Dawro Full Bible Ethiopic
ህዝቄላ 19
እስራኤልያ ዳናቱዋ ዝላሳ
ጾሳይ ህዝቄላ፥ “እስራኤልያ ካፓቶ ሀዋዳን ያጋደ ዝላላ፤
“ህንተ አታ ጋሞቱዋ ግዶን፥
እዛ አይባ ጋማቲ!
ያላጋ ጋሞቱዋ ግዶን ግሳደ፥
ባረ ማራቱዋ ድቻዱ።
እዛ ባረ ማራቱዋፐ እቱዋ ድችና፥
ዎዳላ ጋሙዋ ከሴዳ።
እ ሻንካ ታማሪደ፥ አሳ ሜዳ።
ካዉተቱ ኡባይ አባ ስሲደ፥
ኦላን ገሊደ ኦይቀቴዳ።
ኡንቱንቱ አ ማጋን ጎቺደ፥
ግብጼ ቢታ አፌድኖ።
“አ አታ ናጎዌ ፖለተናን እጽና፥
ህዶታይ ዬዳዋ በኣደ፥
ባረ ማራቱዋፐ ላኤንዋ ድቻደ፥
ዎዳላ ጋሙዋ ከሳዱ።
እ ዎዳላ ጋሙዋ ግዲደ፥
ሀራ ጋሞቱዋ ግዶን፥
ያነ ሃነ ስመረቴዳ።
እ ሻንካ ታማሪደ፥ አሳ ሜዳ።
እ ኡንቱንቱ ዎልቃማ ጌሱዋ መንሬደ፥
ካታማካ ባይዜዳ።
ቢታይነ ቢታን ደእያ አሳይ ኡባይ፥
አ ጉደን ሻቢረቴዳ።
ዩሹዋን ደእያ ካዉተቱ ኡባይ፥
አ ኦይቃናዉ ጲርያ የጌድኖ።
ባረንቱ ግትያካ ምጬድኖ፤
ባረንቱ ኦላን አ ኦይቄድኖ።
ኡንቱንቱ ባረንቱ ማጋን አ ጎቺደ፥
ኮዳን ጊጌዳ ጉ ጎልያን የጊደ፥
ባብሎነ ካትያኮ አፌድኖ።
ላኤን አ ጉደይ እስራኤልያ ደረቱዋን ስሰተናዳን፥
ኡንቱንቱ አ ቃሾ ጎልያ ገልሴድኖ።
“ ‘ነ አታ ሃ ዶናን፥
ቶከቴዳ ዎይንያ ቱራ ማላ።
ዳሮ ሃይ ደእያ ድራዉ፥
ሄ ዎይንያ ቱራይ አይፍያ ዳርጻጽ ኡቴዳ፤
ቃይ ዳሮ ዳሻና ደኤ።
አ ማራቱዋፐ ምንያዌ፥
ሞድያዋንቱ ጻምኣ ግዴዳ።
አ ማራይ ዎልቃማ ማራቱዋፐ አዱቂደ፥
ቦላዉ አዳ።
ባረ ማራቱዋ ጮራተንነ
ቃተን ቦላና ቤቴዳ።
ሽን ሄ ቱራይ ሀንቁዋን ሾደቲደ፥
ቢታን ኦለቴዳ።
አዋይ ዶልያ ጫርኩ አ አይፍያ መልስና ቆቆፈቴዳ፤
አ ምኖ ታሺ መልና፥ ታማይ ሜዳ።
ሀእ ቃይ እ ሃ ባይና፥
መላ ቢታን ቶከቴዳ።
ታማይ አ ማራቱዋፐ እቱዋ ኦይቂደ፥
አ አይፍያናካ ድፕ ኦደ ሜዳ።
ያትና፥ ካዉተ ጻምኣ ግድያ፥
አይ ምኖ ማራይካ አ ቦላን አትቤና።
“ ‘ሀዌ ዬኩዋ ዝላሳ፤ ሀዋ ዝላሳዳን ጎኤታናዉ በሴ’ ያጋ” ያጌዳ።
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.