ቆላስያሳ 2

1ታን ህንተንቶነ ሎዶቅያ ግያ ካታማን ደእያ አሳቶነ ቃይ ታና በእቤና አማንያዋንቶ ኡባቶ አይ ኬና ባጸታድታንቶ ህንተንቱ ኤራና ማላ ኮያይ። 2ኡንቱንቱ ዎዛናይ ምናና ማላ፥ ሲቁዋን እትፐ ግዲደ፥ ቱሙ አኬካን ቤትያ ዱረተ ኡባ ኡንቱንቱ አካና ማላነ ቃይ ኡንቱንቱ ጾሳይ አሳዉ ቆንጭስቤናዋ፥ ክርስቶሳ አ ሁጰዉ ኤራና ማላ፥ ታን ዳቡራይ። 3ጌማን ጾሳይ ምንጄዳ ኤራይነ አዳ ኤራተይ ኡባይ አን ደኤ።

4ኦንነ ህንተንታ ጭምያ ቃላን ባለና ማላ፥ ታን ህንተንታ ሀሳይሳይ። 5አያዉ ጎፐ፥ ታን ህንተንቱ ማታፐ ሃካደ ደኦፐካ፥ አያናን ህንተንቱና ደአይ፤ ህንተንቱ ደእያ ማራነ ክርስቶሳ ህንተንቱ ምኒደ አማንያዋ በኣደ ናሸታይ።

ክርስቶሳን ቤትያ ኩመን ደኡዋ

6ስም ህንተንቱ ጎዳ ክርስቶስ የሱሳ አኬዳዋዳን፥ አን ደእተ። 7አን ጻጱዋ የዲደ ድጭተ፤ ህንተንቱ ታማሬዳዋዳን አማኑዋን ምንተ፤ ጾሳ ኡባ ዎደ ጋላትተ።

8ክርስቶሳፐ ግደና ትምርትያን፥ ሀ ሳኣ ሞድያ አያናቱዋ ትምርትያንነ፥ አሳፐ ዬዳ ኤራተን፥ ቃይ መላ ጭሙዋን ህንተንታ ኦንነ ኦሞደና ማላ ናገትተ። 9አያዉ ጎፐ፥ ክርስቶሳ አሳተ ቦላን ጾሳተ መታ ኩመንይ ደኤ። 10ቃይ ኡባ አያናቱዋ ካፖተዉነ ጎዳተዉ ኡባዉ ሁጰ ግድያ ክርስቶሳፐ ኩመን ደኡዋ ደሜድታ።

11ህንተንቱ ክርስቶሳና እት አሳ ማላ ግዲደ፥ አሳ ቃጻራ ማላ ግደናን፥ ህንተንቱ ናጋራንቻ መታ ድግያ ቃጻራ፥ ሀዌካ አሹዋ ቃጻራ ግደናን ክርስቶስ ኦዳዋ። 12ህንተንቱ ጻማቀቴዳ ዎደ፥ ክርስቶሳና ሞገቲደ፥ ክርስቶሳ ሀይቁዋፐ ደንዳ ጾሳ ዎልቃ አማኔዳ ድራዉ፥ ኦራ ደኦ ጽንቃታን ክርስቶሳና እትፐ ደንዴድታ።

13ህንተንቱ ህንተንቱ ናቁዋንነ ህንተንቱ ኤጫ አሳተ ቃጻረተናን አጌዳዋን ሀይቂደ ደእያ ዎደ፥ ጾሳይ ህንተንቱ ናቁዋ አቶ ጊደ፥ ክርስቶሳና ህንተንታ ፓጻ ዎዳ። 14ኑና እጽያ፥ አጩዋ ፓራማ አ ጫቁዋና እትፐ ጾሳይ ዳኬዳ፤ ማስቃልያ ቦላን ሺደ፥ ኦግያፐ ድጌዳ። 15ክርስቶስ ሄ ማስቃልያን ካፓቱዋፐነ ጎዳቱዋፐ ዎልቃ ዎ አኪደ፥ ባረ ጾኑዋነ ኦሞደቴዳዋንታ ቆንጭያን በሴዳ።

16ሄዋ ድራዉ፥ ሙሳን ዎይ ኡሻን፥ ባላ ጋላሳ ዎይ አገናይ ጼርያ ዎድያ ቦንችያዋን፥ ዎይ ሳምባታ ቦንችያዋን፥ ኦንነ ህንተንቱ ቦላ ፕርዶፖ። 17ሀዋንቱ ስንፐ ያና የዋቶ ኤሹዋ፤ ሽን ቱማተይ ክርስቶሳዋ። 18ዎርዱዋ አሽከ ማላታናዉነ ኪታንቻዉ ጎይናናዉ ኮይያዌ፥ በእቤናዋ ሳጻን በኣድ ጊደ ኦቶረትያዌ፥ አሳተ ቆፋን ጮ አይያዌ፥ ኦንነ ህንተንቱ ቦላ ፕርዶፖ። 19ሄዋ ማላ አሳይ ሁጰ ግድያ ክርስቶሳ ምንስ ኦይቄዳዋ ለፕሴ። ቦላ ኡባይ ሄ ሁጲያፐ ዎልቃ ደሚደ፥ ቦላን ደእያ ኩርያናነ ጻጱዋና እትፐ ኦይቀቲደ፥ ጾሳይ ድችያ ድሹዋዳን ድጬ።

ሀይቁዋንካ ፓጻንካ ክርስቶሳና ደእያዋ

20-21ህንተንቱ ሀ ሳኣ ሞድያ አያናቱዋፐ ሃኪደ፥ ክርስቶሳና ሀይቄድታ፤ ያትና፥ አያዉ ሀ ሳኣ ዎጋን ደእያ አሳዳን ደኢቴ? “ኦይቆፓ፤ ባራ በኦፓ፤ ቦቾፓ” ያግያ ህገቶ አያዉ አዛዘቲቴ? 22ሀ ኡባባይካ አሳይ መዳ ህገነ ትምርተ ግድያ ድራዉ፥ ዎድያፐ ጉይያን ያና። 23ኡንቱንቱ ኪታንቻዉ ጎይንያዋንነ ዎርዱዋ አሽከ ማላትያዋን ቃይ ባረንቱ አሳተ ግልቂስያዋን አዳ ኤራንቻ ማላቲኖ፤ ሽን አሹዋ አሙዋ ድጋናዉ ጎኤና።