ዛረዋ 27

ካናነ ገላናፐ ካሰቲደ እመቴዳ አዛዙዋ

(27:1—28:68)

ሹቻቱዋ ቦላ ጻፈቴዳ ህገቱዋ

1ሄዋፐ ጉይያን፥ ሙሴ እስራኤልያ ጭማቱዋና ግዲደ፥ አሳ ሀዋዳን ያጌዳ፤ “ታን ሀች ህንተና አዛዝያ አዛዙዋ ናግተ። 2ዮርዳኖሳ ሻፋ ፕኒደ፥ መና ጎዳይ ህንተ ጾሳይ ህንተንቶ እምያ ቢታ ገልያ ዎደ፥ ዎልቃማ ሹቻቱዋ ኤሲደ፥ ቦሹንቻን ኦክተ።1 3መና ጎዳይ ህንተ አዎቱዋ ጾሳይ ህንተንቶ እማና ጌዳዋዳን፥ ኤሳይነ ማይ ጎግያ ቢታ፥ መና ጎዳይ ህንተ ጾሳይ ህንተንቶ እምያ ቢታ ህንተ ፕንያ ዎደ፥ ሀ ህግያ ቃላቱዋ ኡባ ሄ ሹቻቱ ቦላ ጻፍተ። 4ህንተ ዮርዳኖሳ ፕኔዳ ዎደ፥ ታን ህንተና ሀች አዛዜዳዋዳን፥ ሀ ሹቻቱዋ ኤባላ ደርያ ቦላን ኤሲደ፥ ኡንቱንታ ቦሹንቻን ኦክተ። 5ሄ ሳኣን መና ጎዳዉ፥ ህንተ ጾሳዉ፥ ብራታ ሚሻይ ቦችቤና ሹቻፐ ያርሽያ ሳኣ ኦተ።2 6ሄ ህንተ መና ጎዳዉ፥ ህንተ ጾሳዉ፥ ያርሽያ ሳኣ ማሰትቤና ሹቻፐ ኦተ፤ ያቲደ ሄዋ ቦላን መና ጎዳዉ፥ ህንተ ጾሳዉ፥ ጹግያ ያርሹዋ ሺሽተ። 7እትፐተ ያርሹዋካ፥ ሄዋን ሚደ፥ መና ጎዳ ህንተ ጾሳ ስንን ናሸትተ። 8ሀ ህግያ ቃላቱዋ ኡባ ቆንጭያን ቤትያዋዳን ኦደ፥ ሀ ህንተ ኤሴዳ ሹቻቱ ቦላ ጻፍተ” ያጌዳ።

9ሙሴ ቃይካ ሌዊያ ግድያ ቄሳቱ ዋና እትፐ ግዲደ፥ እስራኤልያ አሳ ኡባዉ ሀዋዳን ያጌዳ፤ “ህንተኖ እስራኤልያ አሳዉ፥ ጮኡ ጊደ ስስተ! ሄኮ ሀች ህንተ መና ጎዳ ህንተ ጾሳ አሳ ግዴድታ። 10ሄዋ ድራዉ፥ ሀች ታን ህንተንቶ እምያ አዛዙዋነ አዋዩዋ ናግያዋን፥ መና ጎዳ ህንተ ጾሳ ቃላዉ አዛዘትተ” ያጌዳ።

አዛዘተናን እጽያዌ አህያ ሸቃ

11ሄ ጋላስካ ሙሴ አሳ ሀዋዳን ያጊደ አዛዜዳ፤ 12“ህንተ ዮርዳኖሳ ፕኔዳ ዎደ፥ ጋሪዛማ ደርያ ቦላ ኤቂደ አሳ አንጃናዋንታ: ስሞና፥ ሌዊያ፥ ይሁዳ፥ ይሳኮራ፥ ዮሴፎነ ቢንያማ ዛራቱዋ።3 13ቃይ አሳ ሸቃናዉ ኤባላ ደርያ ቦላ ኤቃናዋንቱ: ሮቤላ፥ ጋዳ፥ አሴራ፥ ዛብሎና፥ ዳናነ ንፍታሌማ ዛራቱዋ። 14ሌዋቱ ባረንቱ ቃላ ቁ ኦደ፥ እስራኤልያ አሳዉ ሀዋዳን ያግኖ።

15“ ‘መና ጎዳ ስንን ቱና ግዴዳዋ፥ ኩሽያ ሂላንቻይ ማሲደ ከሴዳ ም ግድና፥ ዎይ ብራታ ትጊደ መዳ ኤቃ ግድና፥ አዉ ጌማን ጎይንያ አሳይ ሸቀቴዳዋ ግዶ’ ያግና፥ አሳይ ኡባይ፥ ‘አመንእ!’ ያጎ።4

16“ ‘ባረ አዉዋ ዎይ ባረ ዳዮ ካዉሽያ አሳይ ሸቀቴዳዋ ግዶ’ ያግና፥ አሳይ ኡባይ፥ ‘አመንእ!’ ያጎ።5

17“ ‘ባረ ሾሩዋ ዛዋ ሱግያ አሳይ ሸቀቴዳዋ ግዶ’ ያግና፥ አሳይ ኡባይ፥ ‘አመንእ!’ ያጎ።6

18“ ‘ቆቃይ ባናዉ በስያ ኦግያፐ ባላሳ ዛርያ አሳይ ሸቀቴዳዋ ግዶ’ ያግና፥ አሳይ ኡባይ፥ ‘አመንእ!’ ያጎ።7

19“ ‘በትያ፥ አታ አዉ ባይና ናናቱዋ ፕርዳነ አምአት ፕርዳ ገላየዳ አሳይ ሸቀቴዳዋ ግዶ’ ያግና፥ አሳይ ኡባይ፥ ‘አመንእ’ ያጎ።8

20“ ‘ባረ አዉዋ ማቻትና ግሲደ፥ ባረ አዉዋ ቦንቹዋ ካዉሽያ አሳይ ሸቀቴዳዋ ግዶ’ ያግና፥ አሳይ ኡባይ፥ ‘አመንእ!’ ያጎ።9

21“ ‘አይ መህያናካ ግስያ አሳይ ሸቀቴዳዋ ግዶ’ ያግና፥ አሳይ ኡባይ፥ ‘አመንእ!’ ያጎ።10

22“ ‘ባረ ምቻቶ ግድያ፥ አዉዋ ናትና ግድና፥ ባረ ዳይ ናትና ግስያ አሳይ ሸቀቴዳዋ ግዶ’ ያግና፥ አሳይ ኡባይ፥ ‘አመንእ!’ ያጎ።11

23“ ‘ባረ ቦሎታትና ግስያ አሳይ ሸቀቴዳዋ ግዶ’ ያግና፥ አሳይ ኡባይ፥ ‘አመንእ!’ ያጎ።12

24“ ‘ባረ ሾሩዋ ጌማን ዎያ አሳይ ሸቀቴዳዋ ግዶ’ ያግና፥ አሳይ ኡባይ፥ ‘አመንእ!’ ያጎ።

25“ ‘ሻሉዋን ሻመቲደ፥ ጽሎ አሳ ዎያ አሳይ ሸቀቴዳዋ ግዶ’ ያግና፥ አሳይ ኡባይ፥ ‘አመንእ!’ ያጎ።

26“ ‘ሀ ህግያ ቃላቱዋ ፖሊደ ምንሰና አሳይ ሸቀቴዳዋ ግዶ’ ያግና፥13

“አሳይ ኡባይ ‘አመንእ!’ ” ያጎ።