Dawro Full Bible Ethiopic
ዛረዋ 26
ባይራ ካ ያርሹዋ
“መና ጎዳይ ህንተ ጾሳይ ህንተና ላትስያ ቢታ ገሊደ ኡትያ ዎደ፥ መና ጎዳይ ህንተ ጾሳይ ህንተንቶ እምያ ጋድያን ሞኬዳ ካ ኡባፐ ባይራትያዋ ቁንኣና መና ጎዳይ ህንተ ጾሳይ ባረ ሱንይ ሄዋን ጼሰታናዳን ዶሬዳ ሳአዉ አኪደ ቢተ።1 ያቲደ ሄ ዎድያን አዎትያ ቄስያኮ ቢደ፥ ሀዋዳን ያግተ፤ ‘መና ጎዳይ ኑ እማና ጊደ ካሰ ኑ ማይዛ አዋቶ ጫቄዳ ሳኣ ታና ገልሴዳ መና ጎዳዉ፥ ኑ ጾሳዉ፥ ሀች ታን ማርካታይ’ ያጎ።
“ያቶፐ ቄሲ ካይ ኩሜዳ ቁንኣ ነ ኩሽያፐ አኪደ፥ መና ጎዳዉ፥ ነ ጾሳዉ ያርሽያ ሳኣ ስንን ዎ። ሄዋፐ ጉይያን፥ መና ጎዳ ነ ጾሳ ስንን ሀዋዳን ያጋደ ሃሳያ፤ ‘ታ ማይዛ አዉ ደኢያሳ ዪደ መቶቴዳ ሶርያ ቢታ አሳ፤ እ መቶቲደ፥ ፓይዱዋን ጉ አሳቱዋና ግብጼ ዎደ ያን ደኤዳ። ሄዋን ደኢደ እ ዎልቃማ ዎልቃማነ ፓይዱዋን ጮራ ጋደ ከሴዳ። ሄዋ በኢደ፥ ግብጼቱ ኑዉ መቀ ኢቴድኖ፤ ኑና ኡንኤድኖ። ኑ ኦናዳን ዴጾ ኦሱዋ ኑ ቦላ ጫኔድኖ። ያትና፥ ኑን መና ጎዳዉ፥ ኑ አዎቱዋ ጾሳዉ፥ ዋሴዶ። መና ጎዳይ ኑ ዋሱዋ ስሴዳ፤ ኑ ኡንኡዋ፥ ኑ ዳቡራነ ኑ ኡቁና በኤዳ። መና ጎዳይ ባረ ዎልቃማ ኩሽያንነ ባረ ምጨቴዳ ቀስያን፥ ዎልቃማ ዳጋማን፥ ማላታንነ ማላልስያ ኦራባ ኦያዋን፥ ኑና ግብጼፐ ከሴዳ። ሀ ሳኣ ኑና አሂደ፥ ማነ ኤሳ ጎግያ ሀ ቢታ ኑዉ እሜዳ። ሄኮ ታን መና ጎዳይ እሜዳ ቢታ አይፍያፐ ኮይሩዋ አሃድ’ ያጋደ፥ ቁንኣ መና ጎዳ ነ ጾሳ ስንን ዎደ፥ አ ስንን ጎይና። ነዉነ ነ ሶ አሳዉ መና ጎዳይ ነ ጾሳይ እሜዳዋን ናሸቲደ፥ ጋላትተ፤ ሌዋቱነ ህንተ ግዶን ደእያ በተቱ ኡባይካ ህንተናና ናሸትኖ።
“አስራታ ከስያ ሄዛን ላይን ላይን ሞኬዳዋ ኡባፐ አስራታ ከሳደ ፖልያ ዎደ፥ ነ ካታማን ደእያ ሌዋቶ፥ በተቶ፥ አታ አዉ ባይናዋንቶነ አምኤቶ እማ፤ ያቶፐ ኡንቱንቱ ህንተ ካታማን ባረዉ ኮሽያ ካ ማናነ ካላና።2 ሄዋፐ ጉይያን መና ጎዳዉ፥ ነ ጾሳዉ፥ ሀዋዳን ያጋ፤ ‘ታን ታ ጎለፐ ጾሳዉ ዱማቴዳ ካ ከሳደ፥ ኔን ታና አዛዜዳ ነ አዛዙዋዳን ሌዋቶ፥ በተቶ፥ አታ አዉ ባይና ናናቶነ አምኤቶ እማድ። ታን ነ አዛዙዋፐ እቱዋነ መንበይከ፤ ቃይ እቱዋነ ዶጋ አጋበይከ። ታ ካዩዋ ዎደካ፥ ሄ አስራታፐ አይነ ማበይከ፤ ታን ዎጋን ጌሻ ግደና ዎደካ፥ አፐ ካረ ከሴዳዌካ ባዋ፤ ሀይቄዳ አሳዉካ አጫ ሄዋፐ ዎበይከ። ታን መና ጎዳዉ፥ ታ ጾሳዉ፥ አዛዘታድ፤ ቃይ ኔን ታና አዛዜዳዋ ኡባ ፖላድ። ኔን ደእያ ጌሻ ሳኣፐ፥ ሳሉዋፐ ሃ ዱገ ጼላ፤ ነ ደርያ እስራኤላነ ካሰ ኑ ማይዛ አዋቶ ነ እማና ጋደ ጫቄዳዋዳን ኑዉ እሜዳ ሀ ማይነ ኤሳይ ጎግያ ቢታ አንጃ’ ያጋ።
ጾሳዉ ዱማቴዳ አሳ
“ኔን ሀ አዋዮቱዋነ ዎጋቱዋ ናጋናዳን፥ መና ጎዳይ ነ ጾሳይ ኔና ሀች አዛዜዳ፤ ሄዋ ድራዉ፥ ኔን ኡንቱንታ ነ ኩመን ዎዛናፐነ ኩመን ሸምፑዋፐ ናጋ። መና ጎዳይ ነዉ ጾሳ ግዴዳዋ፥ ነ አ ኦግያን ሀመትያዋ፥ አ ዎጋ፥ አ አዛዙዋነ አ ህግያ ኔን ፖልያዋ ሀች ኤርሳዳ። ቃይ መና ጎዳይካ ባረ ገሌዳ ቃላዳን ኔን አ አሳ ግድያዋ፥ አዉ ቡዞ ሚሻ ግድያዋነ ኔን አ አዛዞ ኡባ ናጋናዋ ኤርሴዳ።3 ሄዋ ኔን ኦፐ፥ እ መዳ አሳ ኡባፐ ኔና ጋላታን፥ ሱንንነ ቦንቹዋን ዎልቃማ ጋደ ኦና መና ጎዳይ ገሌዳ ቃላዳን ኔንካ አዉ ጌሻ ጋደ ግዳናዋ ሀች ኤርሴዳ” ያጌዳ።
Source notes (3)
- Cross-reference ከሳ 23:19
- Cross-reference ዛረ. 14:28-29
- Cross-reference ከሳ 19:5፤ ዛረ. 4:20፤ 7:6፤ 14:2፤ ቲቶ 2:14፤ 1 ጰጽ. 2:9
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.