1 ካታቱዋ 2

ዳዊተ ሶሎሞናዉ ዉርሰ አዛዙዋ እሜዳ

1ዳዊተ ሀይቂያ ዎዲ ማትና፥ ባረ ናኣ ሶሎሞና ሀዋዳን ያጊደ አዛዜዳ፤ 2“ታን ሀይቂያ ዎዲ ማቴዳ። ሄዋ ድራዉ፥ ምና፤ ገንቻ አሳ ግዳ። 3መና ጎዳይ ነ ጾሳይ አዛዜዳዋ ናጋ፤ አ ኦግያን ሀመታ፤ ሙሴ ህግያን ጻፈቴዳዋዳን አ አዋዩዋ፥ አ አዛዙዋ፥ አ ህግያነ አ ዎጋ ናጋ። ያቶፐ፥ ኔን ኦያባይ ኡባይነ ኔን ብያሳኣ ኡባይ ነዉ እንጀታናዋ። 4ቃይ መና ጎዳይ ታና፥ ‘ነ ዘረቱ ባረንቱ ደኡዋን ናገቲደ ደኦፐ፥ ኡንቱንቱ ታ ስንን ባረንቱ ኩመን ዎዛናፐነ ባረንቱ ኩመን ሸምፑዋፐ አማነቲደ ሀመቶፐ፥ እስራኤልያ ካዉተ አራታን ኡትያ አሳይ ነዉ ኡባካ የና’ ያጌዳ ህዶታ ቃላ ታዉ ፖላና።

5“ቃይ ጻሩይ ናአይ ዮኣበ እስራኤልያ ኦላ ጋዳዋቱዋ ላኡዋ፥ ኔራ ናኣ አባኔራነ የተራ ናኣ አማሳ ዎደ፥ እ ታና ኦዳዋ ኔን አኬካሳ። ሄዌነ፥ ኡንቱንቱ ኦላ ዎደ ዎዳዋ ሀሉዋ ኡንቱንታ ስጋ ዎደ ዎደ፥ ሄ ሱን ባረ ጼሳ ሳቂያነ ባረ ገድያ ጫማ አሌቄዳ።1 6ኔን አ ነ አዳ ኤራተዳን ኪተታ፤ ባረዉ ማታ እ ጭሚደ ሳሮ ሀይቃናዳን ኦፓ።

7“ሽን ጋላኣደ ጌተትያ ቢታን ደእያ ባርዝላያ ናናዉ ሎአ፤ ኡንቱንቱ ነ ማዳን ምያ አሳና ሚኖ። አያዉ ጎፐ፥ ታን ነ እሻ አበሰሎማፐ ባቃትያ ዎደ፥ ኡንቱንቱ ታ ባጋ ግዴድኖ።2

8“ታን ማህናይማ ካታማ ቤዳ ዎደ፥ ታና ኢታ ሸቃ ሸቄዳ ቢንያማ ጋድያን ባሁሪማ ካታማፐ ዬዳ ጌራ ናኣ ሽምእ ኔናና ደእያዋ ሀሳያ። እ ታናና ጋከታናዉ ዮርዳኖሳ ሻፋ ዱገ ዬዳ ዎደ፥ ‘ታን ኔና ዎከ’ ጋደ መና ጎዳን አዉ ጫቃድ።3 9ሽን ሀእ ኔን አ ጽሎ አሳዳን ፓይዶፓ። ኔን አዳ ኤራይ ደእያ አሳ፤ ኔን አ ዋታነንቶ ኤራሳ። ኔን ሄ ጭማ ብታንያ ሀይቁዋን ሙራ” ያጌዳ።

ዳዊታ ሀይቁዋ

10ሄዋፐ ጉይያን ዳዊተ ሀይቂደ፥ ባረ ማይዛን ጋከቴዳ፤ ያቲደ ዳዊታ ካታማን ሞገቴዳ። 11ዳዊተ እስራኤልያ ቦላ ኦይታሙ ላይ ካተቴዳ፤ ከብሮናን ላፑን ላይ፥ የሩሳላመን ሀታማነ ሄዙ ላይ ካተቴዳ።4 12ሶሎሞንነ ባረ አዉዋ ዳዊታ ካዉተ አራታን ኡቴዳ፤ አ ካዉተይካ ሎይ ምኔዳ።

ሶሎሞነ ካትያ ግዱሳ

(2:13-46)

አዶንያሳ ሀይቁዋ

13ሀጊት ናአይ አዶንያስ፥ ሶሎሞና ዳይ በርሳብኮ ቤዳ፤ በርሳባ፥ “ኔን ታኮ ሳሩዋን ያድ?” ያጋደ አ ኦቻዱ።

እ፥ “ኤ፤ ሳሩዋን ያድ” ያጊደ ዛሬዳ። 14ሄዋፐ ጉይያን ጉጂደካ፥ “ታን ኔና ኦችያዌ ደኤ” ያጌዳ።

እዛ፥ “ኦቻ” ያጋዱ።

15እ ሀዋዳን ያጌዳ፤ “ካተታናዉ በስያዌ ታና ግዴዳዋነ እስራኤልያ አሳይ ኡባይ ታና ባረንቱ ካትያዳን ጼሌዳዋ ኔን ነ ሁጲያዉ ኤራሳ። ሽን የዎቱ ላመትና ካዉተይ ታ እሻዉ ዩዬዳ፤ ሄዌነ፥ አዉ መና ጎዳፐ ዬዳ። 16ሀእ ታን ኔና እትባ ኦቻና። ሀያና ታዉ እጾፓ” ያጌዳ።

እዛ፥ “ኦቻ” ያጋዱ።

17እ፥ “ካቲ ሶሎሞነ ነዉ እጻድ ጌና፤ ሄዋ ድራዉ፥ ሹኔማ ካታማፐ ዬዳ አብሻጎ ግያ ዎዶራቶ ታን አካናዳን እ እዞ ታዉ እማና ማላ፥ ሀያና አ ታዉ ኦቻርክ” ያጌዳ።5

18በርሳባ፥ “ዳሮ ሎአ፤ ታን ሄዋ ነ ድራ ካትያዉ ኦዳና” ያጋዱ።

19ሄዋ ድራዉ፥ በርሳባ አዶንያ ኪታ ኦዳናዉ ሶሎሞነኮ ገልና፥ ካቲ እዞ ሞካናዉ ደንድ ኤቂደ፥ እዝዉ ጎይን ስሚደ ባረ ካዉተ አራታን ኡቴዳ። ቃይ ባረ አትዉ ሀራ ካዉተ አራታ አህሲደ፥ አን ባረፐ ኡሸቻ ባጋና ኡትሴዳ።

20ኡቴዳዋፐ ጉይያን፥ “ኔና ታን እት ጉባ ኦችያዌ ደኤ። ሀያና ታዉ እጾፓ” ያጋዱ።

ካቲ ዛሪደ እዞ፥ “ታ ዳዬ፥ ኦቻ። ታን እጽከ” ያጌዳ።

21አ፥ “ሹኔማ ካታማፐ ዬዳ አብሻጎ ነ እሻይ አዶንያስ አካና ማላ አዉ እማርኪ” ያጋዱ።

22ካቲ ሶሎሞነ ዛሪደ ባረ ዳዮ፥ “ሹኔማ ካታማፐ ዬዳ አብሻጎ ኔን አዶንያሳዉ አያዉ ኦቻይ? እ ታ ባይራ ግደኔ? ኔን አዉ ካዉተካ ኦቻናዋ ሽን አጋዳ! ኤ፥ ኔን አዉ፥ ቄስያ አብያታራዉነ ጻሩይ ናኣ ዮኣባዉ ካዉተካ ኦቻናዋ አጋዳ!” ያጌዳ።

23ካቲ ሶሎሞነ ጾሳን ጫቂደ፥ “አዶንያስ ሀዋ ኦቼዳ ድራዉ ታን አ ዎና ዮፐ፥ መና ጎዳይ ታና ዎ! 24ሀእ ስም ታና ታ አዉዋ ዳዊታ ካዉተ አራታን ኡትሲደ፥ ታ ካዉተ ሎይ ኤሲደ፥ ታ ዛራቱ ደኤናዳን ኦዳ መና ጎዳይ ኤሮ! አዶንያሳ ሀቼ ዎና!” ያጌዳ። 25ካቲ ሶሎሞነ ዮዳሄ ናኣ ባናያ አዛዝና፥ እ ቢደ አዶንያሳ ሾጪደ ዎዳ።

አብያታራ ጉየ የዴድኖ

26ሄዋፐ ጉይያን፥ ካቲ ሶሎሞነ ቄስያ አብያታራ ሀዋዳን ያጌዳ፤ “ኔን አናቶታን ደእያ ነ ጋደ ጉየ ባ። ኔን ሀይቃናዉ በሳሳ፤ ሽን ኔና ታን ሀእ ዎከ። አያዉ ጎፐ፥ ኔን ታ አዉዋ ዳዊታ ስንን ኡባ ሞድያ መና ጎዳ ታቦታ ቶካደ፤ ቃይ ታ አዉዋ መቱዋ ኡባ አናና መቶታዳ” ያጌዳ።6 27ያቲደ ሶሎሞነ አብያታራ መና ጎዳ ቄሳቱዋ ግድያ ሳኣፐ ድጊደ፥ መና ጎዳይ ሴሎን ኤልያ ጎልያ አሳዋ ኦዴዳዋ ፖሌዳ።7

ዮኣባ ሀይቁዋ

28አበሰሎማ ማዳና ይንቶነ አዶንያስ ማዴዳ ዮኣባኮ ሀ ኦዱ ጋኬዳ። መና ጎዳ ዱንካንያዉ እ ባቃት ቢደ፥ ያርሽያ ሳኣ ካጨቱዋ ኦይቄዳ። 29ዮኣበ መና ጎዳ ዱንካንያዉ ባቃቲደ ቢደ፥ ያርሽያ ሳኣ ምይያን ደእያዋ ካትያ ሶሎሞናዉ ኦዴድኖ። ሶሎሞነ ዮዳሄ ናኣ ባናያ፥ “ባደ አ ዎ!” ጊደ አዛዜዳ።

30ባናይ መና ጎዳ ዱንካንያ ግዶ ገሊደ ዮኣባ፥ “ካቲ ኔና፥ ‘ሀዋፐ ከሳ’ ያጌ” ያጌዳ።

ሽን እ ዛሪደ፥ “ከስከ! ታን ሀዋን ሀይቃና” ያጌዳ።

ባናይ ካትያዉ፥ “ዮኣበ ታዉ ሀዋ ሀዋ ጊደ ዛሬዳ” ጊደ ኦዴዳ።

31ካቲ ባናያ፥ “እ ጌዳዋዳን አ ኪተታ፤ አ ዎደ ሞጋ! ያቶፐ፥ ዮኣበ ጽሎ አሳቱዋ ሱ ጉሴዳ ዳባፐ ታናነ ታ አዉዋ ጎልያ አሳ ጌሻሳ። 32እ ጉሴዳ ሱ አጩዋ መና ጎዳይ አዉ ጭጋና። አያዉ ጎፐ፥ እ ታ አዉ ዳዊተ ኤረናን ደእሽን ላኡ አሳቱዋ ማሻን ዎዳ፤ እስራኤልያ ኦላ ጋዳዋይ ኔራ ናአይ አባኔርነ ይሁዳ ኦላ ጋዳዋይ የተራ ናአይ አማስ፥ ኡንቱንቱ ላአቱካ አፐ ኬካነ ሱርያ ዳሮ አሳ። 33ዮኣበ ሀ አሳቱዋ ዎዳ ድራዉ፥ ኡንቱንቱ ሱ ዳባይ መናዉ ዮኣባ ሁጲያንነ አ ዘረቱዋ ሁጲያን ዎ። ዳዊታ ቦላነ አ ጎልያ አሳ ቦላ፥ አ ዘረቱዋ ቦላነ አ ካዉተ አራታ ቦላ መናዉ መና ጎዳ ሳሮተይ ግዶ” ያጌዳ።

34ሄዋ ድራዉ፥ ዮዳሄ ናአይ ባናይ ፑደ ከሲደ፥ ዮኣባ ሾጪደ ዎዳ፤ እ ዎራን ደእያ ባረ ጋደን ሞገቴዳ። 35ካቲ ዮዳሄ ናኣ ባናያ ዮኣባ ሳኣን ኦላ ጋዳዋ ኦደ ሱንዳ፤ ቃይ አብያታራ ኮታን ቄስያ ሳዶቃ ሱንዳ።

ሽምአ ሀይቁዋ

36ሄዋፐ ጉይያን ካቲ ሶሎሞነ ሽምአዮ ኪቲደ ሀዋዳን ያጌዳ፤ “ነዉ የሩሳላመን ጎልያ ኬጻደ፥ ያን ደአ፤ ሀራሳ ሀቃነ ቦፓ። 37ኔን ካታማፐ ከሳደ፥ ቀድሮና ዛንጋራ ፕኔዳ ጋላስ ሀይቃናዋ ኤራ። ነ ሱ ጎሚ ኔና ኦይቃና” ያጌዳ።

38ሽምእ ዛሪደ ካትያ፥ “ኔን ግያዌ ሎአ፤ ታን ነ ቆማይ ኔን ታ ጎዳይ ካቲ ጌዳዋዳን ኦና” ያጌዳ። ሽምእ የሩሳላመን ዳሮ ዎድያ ደኤዳ።

39ሽን ሄዙ ላይፐ ጉይያን፥ ሽምአ ቆማቱዋፐ ላአቱ በቲደ፥ ማእካ ናኣ፥ ጋተ ካትያ አኪሻኮ ቢና፥ “ነ ቆማቱ ጋተን ደኢኖ” ጊደ ሽምአዉ ኦዴድኖ። 40እ ባረ ሀርያ ኮሪደ፥ ባረ ቆማቱዋ ኮያናዉ አኪሻኮ ጋተ ቤዳ፤ ጋተፐ ባረ ቆማቱዋ ዛሪደ አሄዳ።

41ሽምእ የሩሳላመፐ ጋተ ካታማ ቢደ ስሜዳዋ ሶሎሞነ ስሴዳ ዎደ፥ 42ሽምአ ጼስሲደ ሀዋዳን ያጌዳ፤ “ ‘ኔን ያፐ ደንዳደ ሀራሳ ሀቃነ ቤዳ ጋላስ፥ ሀይቂያዋ ኤራ’ ጋደ ታን ኔና መና ጎዳን ጫቀደ ሴራበይክታ? ሄ ዎደ ኔን ‘ነ ግያዌ ሎአ፤ ኤኖ፥ ታን አዛዘታና’ ጋዳ። 43ያትና፥ መና ጎዳዉ ጫቄዳ ጫቁዋነ ታ አዛዙዋ አያዉ ናጋበይኪ?” ያጌዳ።

44ቃይካ ካቲ ሽምአ፥ “ታ አዉዋ ዳዊታ ቦላ ኔን ኦዳ ኢታ ኪታ ኡባ ነ ዎዛናይ ኤሬዳ። ሀእ ስም ነ ኢታ ኪታ መና ጎዳይ ነዉ ዛራና። 45ሽን ካቲ ሶሎሞነ አንጀታና፤ ዳዊታ ካዉተ አራታይካ መና ጎዳ ስንን መናዉ ሳሮ ደአና” ያጌዳ። 46ካቲ ዮዳሄ ናኣ ባናያ አዛዜዳ፤ ባናይ ቢደ፥ ሽምአ ሾጪደ ዎዳ።

ያትና፥ ካዉተይ ሶሎሞነ ኩሽያን ምኒደ ኤቄዳ።