Skip to content
BibleKenya

Dawro Full Bible Ethiopic

ዛረዋ 11

አዛዘቱሳን ቤትያ አንጁዋ

“ስም መና ጎዳ ህንተ ጾሳ ሲቅተ፤ እ ህንተፐ ኮይያ አ አዋዮቱዋ፥ አ ህገቱዋነ አ አዛዞቱዋ፥ ኡባ ዎደ ናግተ። መና ጎዳ ሴራ ህንተ ኤሬዳዋ ኬና አባ ህንተ ታማሬዳዋ ኡባ ሀች ሀሳይተ፤ ሄዋ ኤርያዋንቱ ህንተናፐ አትና፥ ህንተ ናናቱዋ ግድክኖ፤ መና ጎዳ አንጋ፥ አ ዎልቃማ ኩሽያነ አ ምጨቴዳ ቀስያ፥ እ ኦዳ ማላታቱዋነ እ ግብጼ ካትያ ቦላነ አ ቢታ ኡባ ቦላ ኦዳዋ በኤድታ።1 ቃይ ኡንቱንቱ ህንተና ካሊደ የደርሴዳ ዎደ፥ መና ጎዳይ ግብጼ ቢታ ኦላንቻቱዋ፥ ኡንቱንቱ ፓራቱዋነ ፓራ ጋረቱዋ ዞኦ አባን ምትሲደ፥ ሀች ጋካናዉ፥ ኡንቱንታ ኡባና ይሴዳዋ በኤድታ።2 ህንተ ሀ ሳኣ ጋካናዉ፥ መላ ቢታን ጾሳይ ህንተንቶ ኦዳዋ ህንተ ኤሪታ። ቃይ ሮቤላ ዛርያፐ ኤልኣባ ናናቱዋ ግድያ ዳታና ቦላነ አቢራማ ቦላ ጾሳይ ኦዳዋ ሀሳይተ። እስራኤልያ አሳይ ኡባይ ጼልሽን፥ ቢታይ ዶየቲደ፥ ኡንቱንታ፥ ኡንቱንቱ ሶ አሳ፥ ኡንቱንቱ ዱንካንያነ ኡንቱንቶ ደእያ ሸምፑዋና ደእያዋ ኡባ ምቴዳ።3 ኤ! መና ጎዳይ ኦዳ ሀ ዎልቃማ ኦሶ ኡባ ህንተ አይፍያን በኤዳዋንቱ ህንተና።

እማና ጌዳ ቢታ አንጁዋ

“ሄዋ ድራዉ፥ ህንተ ምኖ ግዳናዳንነ ዮርዳኖሳ ፕኒደ ህንተ አካናዉ ብያ ቢታ ህንተ ላታናዳን፥ ታን ሀች ህንተና አዛዝያ አዛዙዋ ኡባ ናግተ። ያቶፐ፥ መና ጎዳይ ህንተ ማይዛ አዋቶነ ኡንቱንቱ ዛረቶ እማና ጊደ ጫቄዳ፥ ማይነ ኤሳይ ጎግያ ጋድያን ህንተ አዱሳ ላይ ደአና። ህንተ ላታናዉ ገልያ ቢታይ ህንተ ከሲደ ዬዳ ግብጼ ቢታ ማላ ግደና፤ ግብጼን ህንተ ካ ዘሪደ፥ ሾይቃ ኡባ አታክልትያ ሳኣዳን ገድያን ሃ ኡሺታ። ሽን ዮርዳኖሳ ፕኒደ ህንተ ላታናዉ ብያ፥ ቢታይ ዞዘቱነ ዛንጋራቱ ደእያ፥ ሳሉዋ እራን አልያ ቢታ። ሄ ቢታይ መና ጎዳይ ህንተ ጾሳይ ጾሞስያ ቢታ፤ ላይ ዶመፐ ቢደ ላይ ዉርሰ ጋካናዉ፥ መና ጎዳ ህንተ ጾሳ አይፊ አ ቦላን ደእያ ቢታ።

“ሄዋ ድራዉ፥ ህንተ መና ጎዳ ህንተ ጾሳ ሲቃናዳንነ ህንተ ህንተ ኩመን ዎዛናፐነ ህንተ ኩመን ሸምፑዋፐ አዉ ኦናዳን፥ ታን ህንተንቶ ሀች እምያ አዛዞቱዋ ህንተ ፖሎፐ፥4 ህንተ ካ፥ ዎይንያነ ዛይትያ ፓጨናን ሺሻና ማላ፥ ኦፍን እራነ ባልጉዋ እራ፥ አ ዎድያን ዎድያን ጾሳይ ህንተ ጋድያን ቡክሳና። ጾሳይ ህንተ መህያዉ ደምባን ማታ ዳርሳና። ቃይ ህንተካ ማናነ ካላና።

“ህንተ ዎዛናይ ባልና ዎራ ስሚደ፥ ህንተ ሀራ ጾሳቶ ኦናዳንነ ኡንቱንቶ ጎይነናዳን ናገትተ። ሄዌ ዮፐ፥ መና ጎዳ ሀንቁ ህንተ ቦላ ኤጽ ከሳና፤ እራይ ቡከናዳንነ ቢታይካ ሞከናዳን እ ሳሉዋ ጎርዳና፤ ህንተካ መና ጎዳይ ህንተንቶ እምያ ሎኦ ጋድያፐ ኤለካ ያና።

“ስም፥ ሀ አዛዞቱዋ ታዋንታ፥ ህንተ ዎዛናንነ ህንተ ቆፋን ዎተ። ማላታዳን ኡንቱንታ ህንተ ኩሽያን ቃችተ፤ ቃይ ማላታዳን ህንተ ሶምእያንካ ዎተ። ሄዋንታ ህንተ ናናቱዋካ ታማርስተ። ህንተ ሶን ደእያ ዎደ፥ ኦግያን ሀመትያ ዎደ፥ ግስያ ዎደነ ደንድያ ዎደካ፥ ኡንቱንቶ ኦድተ። ህንተ ፐንግያ ቆስለቱዋ ቦላንነ ህንተ ድርሳ ፐንግያ ቦላን ህንተ ኡንቱንታ ጻፍተ።5 ያቶፐ፥ መና ጎዳይ ህንተ ማይዛ አዋቶ እማና ጊደ ጫቄዳ ጋድያን ህንተ ላይይነ ህንተ ናናቱ ላይይ ሳኣፐ ቦላና ደእያ ሳሉ ደእያዋ ኬሻ ግዳናዋ።

“ህንተ መና ጎዳ ህንተ ጾሳ ሲቃናዳን፥ አ ኦገ ኡባን ሀመታናዳንነ አዉ አማነታናዳን፥ ታን ሀች ህንተንቶ እምያ አዛዞቱዋ ህንተ ምንሲደ ናጎፐ፥ መና ጎዳይ ሀ ካዉተቱዋ ኡባ ህንተ ስንፐ የደርሲደ ከሳና፤ ህንተካ ህንተፐ ግታትያነ ዎልቃምያ ካዉተቱዋ ቢታ ዎ አካና። ህንተ ገድያን ህንተ የዳ ቢታ ኡባይ ህንተሳ ግዳናዋ። ህንተ ዛዋይ መላ ቢታፐ ቢደ ሊባኖሳ ጋካናዉነ ኤፍራጺሳ ሻፋፐ ቢደ አዋይ ዉልያ ባጋ ሜድተራነ አባ ጋካናሳ ግዳናዋ።6 ህንተናና አይ አሳይነ ኤቀታናዉ ዳንዳየና፤ መና ጎዳይ ህንተ ጾሳይ ህንተንቶ ጌዳዋዳን፥ ህንተ ብያሳን ኡባን አሳይ ህንተና በኢደ ዳጋማናዳንነ ህንተዉ ያያናዳን ኦና።

“በእተ፥ ሀች ታን ህንተ ስንን አንጁዋነ ሸቃ ዎይ። ታን ሀች ህንተና አዛዝያ መና ጎዳ ህንተ ጾሳ አዛዞቱዋ ናጎፐ፥ ህንተ አንጀታና። ሽን ታን ህንተና ሀች አዛዝያ መና ጎዳ ህንተ ጾሳ አዛዞቱዋ ናገናን እጺደ፥ ህንተ ኤርቤና ሀራ ጾሳቶ ጎይናናዉ አ ኦግያፐ ዎራ ስሞፐ፥ ህንተ ሸቀታና። መና ጎዳይ ህንተ ጾሳይ ህንተ ላታናዉ ብያ ቢታ ህንተና ገልስያ ዎደ፥ ጋሪዛማ ደርያን አንጁዋ ኤባላ ደርያ ቦላን ሸቃ አዋያና።7 ሀ ላኡ ደረቱ ዮርዳኖሳ ሻፋፐ ሄፍንና ኦግያፐ አዋይ ዉልያ ባጋን፥ አራባን ደእያ ካናነቱዋ ጋድያን ደኢኖ፤ ኡንቱንቱ ቃይ ገልጋላ ካታማ ስንን ደእያ ሞረ ምዉካ ማታን ደኢኖ። ህንተ ሀእ መና ጎዳይ ህንተ ጾሳይ ህንተንቶ እምያ ቢታ ላታናዉ ዮርዳኖሳ ሻፋ ፕናና ሀኒታ። ህንተ ሄ ቢታ አኪደ ያን ደእያ ዎደ፥ ታን ሀች ህንተንቶ እምያ አዋዮቱዋነ ህገቱዋ ኡባ ምንሲደ ናግተ።

Source notes (7)
  1. Cross-reference ከሳ 7:8-13
  2. Cross-reference ከሳ 14:28
  3. Cross-reference ፓይ. 16:31-32
  4. Cross-reference ዎጋ 26:3-5፤ ዛረ. 7:12-16፤ 28:1-14
  5. Cross-reference ዛረ. 6:6-9
  6. Cross-reference ኢያሳ 1:3-5
  7. Cross-reference ዛረ. 27:11-14፤ ኢያሳ 8:33-35

Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.