ ናአዉ፥ ጺሮሳ ካፑዋ ሀዋዳን ያጋደ ኦዳ፤ ‘ኡባ ሞድያ መና ጎዳይ ሀዋዳን ያጌ፤ “ነ ዎዛናይ ኦቶረቴዳ ድራዉ፥ ታን ጾሳ፤ ታን አባ ግዶ ግሸቻን፥ ጾሳቱዋ አራታን ኡታድ ያጋዳ። ኔን፥ ታን ጾሳዳን፥ አዳ ኤራንቻ ከሳድ ጋደ ቆፖፐነ፥ ኔን አሳፐ አትና፥ ጾሳ ግዳካ። 3ኔን ዳኔላፐካ አዳ ኤራንቼ? አይ ጹራይካ ኔፐ ጌመኔ? 4ቱሙካ ኔን ነ አዳ ኤራንነ ነ አኬካን ዱረ ግዳዳ፤ ብራነ ዎርቃ ነ ዱረታ ምንጅያ ጎልያ ሺሻዳ። 5ነ ዛልእያ ኤራን ዳሮ ዎያ ደማዳ፤ ነ ዱረታፐ ደንዴዳዋን ነ ዎዛናይ ኦቶረቴዳ” ያጌ።

6“ ‘ሄዋ ድራዉ፥ ኡባ ሞድያ መና ጎዳይ ሀዋዳን ያጌ፤ “ኔን፥ ታን ጾሳዳን፥ አዳ ኤራንቻ ጋደ ቆፕያ ድራዉ፥ 7ታን ነ ቦላ ካዉተቱዋ ኡባፐ መቀ ባይና፥ ኢታ ሞርከቱዋ አሀና፤ ኔን ነ አዳ ኤራን ሺሼዳ ማጹዋ ኡባ ኡንቱንቱ ባረንቱ ማሻን ይሳና፤ ነ ቦንቹዋካ ኡንቱንቱ ቱንሳና። 8ኔና ኡንቱንቱ ዎደ፥ አባ ጪማን ኦላና። 9ያትና፥ ኔና ዎና ሀንያዋ ስንን ኔን፥ ቱሙ ታን ጾሳ ጋኒ? ኔና ዎያዋንቱ ኩሽያን ኔን አሳፐ አትና፥ ጾሳ ግዳካ። 10ኔን አላጋቱዋ ኩሽያን አማነና አሳይ ሀይቂያ ሀይቁዋ ሀይቃና። ታን ኡባ ሞድያ መና ጎዳይ ሀዋ ኦዳድ” ያጌ’ ያጋ” ያጊደ ዬዳ።

ጺሮሳ ካትያ ኩንደ

11ቃይካ መና ጎዳ ቃላይ ታኮ ሀዋዳን ያጊደ ዬዳ፤ 12“ላ አሳ ናአዉ፥ ጺሮሳ ካትያዉ ሀዋዳን ያጋደ ዝላላ፤ ‘ኡባ ሞድያ መና ጎዳይ ሀዋዳን ያጌ፤ “ኔን ካሰ አዳ ኤራን ኩሜዳዋ፤ ኔን አሳይ ሌምሲደ ኦድያ አዳ ፑላንቻ ግዳዳ። 13ኔን ኤደነን፥ ጾሳ ገነትያን ካሰ ደኣዳ፤ ሳርድዮነ፥ ቶጳዝዮነ፥ አልማዘ፥ ብራለ፥ ማርግደ፥ ያስጲደ፥ ሳምፔረነ ባሉራ ጌተትያ አልኦ ሹቻን አሌቀታደ፥ ሎኦ ዎርቃ አሌቁዋ ካሰ ማያዳ፤ ኔን መቴዳ ጋላስ ሀዌ ኡባይ ነዉ ጊጌዳ። 14ታን ኔና ናግያ ክሩበ ኦደ ሱንድ፤ ያታደ ኔና ኦካድ። ታ ጌሻ ደርያ ቦላን ኔን ደኣዳ፤ ቃይ ታማዳን ጶልያ አልኦ ሹቻቱዋ ግዶን ስመረታዳ።

15“ ‘ “ኔን መቴዳ ጋላሳፐ ዶማደ፥ ኢታባይ ነ ቦላ ቤቴዳ ጋላሳይ ጋካናዉ፥ ነ ኦግያ ኡባን ቶሺ ባይናን ደኣዳ። 16ነ ዳሮ ዛልእያፐ ደንዴዳዋን፥ ማካላን ኩማደ፥ ናጋራ ኦዳ። ሄዋ ድራዉ፥ ታ ጌሻ ደርያፐ ቱናባዳን፥ ኔና ዎልቃን ከሳድ። ኔኖ፥ ናግያ ክሩብያዉ፥ ሄ ታማዳን ጶልያ አልኦ ሹቻቱዋ ግዶፐ ታን ኔና የደርሳድ። 17ኔን ፑላንቻ ግድያ ድራዉ፥ ዳሮ ኦቶረታዳ፤ ነ ቦንቹዋ ጋሱዋን፥ ነ አዳ ኤራ ቱንሳዳ። ሄዋ ድራዉ፥ ታን ኔና ሳኣን ኦላድ፤ ሀራ ካተቱ ኔና በኢደ ሴረታናዳን ኦድ። 18ነ ናጋራ ዳሩዋንነ ነ ጭሙዋ ዛልእያን፥ ነ ጎይንያ ሳአቱዋ ኡባ ቱንሳዳ። ሄዋ ድራዉ፥ ታን ታማይ ነ ግዶፐ ከሳናዳን ኦድ፤ እካ ኔና ሜዳ። ኡባቱ ጼልሽን፥ ታን ኔና ሳኣ ቦላን ብድን ከሳድ። 19ኔና ካሰ ኤርያ ካዉተቱ ኡባይ ነባን ዳጋሜድኖ። ነ ዉርሰይ ያሽያዋ ግዴዳ፤ ኔን ላኤን ኡባካ ደአካ” ያጌ’ ያጋደ ዝላላ” ያጊደ ዬዳ።

ሲዶና ቦላ ያና ፕርዳ

20መና ጎዳ ቃላይ ታኮ ሀዋዳን ያጊደ ዬዳ፤1 21“ላ አሳ ናአዉ፥ ነ ሶምኡዋ ሲዶና ካታማኮ ዛራደ፥ አ ቦላ ትምቢትያ ኦዳ። 22ሀዋዳን ያጋ፤ ‘ኡባ ሞድያ መና ጎዳይ ሀዋዳን ያጌ፤ “ኔኖ፥ ሲዶና፥ ታን ነዉ ሞርከ! ነ ቦላ ኦያዋን ታ ቦንቹ ቆንጫና። ነ ግዶን ደእያዋንታ ፕርድያዋን ታን ታ ጌሻተ በስያ ዎደ፥ ታን መና ጎዳ ግድያዋ ኡንቱንቱ ኡባይ ኤራና። 23ታን ነ ግዶን ኢታ ሀርግያ የዳና፤ ነ ኦግያን ሱይ ጉካናዳን ኦና። ኡባ ባጋና ይያ ኦላ ጋሱዋን ነ አሳይ ማሻን ሀይቃና። ታን መና ጎዳ ግድያዋ ኡንቱንቱ ሄዋን ኤራና።

24“ ‘ “ሀዋፐ ስንናዉ እስራኤልያ ዩሹዋን ደእያ፥ አ ካደ ጼልያ ቢታ ኡባፐ፥ አጉን ማላነ ካሽያ ማላ ግዲደ ቆህያባይ ኦንነ ደኤና። ታን ኡባ ሞድያ መና ጎዳ ግድያዋ ኡንቱንቱ ሄዋን ኤራና” ያጌ’ ያጋ” ያጊደ ዬዳ።

እስራኤልያ አሳ አንጁዋ

25ኡባ ሞድያ መና ጎዳይ ሀዋዳን ያጌ፤ “እስራኤልያ አሳ ኡንቱንቱ ላለቴዳ ካዉተ ኡባፐ ሺሻደ፥ ታን አህያ ዎደነ ኡንቱንቱ ሄ ካዉተቱዋ ኡባ ስንን ታን ታ ጌሻተ በስያ ዎደ፥ ታን ታ ቆማ ያቆባዉ እሜዳ ባረንቱ ቢታን ኡንቱንቱ ደአና። 26ሄዋን ኡንቱንቱ ሳሩዋን ደአና፤ ጎልያ ኬጻና፤ ዎይንያ ቱራካ ቶካና። ኡንቱንታ ካደ ጼልያ ኡንቱንቱ ሾሮቱዋ ኡባካ ታን ፕርድያ ዎደ፥ እስራኤልያ አሳይ ሳሩዋን ደአና። ሄ ዎደ ታን መና ጎዳይ ኡንቱንቱ ጾሳ ግድያዋ ኡንቱንቱ ሄዋን ኤራና” ያጌ።