Dawro Full Bible Ethiopic
ከሳ 19
ህግያነ ቃላ ጫቁዋ
(19:1—24:18)
ጾሳይ ሲና ደርያን ቆንጬዳ
እስራኤልያ አሳይ ግብጼፐ ከሴዳ ሄዘን አግናን ሄ ኮይሮ ጋላሳን ሲና መላ ቢታ ጋኬድኖ። ኡንቱንቱ ራፊድመፐ ደንዲደ ሲና መላ ቢታ ቢደ፥ ሄዋን ደእያ ደርያ ስን መላ ቢታን ኡቴድኖ።
ሙሴ ጾሳኮ ፑደ ደርያ ሁጲያ ከስና፥ መና ጎዳይ ደርያ ሁጲያን አ ጼሲደ፥ “ኔን ያቆባፐ የለቴዳ እስራኤልያ አሳዉ ሀዋዳን ያጋደ ኦዳ፤ ‘ታን ግብጼቱዋ ቦላ አያ ኦድታንቶነ ቃይ አርጋን ቀፍያን ታን ህንተንታ ዋታ ቶካደ ታኮ አሃድታንቶነ ህንተንቱ ህንተንቱ ሁጲያዉ በኤድታ። ስም ሀእ ህንተንቱ ታዉ ሎይ አዛዘቶፐነ ታ ቃላ ጫቁዋ ናጎፐ፥ አሳ ኡባ ግዶን ህንተንቱ ታዉ ቡዞ ግዳና። ኩመን ሳአይ ታዋ ግዶፐነ12 ህንተንቱ ታ ካዉተ ቄሳቱዋነ ጌሻ አሳ ግዳና’ ያጋ፤ ኔን እስራኤላቶ ኦዳና ቃላይ ሀዋ” ያጌዳ።3
ሙሴ ጉየ ስም ቢደ፥ አሳ ካለያዋንታ ጼስ ሺሺደ፥ መና ጎዳይ ኦዳ ጌዳ ሀ ቃላቱዋ ኡባ ኡንቱንቶ ኦዴዳ። አሳይ ኡባይ እት ዶና ግዲደ፥ “መና ጎዳይ ጌዳዋ ኡባ ኑን ኦና” ያጌድኖ። ሙሴካ ኡንቱንቱ ጌዳዋ መና ጎዳኮ አፌዳ።
መና ጎዳይ ሙሳ፥ “ታን ኔናና ሃሳይሽን አሳይ ስሳናዳንነ ኡንቱንቱ ኔናን ኡባ ዎደካ አማነታናዳን፥ ታን ኔኮ ዎልቃማ ሻርያ ግዱዋና ያና” ያጌዳ። ሄዋፐ ጉይያን ሙሴ አሳይ ጌዳዋ መና ጎዳዉ ኦዴዳ።
መና ጎዳይ ሙሳ፥ “ኔን አሳኮ ባደ ሀቼነ ዎንት ኡንቱንቱ ጌያናዳን ኦዳ። ኡንቱንቱ ባረንቱ ማዩዋ ሜጪደ፤ ሄዘን ጋላሳዉ ጊግኖ። አያዉ ጎፐ፥ ሄዘን ጋላሳን አሳይ ኡባይ በእሽን፥ መና ጎዳይ ሲና ደርያ ቦላን ዎናዋ። ኔን ሀ ደርያ ዩሹዋን አሳዉ ዛዋ ዎደ ኡንቱንቶ፥ ‘ደርያ ፑደ ከሰናዳን ዎይ ደርያ ጻጱዋ ቦቼናዳን ህንተንታ ኤርተ። ደርያ ቦቼዳ ኦንነ ቱሙፐ ሀይቃናዋ።4 ሄ ኡራይ ሹቻን ጫደቲደ ዎይ ዎንዳፍያን ጫደቲደ ሀይቆፐ አትን፤ እ ኩሽያን ቦሸቶፖ። መሄ፥ ዎይ አሳ ግዶፐነ እ ሸምፑዋና አተና’ ያጋ። ማላካታይ ፑነትያ ዎደ፥ ሄ ዎደ ኡንቱንቱ ደርያ ፑደ ከሳና ጎፐ ከስኖ” ያጌዳ።
ሙሴ ደርያፐ አሳኮ ዱገ ዎዳዋፐ ጉይያን ኡንቱንታ ጌያናዳን ኦድና፥ ኡንቱንቱ ባረንቱ ማዩዋ ሜጬድኖ። ሄዋፐ ጉይያን አሳ እ፥ “ሄዘን ጋላሳዉ ጊግተ፤ ማችያና አቆፕተ” ያጌዳ።
ሄዘን ጋላስ ዎንታ ጉጉን ጉንይ ስሰቴዳ። ዋልቃንይነ ዎልቃማ ሻሪ ደርያ ማዪደ ቤቴዳ፤ ማላካታይካ ፑነትያ ዎልቃማ ኮሻይ ስሰቴዳ። ሄዋ ድራዉ፥ ባረ ደእያ ሳኣን አሳይ ኡባይ ኮኮሬዳ።56 ሄዋፐ ጉይያን ሙሴ አሳ ጾሳና ጋናዉ ኡንቱንቱ ደእያ ዱንካንያፐ ከሴዳ፤ ኡንቱንቱ ደርያ ጋርሳ ደምባን ኤቄድኖ። መና ጎዳይ ሲና ደርያ ቦላን ታማና ዎዳ ድራዉ፥ ሲና ደሪ ጩዋን ካመቴዳ። ዎልቃማ ጉዱዋፐ ጩዋይ ከስያዋዳን፥ አፐ ጩዋይ ፑደ ከሴዳ። አሳይ ኡባይ ሎይ ኮኮሬዳ። ማላካታ ፑኑ ሎይ ዳር ዳር ቤዳ ዎደ፥ ሙሴ ሃሳይና፥ ጾሳ ኮሻይ አዉ ዛሪደ ሃሳዬዳ። መና ጎዳይ ሲና ደርያ ኪክያን ዎደ፥ ሙሳ ፑደ ደርያዉ ኪክያ ጼስና ሙሴ ፑደ ከሴዳ። መና ጎዳይ አ፥ “ኔን ዱገ ባደ አሳይ መና ጎዳ በአና ጊደ፥ ዛዋ አናዳንነ ኡንቱንቱፐ ዳሩ ሀይቀናዳን አሳ ሴራ። ሀራይ አቶ መና ጎዳ ማታ ሺቅያ ቄሳቱካ ባረና ጌሻናዉ ኮሼ፤ ሄዌ ዮፐ፥ መና ጎዳይ ኡንቱንታ ሙራና” ያጌዳ።
ሙሴ መና ጎዳ፥ “አሳይ ደርያ ፑደ ያናዉ ዳንዳየና፤ አያዉ ጎፐ፥ ኔን ነ ሁጲያዉ፥ ‘ሀ ሳኣ ጌሻዳን ዱማዪደ፥ ሀ ደርያ ዩሹዋን ዛዋ ዎተ’ ጋደ ኑዉ ኦዳ ዎዳ” ያጌዳ።
መና ጎዳይ አ፥ “ኔን ዱገ ባደ አሮና ኔናና ፑደ አካደ ያ። ቄሳቱዋነ አሳ መና ጎዳይ ሙረናዳን፥ ኡንቱንቱ ዛዋ አደ ፑደ መና ጎዳኮ ዮፕኖ” ያጌዳ። ሄዋ ድራዉ፥ ሙሴ ዱገ አሳኮ ዎደ፥ ጾሳይ ጌዳዋ ኡንቱንቶ ኦዴዳ።
Source notes (6)
- Cross-reference ዛረ. 4:20፤ 7:6፤ 14:2፤ 26:18፤ ቲቶ 2:14
- Cross-reference 1 ጰጽ. 2:9
- Cross-reference ሳፃ 1:6፤ 5:10
- Cross-reference እብራ. 12:18-20
- Cross-reference ሳፃ 4:5
- Cross-reference ዛረ. 4:11-12
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.