Dawro Full Bible Ethiopic
ህዝቄላ 13
ዎርዶ ትምቢትያ ኦድያ አቱማ አሳቶ ኦደቴዳ ትምቢትያ
መና ጎዳ ቃላይ ታኮ ሀዋዳን ያጊደ ዬዳ፤ “ላ አሳ ናአዉ፥ እስራኤልያን ሀእ ትምቢትያ ኦድያዋንቱ ቦላ ትምቢትያ ኦዳ። ባረንቱ ቆፋፐ ደንዲደ፥ ትምቢትያ ኦድያዋንታ ሀዋዳን ያጋ፤ ‘መና ጎዳ ቃላ ስስተ! ኡባ ሞድያ መና ጎዳይ ሀዋዳን ያጌ፤ አያነ በኤናን ጮ ባረንቶ ደንድያ ቦዛ ትምቢትያ ኦድያዋንቶ አየ አና! እስራኤልያ አሳዉ፥ ህንተ ትምቢትያ ኦድያዋንቱ ኮለቴዳ ካታማ ግዶን ደእያ ዎራካናቱዋ ማላ። መና ጎዳ ጋላስ ድርሳይ ኦላን ምን ኤቃናዳን፥ እስራኤልያ አሳይ ድርሳ ግምቢያ ዛር ግምቢ ምንሳናዉ፥ ግምቢ ኮለቴዳሳ ፑደ ብበይክኖ። ኡንቱንቱ ሳጻይ ዎርዱዋ፥ ቃይ ኡንቱንቱ ሙሩኑካ ዎርዱዋ። ኡንቱንቱ መና ጎዳይ ኪተናን፥ መና ጎዳይ ሀዋዳን ያጌ ያጊኖ። ያቲደ ኡንቱንቱ ኦዴዳዋ ጾሳይ ፖላና ያጊደ ናጊኖ። ታን ኦደናን ደእሺና፥ መና ጎዳይ ሀዋዳን ያጌ ያጊደ ኦድያ ህንተ ዎርዱዋ ሳጻነ ዎርዱዋ ሙሩኑዋ በእበይክቴ?’ ” ያጌ።
ሄዋ ድራዉ፥ ኡባ ሞድያ መና ጎዳይ ሀዋዳን ያጌ፤ “ህንተ ዎርዶባ ሃሳዬዳ ድራዉነ ህንተ በኤዳ ሳጻይ ዎርዶ ግዶ ድራዉ፥ ኡባ ሞድያ መና ጎዳይ ህንተዉ ሞርከ። ታ ኩሺ፥ ዎርዶ ሳፃ በኢደ፥ ዎርዱዋ ሙሩንያዋንቱ ቦላ ፕርዳናዉ ደንዴዳ። ኡንቱንቱ ታ አሳ ዞርያ ግዶን ቆፋ ቃቻናዉ ገልክኖ፥ ዎይ እስራኤልያ አሳይ ጻፈቴዳ ማዝጎብያን ጻፈትክኖ፥ ዎይ ኡንቱንቱ እስራኤልያ ቢታካ ገልክኖ። ሄ ዎደ ታን ኡባ ሞድያ መና ጎዳ ግድያዋ ህንተ ሄዋን ኤራና።
“ሳሩ ባይናን ደእሺና፥ ኡንቱንቱ ታ አሳ፥ ‘ሳአይ ሳራ!’ ያጊደ ዎራ ካለድኖ። ቃይ አሳይ ሹቻ ጮ ኬሊደ ድርና፥ ኡንቱንቱ ቦሹንቻ ኦኪኖ።1 ሄዋ ድራዉ፥ ሄ ቦሹንቻ ኦክያዋንታ፥ ‘ሄ ህንተ ኦኬዳ ግምቢ ኩንዳና! ዎልቃማ እራይ ቡካና፤ ቃይ ታን ጾሳይ ኦርዶ ሻቻ ዱገ የጋና፤ ኢታ ጎቲካ ደንዳና’ ያጊደ ኦድተ። ሄ ግምቢ ኩንዴዳ ዎደ፥ አሳይ ህንተና፥ ህንተ አ ኦኬዳ ቦሹንቻይ አነ?” ጊደ ኦቼናን አጋኔ? ያጌ።
ሄዋ ድራዉ፥ ኡባ ሞድያ መና ጎዳይ ሀዋዳን ያጌ፤ “ታን ታ ሀንቁዋን ኢታ ጎትያ የዳና፤ ቃይ ግምቢያ ድርሳ ኮላናዉ ታ ይሉዋን ኦርዶ ሻቻነ ዎልቃማ እራ ሱልያ ሀንቁዋና ኪታና። ህንተ ቦሹንቻ ኦኬዳ ግምቢያ ታን መንሬና፥ ቢታን ላላናነ ባሱዋ መላ አሻና። እ ኩንድያ ዎደ ህንተ አ ግዶን ሀይቃና። ሄ ዎደ ታን መና ጎዳ ግድያዋ ህንተ ሄዋን ኤራና። ሄዋዳን ሀኒደ፥ ታ ሀንቁ ግምቢያ ቦላነ ግምቢያ ቦሹንቻ ኦኬዳ አሳቱዋ ቦላ ዎና። ታን ህንተና፥ ‘ሀእ ግምቢ ባዋ፤ ግምቢያ ቦሹንቻ ኦኬዳዋንቱካ ደእክኖ። እስራኤልያን ደእያ፥ የሩሳላመባ ትምቢትያ ኦዴዳዋንቱ፥ ሳሩ ባይናን አዉ ሳሩዋ ሳፃ በኤዳዋንቱ፥ ኡንቱንቱ ደእክኖ’ ያጋይ። ታን ኡባ ሞድያ መና ጎዳይ ሀዋ ኦዳይ” ያጌ ያጋ።
ዎርዶ ትምቢትያ ኦድያ ማጫ አሳቶ ኦደቴዳ ትምቢትያ
“ላ አሳ ናአዉ፥ ባረንቱ ቆፋፐ ደንዲደ፥ ትምቢትያ ኦድያ ነ አሳ ማጫ አሳቱዋኮ ሀእ ነ ሶምኡዋ ደረቃን ዛራ፤ ኡንቱንቱ ቦላ ትምቢትያ ኦዳ። ሀዋዳን ያጋ፤ ‘ኡባ ሞድያ መና ጎዳይ ሀዋዳን ያጌ፤ “ሀራ አሳ ቦላን አሳዉ ዎልቃይ ደአናዳን፥ ኡንቱንቱ ኩሽያን ኡባን ሙሩኑዋባ ስኪደ ዎያነ አሳ ኡባዉ ሁጵያ ሻሽያ ጊግስያ ማጫ አሳቶ፥ ህንተዉ አየ አና! ህንተ ታ አሳ ሸምፑዋ ጲሪደ ህንተ ህንተ ሸምፑዋ አሻንቴ?። እት ኮጵያ ባንጋ ዎይ እት ባሶ ኡክ ደማናዉ፥ ዬላይያዋ ኦደ፥ ታ አሳ ስንን ታና ካዉሽሲታ። ሄዋ ግያዌ ህንተ ሀይቃናዉ በሰናዋንታ ዎደ፥ አታናዉ በሰናዋንታ አሺታ ግያዋ። ያቲደ ታ አሳዉ ዎርዱዋ ኦዲታ፤ ኡንቱንቱካ ህንተ ዎርዱዋ ስሲኖ” ያጌ።
“ ‘ሄዋ ድራዉ፥ ኡባ ሞድያ መና ጎዳይ ሀዋዳን ያጌ፤ “ህንተ ሀራ አሳ ቦላን አሳዉ ዎልቃይ ደአናዳን፥ ህንተ ኩሽያን ዎዳ ሙሩኑዋ ታን ደንና። ታን አ ህንተ ኩሽያፐ ዱ ኦላና፤ ጲርያፐ ከስ አክያ ካፉዋዳን፥ ታን ኡንቱንታ ህንተ ዎልቃፐ አሻ አካና። ታን ህንተ ቢታ ሻሽያካ ዳፋ አካደ፥ ታ አሳ መናዉ ህንተ ኩሽያፐ ዎ አካና። ሄ ዎደ ታን መና ጎዳ ግድያዋ ህንተ ሄዋን ኤራና። ታን ካዮያቤና ጽሎ አሳ ዎዛና ህንተ ዎርዱዋን ካዮዪታ፤ ናጋራንቻቱካ ባረንቱ ኢታ ኦሱዋፐ ስሚደ፥ ባረንቱ ሸምፑዋ አሸናዳን፥ ህንተ ኡንቱንታ ምንድታ። ሄዋ ድራዉ፥ ላኤን ዎርዶ ሳፃ በእክታ፤ ሙሩኑዋባካ ኦክታ። ታን ታ አሳ ህንተ ኩሽያፐ ዎ አካና። ሄ ዎደ ታን መና ጎዳ ግድያዋ ህንተ ሄዋን ኤራና” ያጌ’ ያጋ” ያጊደ ዬዳ።
Source notes (1)
- Cross-reference ኤር. 6:14፤ 8:11
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.