2 ቆሮንቶሳ 3

ጾሳ ኦራ ጫቁዋ

1ኑን ሽረቲደ፥ ኑ ሁጲያ ሳባናዉ ዶሜዶዬ? ዎይ ሀራ አሳቱዋዋዳን፥ ሳባ ዳብዳቢያ ህንተንቶ የዳናዉ ዎይ ህንተፐ አካናዉ ኮዬቶ? 2ህንተንቱ ህንተ ሁጲያን አሳይ ኡባይ ኤራናዳንነ ናባባናዳን፥ ኑ ዎዛናን ጻፈት ኡቴዳ ኑ ዳብዳቢያ። 3ሀ ዳብዳቢያ ክርስቶስ ባረ ሁጲያን ጻፊደ፥ ኑ ቦላ ኪቴዳዌ ቱማ፤ ሀ ዳብዳቢ ደኡዋ ጾሳ ጌሻ አያናን አሳ ዎዛናን ጻፈቴዳዋፐ አትን፥ ሹቻ ቦላ ቃላምያን ጻፈትቤና።1

4ኑዉ ክርስቶሳ ባጋና ጾሳን ሀዋ ማላ አማኑ ደኤ። 5ኑ ዳንዳያይ ጾሳፐ ይያዋፐ አትን፥ ሀ ኦሱዋ ኑን ኑ ሁጲያን ኦናዉ ዳንዳዬቶ ግያዌ ኑዉ አያይነ ባዋ። 6ኑን ኦራ ጫቆ ኦና ማላ፥ ጾሳይ ኑና ዳንዳይሴዳ፤ ሄ ኦራ ጫቁ ጌሻ አያናዋፐ አትን፥ ጻፈቴዳ ህግያዋ ግደና። ጻፈቴዳ ህጊ ሀይቁዋ አሄ፤ ሽን ጌሻ አያናይ ደኡዋ አሄ።2

7ሹቻ ዎጪደ ጻፌዳ ህጊ እመትያ ዎደ፥ ጾሳ ቦንቹ ቤቴዳ፤ ሙሴ ሶምእያን ደእያ ጶለይ ይያዋ ግዶፐካ፥ ሄ ጶለይ ዳሮ ዎልቃማ ግድያ ድራዉ፥ እስራኤልያ አሳይ አ ሶምእያ ትሽ ኦ ጼላናዉ ዳንዳይቤና። ሀይቁዋ አህያ ህጊ ኦያ ኦሱ ሀዋ ማላ ቦንቹዋና ይያዋ ግዶፐ፥3 8ጌሻ አያናይ ኦያ ኦሱዋ ቦንቹ አይ ኬና ዳራኔ? 9አያዉ ጎፐ፥ አሳይ ፕርዳ አክያ ኦሱ ቦንቾ ግዶፐ፥ አሳይ ጽልያ ኦሱዋ ቦንቹ ዋኒደ ዳራንዴሻ? 10አያዉ ጎፐ፥ ካሰ ቦንቹ ሀእ ባረፐ ሎይ አያ ቦንቹዋ ጋሱዋን ቦንቹዋ ዬዳዌ ቱማ። 11አያዉ ጎፐ፥ ሄ ዬዳዋን ቦንቹ ደእያዋ ግዶፐ፥ መናዉ ደእያዋን አይ ኬና ዎልቃማ ቦንቹ ደአንዴሻ?

12ኑን ህዶታን ናግያ ሀዋ ማላባይ ኑዉ ደእያ ድራዉ፥ ቆንጭያን ጻሊደ ሃሳዬቶ። 13እስራኤልያ አሳይ ይያ ቦንቹዋ ዉርሰ በኤና ማላ፥ ባረ ሶምእያ ናጻላን ካሜዳ ሙሴ ማላ ግዶኮ።4 14ሽን ኡንቱንቱ ዎዛናይ ዶንጭሌዳ፤ አያዉ ጎፐ፥ ኡንቱንቱ ኤጫ ጫቁዋ ናባብያ ዎደ፥ ሀቼ ጋካናዉካ፥ ሄ ናጻላይ ኡንቱንቱ ዎዛና ካም ዎዳ፤ ኦንነ ክርስቶሳና ጋከትያ ዎደ ጻላላን ሄ ናጻላይ ክቼ። 15ሽን ኡንቱንቱ ሙሴ ማጻፋ ናባብያ ዎደ ኡባን ሀቼ ጋካናዉካ፥ ሄ ናጻላይ ኡንቱንቱ ዎዛና ካም ዎዳ። 16ሽን ጾሳ ማጻፋይ፥ “ኦንነ ጎዳኮ ስምያ ዎደ፥ አዉደነ ሄ ናጻላይ ቃረቴ” ያጌ።5 17ጎዳይ ጌሻ አያና። ጎዳ አያናይ ደእያ ሳን አይለተይ ባዋ። 18ኑን ኡባይካ ናጻላን ካመትቤና ሶምእያን ጎዳ ቦንቹዋ በአና6 ቃይ ጌሻ አያና ግድያ ጎዳፐ ይያ ሄ ቦንቹ ኑና ባረና ማላትሲደ፥ ቦንቹዋፐ ቦንቾ ላማና።