1 ጰጽሮሳ ኪታ 5

ጾሳ አሳ አይሳናዉ እመቴዳ ዞርያ

1ስም ታን ዎሳ ጎልያ ጭማቱዋና ጭማ ግድያዌነ፥ ክርስቶሳ ዋይያ ማርካትያዌ፥ ቃይ ቆንጫና ቦንቹዋ ሻካናዌ ህንተ ግዶን ደእያ ጭማቱዋ ዞራይ። 2ህንተ ግዶን ደእያ ጾሳ ዉድያ ጾሳይ ኮይያዋዳን ሄምተ። ዶሱዋናፐ አትን፥ ዎልቃን ግደና። ቃይ ህንተ ጎአ ጻላላ ጼለናን፥ ሎኦ ቆፋን ሄምተ። 3ዉደዉ ህንተ ሌምሱዋ ግድተፐ አትን፥ ህንተ ሄምያዋንታ ዎልቃን ሄሞፕተ። 4ቃይ ሄምያዋንቱ ካፑ ቆንጭያ ዎደ፥ ባየና ቦንቾ ካላቻ ህንተ አካና።

5ሄዋዳንካ ያላጋ አሳቶ፥ ጭማቶ ሞደትተ። ኡባይካ እቱ እቶ ኦናዉ ህንተ ሁጲያ ካዉሽያዋ አፍላዳን ማይተ። አያዉ ጎፐ፥ ጾሳይ ኦቶረትያዋንታ እጼ፤ ሽን ባረና ካዉሽያዋንቶ አ ኬካተ እሜ።1 6ጾሳይ ባረ ሎኦ ዎድያን ህንተና ቁ ኦና ማላ፥ ዎልቃማ ጾሳ ኩሽያፐ ጋርሳና ህንተና ቶችተ። 7እ ህንተንቶ ቆፕያ ድራዉ፥ ህንተና ህርግስያ ኡባባ አ ቦላ ኦልተ።

8ጻላህያ ካፑ፥ ህንተ ሞርኪ፥ ምትያ ኡራ ኮዪደ፥ ጉድያ ጋሙዋዳን ህንተ ዩሹዋን ዩይያ ድራዉ ናገትተነ ቤጎትተ። 9ሳኣን ደእያ ህንተ እሻቱ ሄዋዳን ዋየትያዋ ኤሪደ፥ አማኑዋን ምኒደ፥ አናና ኤቀትተ። 10አ ኬካተ ኡባ ጾሳይ፥ ባረ መና ቦንቾ ክርስቶስ የሱሳ ባጋና ህንተና ጼሴዳዌ፥ አማሬዳ ዎድያ ህንተ ዋየቴዳዋፐ ጉይያን፥ እ ባረ ሁጰዉ ህንተና ሽር ኦራናነ ምንሳና። ቃይ እ ህንተና ማዳናነ ባስ ኤሳና። 11ዎልቃይ መናፐ መና ጋካናዉ አዉ ግዶ። አመንእ።

ዉርሰ ሳሮታ

12ሀዌ ጾሳ ቱሙ አ ኬካተ ግድያዋ ታን ህንተንቶ ማርካታደነ ህንተና ዞራደ፥ ህንተንቶ ቃንን ጻፌዳ ዳብዳቢያ አማነትያ እሻ ጋደ ታን ቆፕያ ስላሰ ቦላ ኪታድ፤ ሄ አ ኬካተን ምኔድታ።

13ህንተናና እትፐ ዶረቴዳ ባብሎነን2 ደእያ ዎሳ ጎልያ አሳይነ ታ ናአይ ማርቆስ ህንተና “ሳሮ ሳሮ” ጊኖ። 14ሲቁዋ የረታ የረቲደ፥ እቱ እቱዋ ሳሮትተ።

ህንተዉ፥ ክርስቶሳና እቱዋ ግዴዳዋንቶ ኡባቶ ሳሮተይ ግዶ። አመንእ።