Skip to content
BibleKenya

Dawro Full Bible Ethiopic

ዛረዋ 10

ሙሴ ታሙ አዛዞቱዋ ላኤንዋ አኬዳ

(ከሳ 34:1-10)

“ሄ ዎደ መና ጎዳይ ታና ሀዋዳን ያጌዳ፤ ‘ኮይሮዋንቱ ማላ ላኡ ማሰቴዳ ሹቻቱዋ ጊግሳ። ያታደ ታኮ ደርያ ሃ ፑደ ከሳ፤ ቃይ ም ታቦታካ መ። ካሰ ኔን መንዳ ማሰቴዳ ሹቻቱ ቦላ ደእያ ቃላቱዋ ሀ ማሰቴዳ ሹቻቱ ቦላ ታን ጻፋና፤ ኔንካ ኡንቱንታ ታቦታ ግዶን ዎሳ’ ያጌዳ።

“ታን ኦዶሩዋፐ ታቦታ መድ። ካሰዋንቱ ማላ ላኡ ማሰቴዳ ሹቻቱዋካ ጊግሳድ፤ ያታደ ሄ ላኡ ማሰቴዳ ሹቻቱዋ ታ ኩሽያን ኦይቃደ፥ ደርያ ፑደ ከሳድ። ህንተ ሺቁዋ ኦዳ ጋላስ፥ ደርያ ቦላን ታማ ግዶፐ መና ጎዳይ ህንተንቶ ኦዴዳ ቃላቱዋ፥ ሄዋንቱካ ታሙ አዛዞቱዋ፥ ካሰ ጻፌዳዋዳንካ ሀ ማሰቴዳ ሹቻቱ ቦላ መና ጎዳይ ጻፌዳ፤ ያቲደ እ ኡንቱንታ ታዉ እሜዳ። ሄዋፐ ጉይያን፥ ታን ደርያፐ ዱገ ዎደ፥ መና ጎዳይ ታና አዛዜዳዋዳን፥ ሄ ማሰቴዳ ሹቻቱዋ ታን መዳ ታቦታ ግዶን ዎድ፤ ሀእካ ኡንቱንቱ ያን ደኢኖ።

“እስራኤልያ አሳይ ያእቃና አሳቱ ሃ ኦላይ ደኢያሳፐ ደንዲደ፥ ሞሰር ቤድኖ። አሮን ያን ሀይቂደ ሞገቴዳ፤ አ ናአይ ኤልኣዛር አ ላቲደ፥ አ ሳኣን ቄስያ ከሴዳ።1 ኡንቱንቱ ሄዋፐ ጉድጎዳ ግያሳ ቤድኖ፤ ያፐ ቃይ ጎግያ ሃቱ ደእያ ቢታ ዮጽባታ ግያሳ ቤድኖ። ሄ ዎደ፥ መና ጎዳ ጫቁዋ ታቦታ ቶካና ማላ፥ መና ጎዳዉ ኦና ማላ፥ አ ስንን ኤቃና ማላነ፥ ሀች ጋካናዉካ ኡንቱንቱ ኦያዋዳን መና ጎዳ ሱንን አንጃና ማላ፥ ሌዊያ ዛራቱዋ መና ጎዳይ ባረዉ ዱማዬዳ።2 ሄዋ ድራዉ፥ ኡንቱንቱ እሻቱዋና ሻክና፥ ኡንቱንታ ጋክያባይ ዎይ ላታይ ሌዊያ ዛረቶ ባዋ፤ መና ጎዳይ ህንተ ጾሳይ ኡንቱንቶ ኦዴዳዋዳንካ፥ ኡንቱንቱ ላታይ መና ጎዳ።

“ታን ካሰዋዳንካ ኦይታሙ ጋላሳነ ኦይታሙ ቃማ ደርያ ቦላን ጋምኣድ፤ መና ጎዳይ ሀእካ ታ ዎሳ ስሲደ፥ ህንተና ይሳናዉ ኮይቤና።3 መና ጎዳይ ታና፥ ‘ታን እማና ጋደ ኡንቱንቱ አዋቶ ጫቃ ዎዳ ቢታ ኡንቱንቱ ገላናዳንነ ላታናዳን፥ ሀ አሳፐ ስንና ኡንቱንታ ካለ’ ያጌዳ።

ጾሳይ ኮይያዌ አዛዘትያዋ

“እስራኤልያ አሳዉ፥ መና ጎዳ ህንተ ጾሳይ ህንተፐ ኮይያዌ ሀዋ: መና ጎዳዉ፥ ህንተ ጾሳዉ፥ ያይተ፤ አ ኦግያን ኡባን ሀመትተ፤ አ ሲቅተ፤ ህንተ ኩመን ዎዛናፐነ ኩመን ሸምፑዋፐ መና ጎዳዉ፥ ህንተ ጾሳዉ ኦተ። ህንተዉ ሎአናዳን፥ ታን ሀች ህንተንቶ እምያ መና ጎዳ አዛዞቱዋነ አዋዮቱዋ ናግተ።

“ሳሉነ ሳሉዋፐ ቦላና ደእያ ሳሎቱ፥ ቃይ ሳአይነ ሳኣን ደእያ ኡባባቱ ጾሳ ህንተ መና ጎዳባቱዋ። ግዶፐነ መና ጎዳይ ህንተ ማይዛ አዎቱዋን ናሸቲደ፥ ኡንቱንታ ሲቄዳ፤ ቃይ ሀች ህንተ በእያዋዳን፥ ኡንቱንቱፐ ጉይያን ኡንቱንቱ ዘረቱዋ ግድያ ህንተና ካዉተቱዋ ኡባፐ ዶሬዳ። ሄዋ ድራዉ፥ ህንተ ዎዛና ሾኩዋ ቃጻርተ፤ ቃይ ሀዋፐ ስንናዉ ሞርግያ ዞዛ ግዶፕተ። አያዉ ጎፐ፥ መና ጎዳይ ህንተ ጾሳይ ጾሳቱዋ ጾሳነ ጎዳቱዋ ጎዳ። እ ዎልቃማ ጾሳ፤ እ ዎልቃማነ ያሽያ ጾሳ። እ ዴሙዋ ጼል ፕርደናዋነ ማጋንጻ አከናዋ።4 እ አዉ ባይና ናናቶነ አምኤቶ ኡንቱንቱ ፕርዳ ከሴ፤ በትያካ ሲቂደ፥ ቁማነ ማዩዋ አዉ እሜ። ህንተካ በተቱዋ ሲቅተ፤ አያዉ ጎፐ፥ ህንተ ህንተ ሁጲያዉካ በተ ግዲደ ግብጼን ደኤድታ። መና ጎዳዉ፥ ህንተ ጾሳዉ፥ ያይተ፤ አዉ ኦተ፤ አናና ኦይቀትተ፤ አ ሱንንካ ጫቂተ። ህንተ ህንተ አይፍያን በኤዳ ሄ ግታነ ያሽያ ማላልስያባቱዋ፥ ህንተንቶ ኦዳዌ እ ህንተ ጋላታቴ፤ ቃይ ህንተ ጾሳ። ግብጼ ቢታ ዎዳ ህንተ ማይዛ አዎቱ ኡባና ላፑን ታማ፤ ሀእ መና ጎዳይ ህንተ ጾሳይ ህንተና ሳሉዋ ጾልንተቱዋዳን ጮራዬዳ።5

Source notes (5)
  1. Cross-reference ፓይ. 20:28፤ 33:38
  2. Cross-reference ፓይ. 3:5-8
  3. Cross-reference ከሳ 34:28
  4. Cross-reference 1 ጽሞ. 6:15፤ ሳፃ 17:14፤ 19:16፤ ኪታ 10:34፤ ሮመ 2:11፤ ጋላ. 2:6፤ ኤፈ. 6:9
  5. Cross-reference ዶመ 15:5፤ 22:17፤ 46:27

Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.