ዳኔላ 5

ካትያ በልሻጻራነ ጎዳ ቦላ ጻፉዋ

(5:1-31)

1እት ጋላስ ካቲ በልሻጻር ባረ ኦሳንቻቱዋፐ እት ሻአቶ ግብራ ጊግሲደ ኡንቱንቱና እትፐ ዎይንያ ኤሳ ኡሼዳ። 2በልሻጻር ዎይንያ ኤሳ ኡሺደ ማቴዳ ዎደ፥ ባረ አዉ ናቡካዳናጾር የሩሳላመን ደእያ ጌሻ ጎልያፐ አሄዳ ዎርቃፐነ ብራፐ ኦሰቴዳ ኡሻ ሚሻቱዋ አሀና ማላ አዛዜዳ። አያዉ ጎፐ፥ እነ አ ኦሳንቻቱ፥ አ ማቼቱነ አ ባኮቱ ኡባይ ሄ ኡሻ ሚሻቱዋን ኤሳ ኡሻና ማላ፥ እ ኮዬዳ። 3ያትና፥ ኡንቱንቱ ሄ የሩሳላመን ደእያ ጾሳ ጌሻ ጎልያፐ አሄዳ ዎርቃፐ ኦሰቴዳ ኡሻ ሚሻቱዋ ካትያዉ አሄድኖ። ካቲ፥ አ ኦሳንቻቱ፥ አ ማቼቱነ አ ባኮቱ ሄ ሚሻቱዋን ትገቴዳ ዎይንያ ኤሳ ኡሼድኖ። 4ኡንቱንቱ ሄ ዎይንያ ኤሳ ኡሺደ፥ ዎርቃፐ ብራፐ፥ ናሃስያፐ፥ ብራታፐ፥ ምፐነ ሹቻፐ ኦሰቴዳ ጾሳቱዋ ጋላቴድኖ።

5ሄ ዎደ ቆፐናን ደእሽን፥ አሳ ኩሽያ ብራቱ ሀቃፐንቶ ከሲደ ዪደ፥ ካትያ ጎልያን ላሳነቴዳ ጎዳ ቦላን፥ ጾምፕያ ዎያ ባላ ስንን ጻፌዳ። ሄ ኩሺ ጻፍያ ዎደ፥ ካቲ ባረ ሁጲያን በኤዳ። 6አ ሶምኢ ላመቲደ፥ ብድን ማላቴዳ፤ ቃይ ያሻን አ ጋዲ ኮኮሬዳ፤ አ ጉልባታይካ እጼዳ።

7ካቲ ባረ ቃላ ቁ ኦደ፥ ሙሩንያዋንታ፥ ጾልንትያ ጼሊደ ካይያዋንታነ ሻሬቾቱዋ አሀናዳን አዛዜዳ። ኡንቱንቱ ዪና ባብሎነ አዳ ኤራንቻቱዋ ሀዋዳን ያጌዳ፤ “ሀ ጽፋትያ ናባቢደ፥ አ ብለ ታዉ ኦድያ ኡራይ ኦንነ፥ ኦቻ ቴራ ማላትያ ማዩዋ ማያና፤ አ ቆያን ዎርቃ ሀብልያ አና፤ ቃይ እ ታ ካዉተ ሞድያ ሄዘን አሳ ግዳናዋ” ያጌዳ።

8ሄዋፐ ጉይያን፥ ካትያ ዞርያዋንቱ ኡባይ አ ስን አድኖ፤ ሽን ኡንቱንቱፐ ኦንነ ሄ ጽፋትያ ናባባናዉ፥ ዎይ አ ብለ ኦዳናዉ ዳንዳይቤና። 9ሄዋን ካቲ በልሻጻር ካሰዋፐ አ ዳጋምና፥ አ ሶምኢካ ካሰዋፐ አ ብድን ማላቴዳ። አ ካፓቱካ ሀንያዋ ዬድኖ።

10ካቲነ አ ካፓቱ ጫቡዋ አ ዳያ ካታታ ስሳደ፥ ኡንቱንቱ ግብራ ምያ አኮ ጎልያ ገላደ፥ ሀዋዳን ያጋዱ፤ “ካትያዉ፥ መናዉ ደአ! ሀ ቆፋን ሎይ ሻባረቶፓ፤ ነ ሶምኢካ ላመቶፖ። 11ጌሻ ጾሳቱዋ አያናይ አን ደእያ እት አሳይ ነ ካዉተ ግዶን ደኤ። ኤራይ፥ አኬካይነ ጾሳቱዋ ማላ አዳ ኤራተይ አን ደኤ። ካሰ ነ አዉ ካቲ ናቡካዳናጾር አ ሻሬቾቶ፥ ሙሩንያዋንቶ፥ ጾልንትያ ጼሊደ ካይያዋንቶነ አያንትያዋንቶ ካፑዋ ኦደ ሱንዳ። 12አያዉ ጎፐ፥ አዉ ሎኦ አያናይ፥ ኤራይነ አኬካይ ደኤ፤ አኩሙዋ ብላናዉ፥ ቃንእሽያ ኦዳናዉነ ጹራ ቆንጭሳናዉ እ ዳንዳዬ። ሄዋ ድራዉ፥ ካቲ ብልጻሶራ ጊደ ሱንዳ ዳኔላ ጼሳ። እ ነዉ ጽፋትያ ብለ ኦዳና” ያጋዱ።

ዳኔል ጽፋትያ ብሌዳ

13ሄ ዎደ ዳኔላ ካትያኮ አህና፥ ካቲ አ ሀዋዳን ያጌዳ፤ “ኔን ዳኔሌ? ታ አዉ ካቲ ይሁዳፐ ኦሞዲደ አሄዳዋንቱፐ እቱዋ ግያዌ ኔኔ? 14ጾሳቱዋ አያናይ ኔናን ደእያዋነ ኤራይ፥ አኬካይነ ሎይ አዳ ኤራተይ ነዉ ደእያዋ ታን ስሳድ። 15ሀ ጽፋትያ ናባባናዉነ አ ብለ ታዉ ኦዳናዉ ሙሩንያዋንቱነ ካትያ ዞርያዋንቱ ዬድኖ፤ ሽን ኡንቱንቱ ብለ ታዉ ኦዳናዉ ዳንዳይበይክኖ። 16ኔን ብለ ኦዳናዉነ ዴጾ ኦሻቱዋ ዛሩዋ እማናዉ ዳንዳይያዋ ታን ስሳድ። ሀእ ስም ኔን ሀ ጽፋትያ ናባባናዉነ አ ብለ ታዉ ኦዳናዉ ዳንዳዮፐ፥ ኦቻ ቴራ ማላትያ ማዩዋ ማያና፤ ነ ቆያን ዎርቃ ሀብሊ አና፤ ቃይ ኔን ካዉተ ሞድያ ሄዘን አሳ ግዳናሳ” ያጌዳ።

17ዳኔል ካትያዉ ዛሪደ፥ “ኔን እምያ እሙ ኔሳ ግዶ፤ ነ ዎይቱዋካ ሀራ ኡራዉ እማ። ሀኖፐነ ታን ጽፋትያ ካትያዉ ናባባና፤ ብለካ ኦዳና።

18“ካትያዉ፥ ኡባፐ ቂያ ጾሳይ ነ አዉዋ ናቡካዳናጾራዉ ካተቱዋ፥ ግታተ፥ ቦንቹዋነ አንጋ እሜዳ። 19እ አዉ እሜዳ ግታተ ጋሱዋን ሄ አሳቱነ ዱማ ዱማ ቃላ ሃሳይያ ዛራቱ አዉ ያዬድኖነ ኮኮሬድኖ። ባረ ዎናዉ ኮይያዋ ዎዳ፤ አሻናዉ ኮይያዋካ አሼዳ፤ ባረ ቂሳናዉ ኮዬዳዋካ ቂሴዳ፤ ካዉሻናዉ ኮዬዳዋካ ካዉሼዳ። 20ሽን እ ኦቶረቴዳ ዎደነ አ ዎዛናይ ሙሜዳ ዎደ፥ ባረ ካዉተ አራታፐ ዎዳ፤ አ ቦንቹካ ቃረቴዳ። 21አሳ ግዶፐ የደርሰቴዳ፤ አ ዎዛናይ ካሀይካ ላመትና፥ ዶኣ ማላ ግዴዳ። ቦራዳን ማታ ሚደ፥ ደምባ ሀረቱዋና እትፐ ደኤዳ። አ ቦላይካ ሳሉዋፐ ዎያ ከተርሳን ጽርክኬዳ። ሄዌካ ኡባፐ ቂያ ጾሳይ አሳ ናናቱ ካዉተ ኡባ ሞድያዋነ እ ባረ ኮዬዳ ኡራዉ እምያዋ እ ኤራና ጋካናሳ።

22“ሽን ነኖ፥ በልሻጻራ፥ ኔን አ ናአይ ሄ ኡባ ኤራደካ፥ ነ ሁጲያ ዝቂ ኦባካ። 23ቃይ ሳሉዋ ጎዳ ቦላን ኦቶረታደ፥ ነ ሁጲያ ቁ ቁ ኦዳ። አ ጌሻ ጎልያፐ ቦንቂያን ዬዳ ዎርቃ ሚሻቱዋ ኔን አህስና፥ ነ ኦሳንቻቱ፥ ነ ማቼቱነ ነ ባኮቱ ዎይንያ ኤሳ ኡንቱንቱን ኡሼድኖ። ቃይ ጼላናዉ፥ ስሳናዉነ ኤራናዉ ዳንዳየና ጾሳቱዋ፥ ብራፐ፥ ዎርቃፐ፥ ናሃስያፐ፥ ብራታፐ፥ ምፐነ ሹቻፐ ኦሰቴዳዋንታ ጋላታዳ። ነ ሸምፑዋነ ነ ገላ ከሳ ባረ ኩሽያን ኦይቄዳ ጾሳ ቦንቻበይካ። 24ሄዋ ድራዉ፥ ሀ ኩሽያ ብራቱ አፐ ኪተትና፥ ሀ ጽፋቲ ጻፈቴዳ።

25“ጻፉካ፥ ‘ማነ፥ ማነ፥ ተቀል፥ ፓሬስ’ ያግያዋ። 26አ ብለይካ ሀዋ፦

“ማነ ግያዌ፥ ጾሳይ ነ ካተተ ላይ ፓይዲደ፥

ዉራናዳን ኦዳ ግያዋ።

27ተቀል ግያዌ ሚዛናን ልከታደ፥

ካዉሻደ ቤታዳ ግያዋ።

28ፓሬስ ግያዌ ነ ካዉተይ ሻከቲደ፥

ሜዶናቶነ ፓርሰቶ እመቴዳ ግያዋ” ያጌዳ።

29ሄዋፐ ጉይያን፥ በልሻጻር አዛዝና፥ ኦቻ ቴራ ማላትያ ማዩዋ ዳኔላ ማይዜድኖ፤ አ ቆያንካ ዎርቃ ሀብልያ አድኖ፤ ቃይ ካዉተ ሞድያ ሄዘን አሳ ግዳናዳን አዋዬድኖ።1

30ሄ ጋላስ ቃማ ሞርከቱ ገሊደ፥ ባብሎነ ካትያ በልሻጻራ ዎድኖ። 31አ ካዉተ ሜዶንያ ዳርዮሰ አኬዳ። ሄ ዎደ ዳርዮሳዉ ላይይ ኡሱፑን ታማነ ላአ።