ቆላስያሳ

ጳዉሎስ

ቆላስያሳ አሳዉ

ጻፌዳ ኪታ

ገሉዋ

ጳዉሎስ ቆላስያሳ አሳዉ ጻፌዳ ኪታይ ጻፈቴዳዌ፥ ኤፈሶነ አሳዉ ጻፈቴዳ ኪታና እት ዎድያና ማላቴ። ሄዌካ ቄር ኢስያን፥ ኤፈሶነፐ አዋይ ዶልያ ባጋና ቤትያ ቆላስያሳን ደእያ አማንያ አሳቱዋሳ ግዲደ ላኡዋ ግዶን ደእያ ዱማተይ፥ ቆላስያሳ አሳዉ ጻፈቴዳ ኪታይ ክርስቶስ መታ ኡባዉ ሁጰ ግድያዋ በስያ ዎደ ኤፈሶና አሳዉ ጻፈቴዳ ኪታይ ቃይ ክርስቶስ ዎሳ ጎለዉ ሁጰ ግድያዋ በሴ። ሀ አሳቶ ቃላ ማርካቴዳዌ ጳዉሎሳ ግዳና ዮፐካ፥ ሮመ ጋድያን፥ ኢስያ ዋና ካታማ ግድያ ኤፈሶነፐ ኡንቱንቶ ኦያ አሳቱዋ ኪትያዌ አ ግድያ ድራዉ፥ ቆላስያሳዉካ አዎትያ ሀኖታይ አዉ ደኤ። ቆላስያሳ አማንያዋንቱ ግዶን፥ “ጾሳ ኤራናዉነ ኩመን አቶተ ደማናዉ፥ አሳይ ኡባይ አያና ዎልቃቶነ ማታይ ደእያዋንቶ ጎይናናዉ ኮሼ” ያግያ ዎርዶ አስታማራቱ ደእያዋ ጳዉሎስ ስሴዳ። ሀ አስታማራቱ ሀራባ ቃይ፥ “አሳይ ኡባይካ ቃጻራ ማላትያ ዎጋቶ ሞደታናዉነ ቁማ ዎጋነ ሀራ ዎጋቱዋ ኡባ ናጋናዉ ኮሼ” ያጊኖ።

ጳዉሎስ ሀ ኪታ ጻፌዳዌ ቱማንቻ ግድያ ክርስትና ኪታ ኦድያዋን፥ ኡንቱንቱ ዎርዶ ትምርትያ ጳልቃናሳ። እ ዛሬዳ ዛሩዋፐ ዋናትያዌ “የሱስ ክርስቶስ ኩመን አቶተ እማናዉ ዳንዳዬ፤ ሀ ሀራ አማናቱነ ኦሳቱ አፐ ሃሳናዉ ዳንዳዪኖ” ያግያዋ። ጾሳይ ክርስቶሳ ባጋና ሀ አላምያ መዳ። ቃይ አ ባጋና ዛሪደ አ ባረኮ አሀና። ሀ አላምያዉ ክርስቶሳ ዎዛናፐ አማንያዋ ጻላላን አቶተ ህዶታይ ደኤ። ሀዋ ማራን ጳዉሎስ ሀ ዎልቃማ ትምርቲ አማንያ አሳ ደኡዋን ዋኒደ ኦሱዋን ፔሻናዉ ዳንዳይንቶ ኦዴ።

ሀ ኪታ ጳዉሎሳፐ አኪደ፥ ቆላስያሳ ጋናዉ ኪተቴዳ ቲኪቆሳና እትፐ ቤዳዌ አናስሞሳ ግድያዋ በእያዌ ጎእያዋ። ዋኒደ ጎፐ፥ ጳዉሎስ ሀ አናስሞሳ ጌተትያ ባረ ኦሳንቻባ ደንደ፥ ፕልሞናዉ ሀራ ኪታ ጻፌዳ።

ሸምፓቱዋ ኡባቶ እመቴዳ ቃን ቆፋቱዋ

ገሉዋ

ክርስቶሳ ኤሻነ ኦሱዋ

የሱሳን ቤትያ ኦራ ደኡዋ

ዉርሰ ቁትያ