ኤፈሶና 6

የሌዳዋንቱባነ የለቴዳ ናናቱዋባ

1ናቶ፥ ህንተና የሌዳዋንቶ ጎዳ ቦንችያዋዳን አዛዘትተ፤ አያዉ ጎፐ፥ ሀዌ ኦናዉ በስያዋ።1 2-3“ነዉ ኡባባይ ሎአናዳንነ ሳኣን ነ ላይይ አዱቃናዳን፥ ነ አዉዋነ ነ ዳዮ ቦንቻ” ግያ አዛዙ ጾሳይ እማና ጌዳ ህዶታና ደእያ ኮይሮ አዛዙዋ።2

4አዋቶ፥ ህንተ ህንተ ናናቱዋ ጎዳ ሴራንነ ዞርያን ድችተፐ አትን፥ ኡንቱንታ ሀንቀፕተ።3

ጎዳቱዋባነ አይላቱዋባ

5አይላቶ፥ ክርስቶሳዉ ኦያዋዳን፥ ህንተ ጎዳቶ ያሻተንነ ኮኮርሳን ሱረ ዎዛናፐ አዛዘትተ።4 6ጾሳይ ጌዳዋ ኦያዋንቱዳን፥ ክርስቶሳ አይላቱዋዳን፥ ዎዛናፐ ኦተፐ አትን፥ አሳ ናሸቻናዉ ኦያዋዳን፥ አሳይ በኦ ጊደ ኦፕተ። 7አሳዉ ግደናን ጎዳዉ ኦያዋዳን፥ በናን ዎዛናፐ ኦተ። 8አይለ ግድና ዎይ ዎማኑዋ ግድና፥ እ ኦያ ሎኦ ኦሶ ኡባዉ ጎዳይ ሁጲያን ሁጲያን ዎይታናዋ ኤሪታ።

9ጎዳቶ፥ ህንተ አይለቱዋ ናስያዋ አጊደ፥ ኡንቱንቶ ሄዋዳን ኦተ፤ ህንተናነ ኡንቱንታ ጋ ሞድያ ጎዳይ፥ ኦናነ ማድ ፕርደናዌ፥ ሳሉዋን ደእያዋ ኤሪታ።

ጾሳ ኦላ ሚሻቱዋባ

10ዉርሰን፥ ጎዳንነ አ ዎልቃማ ዎልቃን ኡባ ዎደ ምንተ። 11ጻላህያ ኢታ ጭሙዋ ተአናዉ ህንተ ዳንዳያና ማላ፥ ጾሳይ ህንተንቶ እምያ ኦላ ማዩዋ ኡባ ማይተ። 12አያዉ ጎፐ፥ ኑን ቦላ ሳሉዋ ደእያ ኢታ አያና ዎልቃቱዋና፥ ሞድያዋንቱና፥ ጎዳተይ ደእያዋንቱናነ ሀ ማ ቢታ ሞድያዋንቱና ኦለትያዋፐ አትን፥ አሳና ኦለቶኮ።

13ሄዋ ድራዉ፥ ኢታ ጋላሳን5 ተአናዉነ ቃይ ዉርሰይ ጋካናዉ ዋቶዋፐ ጉይያን፥ ምን ኤቃናዉ ህንተ ዳንዳያና ማላ፥ ጾሳ ኦላ ሚሻ ኡባ ኦይቂተ። 14-15ሄዋ ድራዉ፥ ጼሳን ሳቂያ ዳንጭያዋዳን ቱማተ ዳንጪደ፥ ትራን ዎያ ኦላ ሚሻዳን ጽሎተ ማዪደ፥ ህንተ ገድያን ጫማ ዎያዋዳን ሳሮተ ምሽራቹዋ ቃላ ኦዳናዉ ጊጊደ፥ ምን ኤቂተ።6 16ሄ ኡባፐ አደ፥ ጻላሂ የድያ ዎንዳፍያ ታማ ኡባ ቶይሳናዉ፥ አማኑዋ ኡባ ዎደ ጎንዳልያዳን ኦይቂተ። 17አቶተ ሁጲያን ዎያ ብራታ ቆብያዳን ዎተ፤ ቃይ ጌሻ አያና ማሻ ግዴዳ ጾሳ ቃላ ኦይቂተ።7 18ጾሳ ዎሲደነ አ ማዱዋ ኦቺደ፥ ኡባ ዎደ ጌሻ አያናን ጾሳ ዎስተ። ሄዋ ድራዉ፥ ምንተ፤ ሳለቶፕተ፤ ጌሻቱዋ ኡባዉ ጾሳ ኡባ ዎደ ዎስተ።

19ቃይ ታን ያየናን ዎንጋላ ጹራ ኦዳናዉ፥ ጾሳይ ታ ዶና ዶዪደ፥ ሃሳይያዋ እማናዳን፥ ታዉካ ጾሳ ዎስተ። 20ታን ሀእ ቃሹዋን ደኦፐካ፥ ሀ ዎንጋላ ድራዉ ታን ኪተቴዳዋ፤ ታን አባ ታዉ በስያዋዳን ያየናን ኦዳና ማላ፥ ታዉ ጾሳ ዎስተ።

ዉርሰ ሳሮታ

21ሽን ታን ዋና ደእንቶነ አያ ኦይታንቶ ህንተካ ኤራናዳን፥ ኑ ሲቆ እሻይ፥ ጎዳ ኦሱዋን አማነቴዳ ቆማይ ትክቆስ፥ ታዋ ኡባ ህንተንቶ ኦዳናዋ።89 22ኑን ኡባይ ዋን ደእንቶ ህንተንቶ ኦዲደ፥ ህንተና ምንሳና ማላ፥ ታን አ ህንተኮ ኪታድ።

23ጾሳ አዉዋፐነ ጎዳ የሱስ ክርስቶሳፐ ሳሮተይነ ሲቆተይ አማኑዋና እትፐ እሻቱዋ ኡባዉ ግዶ፤ 24ዶቼና ሲቁዋን ኑ ጎዳ የሱስ ክርስቶሳ ሲቅያ ኡባቱዋና ጾሳ አ ኬካተይ ግዶ። አመንእ።