Dawro Full Bible Ethiopic
ህዝቄላ 21
መና ጎዳ ማሻ
መና ጎዳ ቃላይ ታኮ ሀዋዳን ያጊደ ዬዳ፤ “ላ አሳ ናአዉ፥ ነ ሶምኡዋ የሩሳላመኮ ዛራደ፥ አሳይ ጎይንያ ሳአቱዋ ቦላ ቃላ ኦዳ፤ እስራኤልያ ቢታ ቦላን ትምቢትያ ኦዳ። ሀዋዳን ያጋ፤ መና ጎዳይ ሀዋዳን ያጌ፤ ‘ታን ነዉ ሞርከ። ታን ታ ማሻ ሾኩዋፐ ሾዳደ፥ ጽሎ አሳነ ኢታ አሳ ኡባ ነ ግዱዋፐ ዉርሳና። ጽሉዋነ ናጋራንቻ ኡባ ይሳናዉ ሁጲሳፐ ገድሳ ጋካናዉ ደእያ አሳ ኡባ ቦላ ታ ማሻ ሾዳና። ሄዋን ታን መና ጎዳይ ታ ማሻ አ ሾኩዋፐ ሾዴዳዋነ ጉየ ዛረናዋ አሳይ ኡባይ ኤራና’ ያጌ” ያጋ።
ሄዋ ድራዉ፥ “አሳ ናአዉ፥ አሳይ ኡባይ ጼልሽን፥ ነ ዎዛናይ መእና ኦላ፥ ጫሞ ኡንአን ኦላ። ኡንቱንቱ ኔና፥ ‘አያዉ ኦላይ?’ ጊደ ኦችያ ዎደ፥ ሀዋዳን ያጋ፤ ‘ስንና ይያ ኢታ ኦዶ ኦላይ። ዎዛን ኡባይ ያሻን ሙሻና፤ ኩሽያ ኡባይ አርጋጫና፤ ኡንቱንቱ ጎባተይ ኡባይ ኡንቱንቱፐ ክቻና፤ ጉልባታይ ኡባይካ ኮኮራና። ሄ ዎዲ ጋኬዳ! እ ኤለ ፖለታና! ታን ኡባ ሞድያ መና ጎዳይ ሀዋ ኦዳይ’ ያጋ” ያጊደ ዬዳ።
መና ጎዳ ቃላይ ታኮ ሀዋዳን ያጊደ ዬዳ፤ “ላ አሳ ናአዉ፥ ሀዋዳን ያጋደ ትምቢትያ ኦዳ፤ ጾሳይ ሀዋዳን ያጌ፤ ‘ማሻ! ሌፈቴዳነ ቁጨቴዳ ማሻ! ሹካናዉ ሌፈቴዳ። ዋልቃንዳን ጶልቁ ጋናዉ ቁጨቴዳ። ታ አሳይ እመቴዳ ሴራነ ሙሩዋ ኡባ እጼዳ ድራዉ፥ ሀዋፐ ጉይያን፥ ኦንነ ናሸተና። ጎኤታናዉ ማሻይ ቁጨቴዳ፤ ሌፈቲደነ ቁጨቲደ፥ ሹክያዎ እመቴዳ።
“ ‘ላ አሳ ናአዉ፥ ዬካነ ዝላላ! አያዉ ጎፐ፥ ሄ ማሻይ ጊገቴዳዌ ታ አሳ ቦላናነ እስራኤልያ ካፖቱዋ ኡባ ቦላና። ካፓቱካ ታ አሳና እትፐ ማሻን ሀይቃና። ሄዋ ድራዉ፥ ነ ትራ ባቃ። ታን ታ አሳ ፓጫና፤ ኡንቱንቱ ናጋራ ፓጸናን እጾፐ፥ ሀ መቱ ኡባይ ኡንቱንቱ ቦላ ጋካናዋ። ታን ኡባ ሞድያ መና ጎዳይ ሀዋ ኦዳይ ያጌ ያጋ።
“ ‘ሀእካ አሳ ናአዉ፥ ትምቢትያ ኦዳ፤ ነ ኩሽያካ ባቃ። ሄ ዎደ ማሻይ ላኡ ሄዙ ዛሪደ ሾጫና፤ ሄዌካ ዩሹዋ ኡባና ዩዪደ፥ ዳጋንያ፥ ዎያነ ሹክያ ማሻ። ሄዌ ኡንቱንቱ ዎዛናይ ሙሻናዳንነ ኡንቱንቱፐ ዳሮቱ በታናዳን ኦና። አየ አና! ማሻይ ኡባይ ገልያ ግምቢያ ፐንገቱዋን ዋልቃንዳን ጶልቁ ጌ፤ ሾኩዋፐ ሾደቲደ ሹካናዉ ቁጨቴዳ። ኔኖ፥ ቃራ ማሻዉ፥ ኡሸቻዉነ ሀድርሳዉ፥ ነ ስሜዳ ባጋ ኡባ ቡሳካ። ታንካ ቃይ ታ ኩሽያ ባቃና፤ ታ ሀንቁካ ዶቻና።’ ታን መና ጎዳይ ሀዋ ኦዳድ” ያጊደ ዬዳ።
ባብሎነ ካትያ ማሻ
መና ጎዳ ቃላይ ታኮ ሀዋዳን ያጊደ ዬዳ፤ “ላ አሳ ናአዉ፥ ባብሎነ ካትያ ማሻይ ይያ ላኡ ኦገቱዋን ማላ ዎ። ላኡ ኦገቱካ እት ቢታፐ ደንዲኖ። ላኡ ኦገቱ ጋከትያ ዳንዋን ካታማኮ አፍያ ሳኣን ማላ ግድያ ቱሳ ኤሳ። እት ኦግያን ደእያ ማላይ ራባ ግያ አሞናቱዋ ካታማ ብያሳ ማሌ፤ ህንኩ ቃይ ይሁዳን ግምበቴዳ የሩሳላመ ካታማ ብያሳ ማሌ። ባብሎነ ካቲ ኦገቱ ጋከትያ ዳንዋን፥ ማላ ቱሳቱዋ ማታን ኤቄ። እ ሀቃ ኦግያ ባነንቶ ኤራናዉ፥ ዎንዳፍያ ማሻቱዋ ሳማ የጋና፤ ባረ ኤቃቱዋና ዞረታና፤ መህያ ማራጭያካ ጼላና። ድርሳ ግምበቱዋ ፐንግያ ላልያ ዱሩማ አሀና ማላ፥ ዎናዉ አዛዙዋ አና ማላ፥ ጬቁዋ ጬቀታና ማላ፥ ድርሳ ግምበቱዋ ፐንግያ ላልያ ዱሩማቱዋ ካታማ ፐንግያን ኤሳና ማላነ ቢታ ኬላና ማላ፥ ግምቢያና ጋደ ሚጻ ጊግሳና ማላ፥ የሩሳላመ ሳማይ አ ኡሸቻ ኩሽያን ዎዳ። የሩሳላመ አሳይ ባብሎነ ካትያና ጫቀቴዳ ድራዉ፥ ሀዌ ባረንቱ ቦላ ጋኬ ጊደ ቆፕበይክኖ። ሽን ባብሎነ ካቲ ኡንቱንታ ኡንቱንቱ ናጋራ ሀሳይሲደ፥ ኦሞዶ አፋና።
“ሄዋ ድራዉ፥ ኡባ ሞድያ መና ጎዳይ ሀዋዳን ያጌ፤ ‘ህንተ ናጋራይ ቆንጬዳ፤ ህንተ ባይዛንቻ አሳ ግድያዋ አሳይ ኡባይ ኤሬ፤ ህንተ ኦሱ ህንተ ናጋራንቻ ግድያዋ በሴ። ሄዋ ድራዉ፥ ህንተ ባይዙ ሀሳየታና፤ ህንተካ ህንተ ሞርክያዉ አደ እመታና’ ያጌ።
“ኔኖ ኢታነ ቱና ግዴዳ እስራኤልያ ካፖ፥ ነ ዉርሰ ፕርዳ ጋላሳይ ጋኬዳ። ኡባ ሞድያ መና ጎዳይ ሀዋዳን ያጌ፤ ‘ነ ሁጲያፐ ካላቻ ደን፤ ነ ሁጲያን ጻጼዳዋካ ቃራ። ሀዋፐ ስንናዉ ካሰዋዳን ሀናናዌ ባዋ፤ ዝቂ ጌዳዌ ቁ ጋና፤ ቁ ጌዳዌካ ዝቂ ጋና። ባሻ! ባሻ! ታን ሀ ካታማ ባይዛና! ፕርድያ ማታይ ደእያዌ ያና ጋካናዉ፥ ሀ ካታማይ ላኤን ኬጸተና። እ ይያ ዎደ ታን አዉ አደ እማና’ ያጌ።
“ላ አሳ ናአዉ፥ ሀዋዳን ያጋደ ትምቢትያ ኦዳ፤ ‘እስራኤልያ ቦርያ አሞናቶ ኡባ ሞድያ መና ጎዳይ ሀዋዳን ያጌ፤ “ማሻ! ማሻይ ዎናዉ ሾኩዋፐ ሾደቴዳ፤1 ዉርሳናዉነ ዋልቃንዳን ጶልቁ ጋናዉ ቁጨቴዳ። ህንተ በእያ ሳጻይ ዎርዱዋ፤ ህንተ ኦድያ ትምቢቲካ ዎርዱዋ። ህንተ ኢታነ ቱና አሳ፤ ህንተ ዉርሰ ፕርዳ ጋላሳይ ጋኬዳ። ህንተ ቆያን ማሻይ ዎና ሀኔ። ማሻ ሾኩዋን ዛርተ። ህንተ መቴዳ ሳኣን፥ ህንተ የለቴዳ ቢታን ታን ህንተ ቦላ ፕርዳና። ታ ሀንቁዋ ህንተ ቦላ ጉሳና፤ ታ ሀንቁዋ ታማይ ህንተ ቦላ ኤጽ ከሳና። ህንተና ባይዝያዋን ሎሄዳ፥ መቀ ባይና አሳቶ አ እማና። ህንተ ታማዉ ኤያ ም ግዳና፤ ህንተ ሱይ ህንተ ቢታን ጉካና፤ ህንተ ላኤን ሀሳየትክታ። ታን መና ጎዳይ ሀዋ ኦዳድ” ያጌ’ ያጋ” ያጊደ ዬዳ።
Source notes (1)
- Cross-reference ኤር. 49:1-6፤ ህዝ. 25:1-7፤ አሞጻ 1:13-15፤ ሶፎ. 2:8-11
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.