አሞጻ 3

1ህንተኖ እስራኤልያ አሳቶ፥ መና ጎዳይ ህንተ ቦላ፥ ግብጼ ጋድያፐ እ ከሴዳ አሳ ኡባ ቦላ ሃሳዬዳዋ ስስተ። 2“ሳኣን ደእያ አሳ ኡባፐ ታን ህንተ ጻላላ ዶራድ። ሄዋ ድራዉ፥ ህንተ ኦዳ ናጋራ ኡባዉ ታን ህንተና ሙራና” ያጌ።

እስራኤልያነ ሳማርያ ባሻ

(3:3—6:14)

3ላኡ አሳቱ ቆፋይ እታ ግደናን ደኢደ እትፐ ሀመቲኖ?

4ጋሙ ኦይቂያዋ ደመናን ዎራን ጮ ጉዲየ? ዎይ ዎዳላ ጋሙ አየንቶ የደርሲደ ኦይቀናን ባረ ጌሱዋን ዳሪየ?

5ኦይቃናዉ የጌዳ ግትያ ግዶን ካይ ዮፐ፥ ካፉ ጮ ኦይቀቲ? ዎይ ጲሪ አየንቶ ኦይቂያባይ ባይናን ጮ ፕሪ?

6ካታማ ግዶን ኦላ ማላካታይ ፑነትያ ዎደ፥ አሳይ ያሻን ኮኮረኔየ? ዎይ መና ጎዳይ ኪተናን ደእሽን፥ ባሻይ እት ካታማ ቦላን ዪየ?

7ቱሙዋፐ ኡባ ሞድያ መና ጎዳይ ባረ ጹራ ትምቢትያ ኦድያ ባረ ቆማቶ ካሰቲደ ቆንጭሰናን ደኢደ፥ አያነ ኦና።

8ጋሙ ጉድና፥ ያየናዌ ኦኔ? ኡባ ሞድያ መና ጎዳይ ኦድና፥ ትምቢትያ ኦደናዌ ኦኔ?

ሳማርያ ኩንደ

9አሽዶዳ ካታማንነ ግብጼ ካትያ ጎለቱዋን ደእያ ኡባቶ ሀዋዳን ያጊደ አዋይተ፤ “ሳማርያ ደረቱዋ ቦላ ሺቅተ፤ ሺቂደ ያን ሀንያ ዎልቃማ ዋጨነ ሱገ ኦሱዋ በእተ” ያግተ።

10መና ጎዳይ ሀዋዳን ያጌ፤ “ሀ አሳቱ ሱረባ ኦያዋ ኤርክኖ፤ ሱገንነ ቦንቂደ አሄዳ ሻሉዋን ባረንቱ ጎልያ ኩን ዎድኖ” ያጌ። 11ሄዋ ድራዉ፥ ኡባ ሞድያ ጾሳይ ሀዋዳን ያጌ፤ “ሞርኪ ህንተ ቢታ ዶዳና፤ ህንተ ጌሱዋ ላላና፤ ህንተ ዱረቱዋ ጎልያካ ቦንቃና” ያጌ።

12መና ጎዳይ ሀዋዳን ያጌ፤ “ሄንንቻይ ጋሙዋ ዶናፐ ዶርሳ ዎ አክያ ዎደ፥ ዶርሳዉ ላኡ ገደቱዋ ዎይ ዱጻ ሀይ ዎ አክያዋዳን፥ ሄዋዳንካ ሳማርያ ጋድያን እሻሉዋን ኡቴዳ እስራኤልያ አሳፐ አማሬዳዋንቱ ጻላላይ አታና” ያጌ።

13መና ጎዳይ፥ ኡባፐ ዎልቃማ ጾሳይ መና ጎዳይ ሀዋዳን ያጌ፤ “ሀዋ ስስተ፤ ያቆባ ዛራቱዋ ቦላ ማርካትተ። 14ታን እስራኤልያ አሳ ኡንቱንቱ ናጋራ ድራዉ ሙሪያ ጋላስ፥ ቤቴለ ካታማን ደእያ ያርሽያ ሳኣ ኮላና፤ ያርሽያ ሳኣን ደእያ ካጨቱካ መኢደ፥ ሳኣን ዎና።1 15ባልጉዋን ኡንቱንቱ ደእያ ጎልያነ ቦንያን ኡንቱንቱ ደእያ ጎልያ ኡባ ታን ይሳና። ዳንጋርሳ ዛልያን አሌቂሲደ፥ ኡንቱንቱ ኬጼዳ ጎሊካ ኮለታና፤ ቃይ ዎልቃማ ዎልቃማ ጎለቱ ኡባይካ ያና” ያጌ መና ጎዳይ።