ከሳ 20

ታሙ አዛዛቱዋ

1ጾሳይ ሀ ቃላቱዋ ኡባ ሀዋዳን ያጊደ ሃሳዬዳ፤ 2“ኔና ግብጼፐ አይለተ ጋድያፐ ከሴዳ መና ጎዳይ ነ ጾሳይ ታና።

3“ታፐ አትና፥ ሀራ ጾሳዉ ጎይኖፓ።

4“ቦላ ሳሉዋን ደእያ፥ ዎይ ጋርሳ ሳኣን ደእያ፥ ዎይ ሳኣፐ ጋርሳን ሃ ግዶን ደእያ አያነ ማላትሳደ ነዉ ጎይንያ ምስለቱዋ ኦፓ።1 5ኡንቱንቶ ሆኮፓ ዎይ ኡንቱንቶ ጎይኖፓ። አያዉ ጎፐ፥ ታን፥ መና ጎዳይ ነ ጾሳይ ቃናታንቻ ጾሳ፤ ታና እጽያዋንታ አዎቱዋ ናጋራ ድራዉ፥ ናና ሄዘን የለታነ ኦይደን የለታ ጋካናዉ ሙርያዋ።2 6ቃይ ታና ሲቅያነ ታ አዛዙዋ ናግያዋንቶ ሻአ የለታይ ጋካናዉ ላመተና ሲቁዋ በስያ መና ጎዳ።

7“መና ጎዳ ነ ጾሳ ሱን ጮ ደንፓ፤ አያዉ ጎፐ፥ ጾሳይ ባረ ሱን ጮ ደንያዋ ሙራና።3

8“ጌሻ ኦደ፥ ሳምባታ ጋላሳ ናጋ።4 9ኔን ኦያ ኦሱዋ ኡባ ኡሱፑን ጋላሳቱዋን ኦ።5 10ሽን ላፑን ጋላሳይ መና ጎዳ ነ ጾሳዉ ሳምባታ። ሄ ጋላስ አይ ኦሱዋነ ኦፓ፤ ኔን፥ ዎይ ነ አቱማ ናአይ፥ ዎይ ነ ማጫ ናና፥ ዎይ ነ ማጫነ አቱማ ቆማቱ፥ ዎይ ነ ሚዛይ፥ ዎይ ህንተንቱና ደእያ እስራኤልያ ግደና አሳይ ሄ ጋላሳን አይ ኪታካ ኪተቶፖ። 11አያዉ ጎፐ፥ ኡሱፑን ጋላሳ ግዶን መና ጎዳይ ሳሉዋነ፥ ሳኣ፥ አባነ ኡንቱንቱ ግዶን ደእያ ኡባ መዳ፤ ሽን ላፑን ጋላሳን ሸምፔዳ። ሄዋ ድራዉ፥ መና ጎዳይ ሳምባታ ጋላሳ አንጄዳነ ጌሼዳ።6

12“መና ጎዳይ ነ ጾሳይ ነዉ እምያ ቢታን ነ ላይይ አዱቃና ማላ፥ ነ አባነ ነ ዳዮ ቦንቻ።7

13“አሳ ዎፓ።8

14“ዎሹሞፓ።9

15“ዉኦፓ።10

16“ነ ሾሩዋ ቦላን ዎርዱዋ ማርካቶፓ።11

17“ነ ሾሩዋ ጎልያ አሞቶፓ፤ ነ ሾሩዋ ማቻቶ፥ ዎይ አ ቆማ፥ ዎይ አ ቆማቶ፥ ዎይ አ ቦራ፥ ዎይ አ ሀርያ፥ ዎይ አዉ ደእያዋ አያነ አሞቶፓ” ያጌዳ።12

አሳ ያሻ

(ዛረ. 5:22-33)

18አሳይ ኡባይ ጉጉንይ ጉጉምያዋነ ዋልቃንይ ዎልቃምያዋ በኤዳ፤ ማላካታ ዋሱዋ ስሴዳ፤ ቃይ ደሪ ጩዋትያዋካ በኤዳ፤ አሳይ ያሻን ኮኮሪደ፥ ሃኩዋን ኤቄዳ።13 19ኡንቱንቱ ሙሳ፥ “ኔን ኑዉ ሃሳያ፤ ኑን ስሳና፤ ሽን ኑን ሀይቀናዳን፥ ጾሳይ ኑዉ ሃሳዮፖ” ያጌድኖ። 20ሙሴ አሳ፥ “ጾሳይ ህንተንታ ፓጫናዉ፥ ናጋራ ህንተንቱ ኦና ማላ፥ አ ያሻይ ህንተንቱ ዎዛናን ደአናዳን፥ እ ዬዳ ድራዉ ያዮፕተ” ያጌዳ። 21አሳይ ሃክ ኤቂደእሽን፥ ጾሳይ ደእያ ሳኣ ዎልቃማ ማኮ ሙሴ ሺቄዳ።

ያርሽያ ሳአቱዋን ጎኤትያ ዎጋቱዋ

22ሄዋፐ ጉይያን፥ መና ጎዳይ ሙሳ፥ “እስራኤልያ አሳዉ ሀዋዳን ያጋደ ኦዳ፤ ‘ታን ሳሉዋፐ ህንተንቶ ሃሳዬዳዋ ህንተንቱ ህንተንቱ ሁጲያዉ በኤድታ። 23ታ ማታን አይ ኤቃነ ኦፕተ፤ ብራ ኤቃ ዎይ ዎርቃ ኤቃ ህንተንቶ ኦፕተ።

24“ ‘ኔን ታዉ ያርሹዋ ያርሽያ ሳኣ ኡርቃፐ መደ ነ ጹግያ ያርሹዋ፥ ነ እትፐተ ያርሹዋ፥ ነ ዶርሳቱዋነ ነ ዴሻቱዋፐ ነ ሚዛቱዋ አ ቦላ ያርሻ። ታ ሱንይ ቆፈታና ማላ ኦዳ ሳኣ ኡባን፥ ታን ህንተንቱኮ ያደ፥ ህንተንታ አንጃና። 25ኔን ታዉ ያርሹዋ ያርሽያ ሳኣ ሹቻፐ መፐ፥ ማሰቴዳ ሹቻፐ መፓ፤ አያዉ ጎፐ፥ ኔን ማስያ ሚሻን አ ቦቾፐ፥ ነ አ ቱንሳሳ።14 26ታ ያርሹዋ ሳኣ ፑደ ጋይያን ከሶፓ፤ አያዉ ጎፐ፥ ኔን ከስያ ዎደ፥ ነ ካሉ ቤተ’ ያጋደ ኦዳ።