1 ጰጽሮሳ ኪታ 4

ጌሻተን ደአና ደኡዋባ

1ሄዋ ድራዉ፥ ክርስቶስ ባረ አሹዋን ኑዉ ዋየቴዳ ድራዉ፥ ህንተካ ሄ ቆፋን ዳንጨትተ። አያዉ ጎፐ፥ ባረ አሹዋን ዋየቴዳ ኡራይ ናጋራ ኦያዋ አጌዳ። 2ሀዋፐ ስንን፥ ሀ ሳኣን ሸምፑዋና ደአናዉ አቴዳ ዎድያን፥ ጾሳይ ኮይያዋዳን ደአናዉ በስያዋፐ አትን፥ አሳ አሙዋዳን ደአናዉ በሰና። 3አያዉ ጎፐ፥ አማነና አሳይ ኦናዉ ዶስያዋ ህንተ ኦደ፥ ዎሹማናዉ ካጄልያዋን፥ አሙዋን፥ ማዋን፥ የን፥ ኡሻን፥ ፖክያ ኤቃዉ ጎይንያዋን፥ ደኤዳ ካሰ አዳ ዎዲ ህንተንቶ ግዳናዋ። 4አማነና አሳና ህንተ ሾራይ ባይና ኦሱዋ እትፐ ኦና ድራዉ ማላለቲደ፥ ህንተና ቦሪኖ። 5ሽን ኡንቱንቱ ፓጻ ደእያ አሳ ቦላነ ሀይቄዳ አሳ ቦላ ፕርዳናዉ ጊግ ኡቴዳ ጾሳዉ ዛሩዋ እማና። 6ሀይቄዳ አሳይ1 ባረ አሳተን አሳይ ፕርደትያዋዳን ፕርደታናዉነ ቃይ አያናን ጾሳይ ደእያዋዳን ደአናዉ፥ ዎንጋላ ምሽራቹ ኡንቱንቶ ሄዎ ኦደቴዳ።

ጾሳይ እሜዳ እሞታቱዋ ሎይ አይስያዋ

7ኡባባዉካ ዉርሰይ ማታቴዳ። ሄዋ ድራዉ፥ ጾሳ ዎሳናዉ ቆፋን ጌዪደ፥ ህንተና ናግተነ ምንተ። 8ሲቁ ዳሮ ናጋራ ካምያ ድራዉ፥ ኡባባፐ አደ እቱ እቱዋና ዎዛናፐ ሲቀትተ።2 9ዙዙመናን እቱ እቱዋ እማተን ሞክተ። 10ህንተ ሁጲያን ሁጲያን ጾሳፐ ዱማ ዱማ አ ኬካተ አኬዳዋዳንካ፥ ጾሳ ዱማ እሙዋ ሀዳራ ሎይ ከስያዋንቱዳን፥ እቱ እቶ ኦተ። 11የሱስ ክርስቶሳ ባጋና ኡባባን ጾሳይ ጋላተታና ማላ፥ ኦንነ ኦድያዋ ግዶፐ፥ ቃላ ጾሳፐ አኪደ ኦድያዋዳን ኦዶ። ቃይ ኦንነ ማድያዋ ግዶፐ፥ ጾሳይ አዉ እምያ ዎልቃን ማዶ። ቦንቹነ ጎዳተይ ጾሳዉ መናፐ መናዉ ግዶ። አመንእ።

መቱዋ ዎደ ምንያዋ

12ታ ሲቃቶ፥ ህንተ ግዶን ታማዳን ጉዲደ ፓጭያ ዋዪ ይያዋ ኦራባይ ሀንያዋዳን ማላለቶፕተ። 13ሽን ክርስቶሳ ቦንቹ ቤትያ ዎደ ህንተ ናሸታና ማላ፥ አናና ዋየትያዋን ናሸትተ። 14አሳይ ህንተና ክርስቶሳ ሱን ድራዉ ቦርያዋ ግዶፐ፥ ህንተ አንጀቴዳዋንታ፤ አያዉ ጎፐ፥ ቦንቾ አያናይ፥ ጾሳ አያናይ፥ ህንተ ቦላ ሸምፓና። 15ህንተፐ ኦንነ ሸምፑዋ ዎዳዋዳን፥ ዎይ ካይሱዋዳን፥ ዎይ ኢታባ ኦዳ አሳዳን፥ ዎይ ሀራ አሳ የዉዋ ገሌዳዋዳን ዋየቶፖ። 16ሽን ኦንነ ክርስታንያ ግድያ ድራዉ ዋየቶፐ፥ ክርስቶሳ ሱን ድራዉ፥ ጾሳ ጋላታናፐ አትን፥ ዬላቶፖ።

17አያዉ ጎፐ፥ ፕርዳይ ጾሳ ጎልያን ዶመትያ ዎዲ ጋኬዳ። ቃይ ሄ ፕርዳይ ኮይሮ ኑ ቦላ ዶመትያዋ ግዶፐ፥ አ ዎንጋላዉ አዛዘተናዋንቱ ዉርሰይ አያ ግዳኔ? 18ጽሎ አሳይ ቱጋን አትያዋ ግዶፐ፥ ማካላንቻይነ ናጋራንቻይ ያትና ዋናኔ?3 19ሄዋ ድራዉ ቃይ፥ ጾሳይ ጌዳዋዳን ዋየትያዋንቱ ሎኦባ ኦደ፥ ባረንቱ ሸምፑዋ ሀዳራ ባረና መዳ አማነትያ ጾሳዉ እምኖ።