አሞጻ 1

አሳ ዘረ ኡባይ ባረ ዎንጃላን ኦሸትያዋ

(1:1—3:2)

1ኦዝያነ ይሁዳ ጋድያን ካትያ፥ ቃይ ዮኣሻ ናአይ እዮርባም እስራኤልያ ጋድያን ካትያ ግዲደ ደኤዳ ላይን ታቆአ ጋድያን ዶርሳ ሄምያዋንቱፐ እቱ አሞጽ፥ ቢታይ ቃጻናፐ ላኡ ላይፐ ካሰ እስራኤልያባ በኤዳ ሳጻይ ሀዋ።1

2እ ሀዋዳን ያጌዳ፤2 “መና ጎዳይ ጽዮነ ደርያን ጉዴ፤ የሩሳላመ ካታማንካ ባረ ኮሻ ስሴ። ሄንንቻቱ መህያ ሄምያ ሄን ጋደቱ መሊኖ፤ ቃርመሎሳ ደርያ ሁጲያን ደእያ እርጻይካ ሹሌ” ያጌዳ።

እስራኤልያ ዩሹዋን ደእያ ጋደቱዋ ቦላን ጾሳይ ፕርድያ ፕርዳ

ሶርያ

3መና ጎዳይ ሀዋዳን ያጌ፤ “ዳማስቆ አሳይ ዛር ዛሪደ ኦዳ ናጋራ ድራዉ፥ ታን ኡንቱንታ ሙረናን አግከ። አያዉ ጎፐ፥ ኡንቱንቱ ጋላኣደ ቢታ አሳ ብራታ አቻና ደእያ ጋርያን የሲደ ቆጼድኖ።3 4ሄዋ ድራዉ፥ ታን ካትያ ሀዛኤላ ጎልያን ታማ የዳና፤ የድና ሄ ታማይ ካትያ በንሀዳዳ ጌሱዋካ ማና። 5ታን ዳማስቆ ካታማ ፐንግያ ኩልቡዋ መንና፤ አዌና ዛንጋራን ደእያ አሳ የደርሳናነ ካተቱዋ ጻምኣ ኦይቄዳዋካ ቤት-ኤዴናፐ ይሳና፤ ቃይ ሶርያ ጋድያ አሳይካ ኦሞደቲደ፥ ቂራ ግያሳ ባና” ያጌ መና ጎዳይ።

ፕልስጼማ

6መና ጎዳይ ሀዋዳን ያጌ፤ “ጋዛ ካታማ አሳይ ዛር ዛሪደ ኦዳ ናጋራ ድራዉ፥ ታን ኡንቱንታ ሙረናን አግከ። አያዉ ጎፐ፥ ኡንቱንቱ ጋድያን ደእያ አሳ ኡባ ኦሞዲደ፥ ኤዶማ ጋድያ አሳዉ ባይዜድኖ።4 7ሄዋ ድራዉ፥ ታን ጋዛ ካታማ ድርሳን ታማ የዳና፤ ሄ ታማይ ካታማ ጌሱዋካ ማና። 8አሽዶዳን ደእያ አሳ ታን የደርሳናነ ካተቱዋ ጻምኣ ኦይቄዳዋካ አስቀሎናፐ ይሳና። ኤቅሮና ካታማን ደእያ አሳካ ሙራና፤ ቃይ ፕልስጼማ ጋድያ አሳፐ አቴዳዋንቱካ ሀይቃና። ታን ኡባ ሞድያ መና ጎዳይ ሀዋ ኦዳይ” ያጌ።

ጺሮሳ

9መና ጎዳይ ሀዋዳን ያጌ፤ “ጺሮሳ ካታማ አሳይ ዛር ዛሪደ ኦዳ ናጋራ ድራዉ፥ ታን ኡንቱንታ ሙረናን አግከ። አያዉ ጎፐ፥ ኡንቱንቱ ጫቀቴዳ እሻተ ጫቁዋ አደ፥ ኦሞደቴዳ አሳ ኡባ ኤዶማ አሳዉ ባይዜድኖ።5 10ሄዋ ድራዉ፥ ታን ጺሮሳ ካታማ ድርሳን ታማ የዳና፤ ሄ ታማይ ካታማ ጌሱዋካ ማና” ያጌ።

ኤዶማ

11መና ጎዳይ ሀዋዳን ያጌ፤ “ኤዶማ ጋድያ አሳይ ዛር ዛሪደ ኦዳ ናጋራ ድራዉ፥ ታን ኡንቱንታ ሙረናን አግከ። አያዉ ጎፐ፥ ኡንቱንቱ ባረንቱ እሻቱዋ እስራኤላቱዋ ማሻን የደርሴድኖ፤ ኡንቱንቱ ኡንቱንቶ ቃረትበይክኖ። ኡንቱንቱ ኡባ ገደ ሀንቀቲኖ፤ ኡንቱንቱ ይሉ መናዉካ ስመና።6 12ሄዋ ድራዉ፥ ታን ቴማና ካታማ ቦላ ታማ የዳና፤ ሄ ታማይ ቦጽራ ካታማ ጌሶቱዋ ማና” ያጌ።

አሞና

13መና ጎዳይ ሀዋዳን ያጌ፤ “አሞና ጋድያ አሳይ ዛር ዛሪደ ኦዳ ናጋራ ድራዉ፥ ታን ኡንቱንታ ሙረናን አግከ። አያዉ ጎፐ፥ ኡንቱንቱ ባረንቱ ዛዋ አሳናዉ ጋላኣደ ጋድያን ደእያ ሻሃራ ማጫ አሳቱ ኡሉዋ ዳኬድኖ።7 14ሄዋ ድራዉ፥ ታን ራባ ካታማ ድርሳን ታማ የዳና፤ ሄ ታማይ ካታማ ጌሶቱዋ ማና። ሄዋፐ ጉይያን፥ ኦላ ጋላስ ዋሱ ዳራና፤ ቃይ ኦላንቻቱ ጎትያዳን ዎልቃማና። 15ኡንቱንቱ ካቲነ አናና ኦያ ካፓቱ ኡባይ ኦሞደቲደ እትፐ ባና” ያጌ መና ጎዳይ።