Dawro Full Bible Ethiopic
1 ካታቱዋ 19
ኤላስ ሲና ደርያ ቤዳ
ኤላስ ኦዳዋ ኡባነ ባኣላ ሱንን ትምቢትያ ኦድያዋንታ ኡባ ማሻን እ ዎት ዎደንቶ አካብ ኤልዛቤልዉ ኦዴዳ። ኤልዛቤላ፥ “ኔን ሄ ትምቢትያ ኦድያዋንታ ኦዳዋዳን፥ ዎንት ሀኖደ ታን ኔና ኦና ዮፐ፥ ጾሳቱ ታና ዎና” ያጋደ ኤላሳዉ ኪታዱ።
ኤላስ ባረ ሸምፖ ያዪደ፥ ይሁዳ ቢታን ደእያ በርሳበሀ ዬዳ። ባረ ቆማ ሄዋን የጊደ፥ ባረካ እት ጋላሳ ኦግያ ዎራን ሀመቴዳ። ቢደ እት ሳንካራ ኩዋን ኡቲደ፥ “አቤት መና ጎዳዉ፥ ታዉ ግዳናዋ፤ ታን ታ ማይዛ አዎቱዋፐ ኬክከ። ታ ሸምፑዋ አካ” ያጊደ ሀይቃናዉ ዎሴዳ።1
ሄዋፐ ጉይያን ሳንካራ ኩዋን ዛቁሊደ ገምእሼዳ፤ እት ኪታንቻይ አ ቦቺደ፥ “ደንዳደ ማ” ያጌዳ። እ ጼልያ ዎደ፥ ሆኦ ሹቻ ምሹዋን ኡከቴዳ ኮምፖ ኡክይነ ኦቱዋ ሃይ አ ሁጲሳን ደእያዋ በኤዳ። ሚደ ኡሼዳነ፤ ያቲደ ጉየ ግሴዳ። መና ጎዳ ኪታንቻይ ላኤንዋ ዪደ ኤላሳ ቦቺደ፥ “ኔን ባና ኦጊ ዳሮ አዱሳ ግድያ ድራዉ፥ ደንዳደ ማ” ያጌዳ።
ኤላስ ደንዲደ ሜዳነ ኡሼዳነ። ሄ እ ሜዳ ቁማ ዎልቃን ጾሳ ደርያ ሲና ጋካናዉ፥ ኦይታሙ ጋላሳነ ኦይታሙ ቃማ ሀመቴዳ። ሄ ሳኣን ደእያ ጎንጎሉዋ ግዶ ገሊደ አቄዳ።
መና ጎዳይ አ፥ “ኤላሳ፤ ሀዋን አይ ኦይ?” ያጌዳ።
ኤላስ፥ “ኡባፐ ዎልቃማ መና ጎዳዉ ጾሳዉ ታን ዳሮፐ ምሸታድ። አያዉ ጎፐ፥ እስራኤልያ አሳይ ኔናና ጫቀቴዳ ጫቁዋ መንዳ፤ ነዉ ያርሽያ ሳኣካ ክንቼዳ፤ ነ ሱንን ትምቢትያ ኦድያዋንታካ ማሻን ዎዳ። ያትና፥ ታን ታረካ አታድ፤ ሀእ ኡንቱንቱ ታ ሸምፑዋካ አካናዉ ኮይኖ” ያጌዳ።2
መና ጎዳይ አ፥ “ሄዋፐ ከሳ ባደ፥ ደርያ ሁጲያን ታ ስንን ኤአ” ያጌዳ። ኤላስ ኤቂደእሽን መና ጎዳይ አ ማታና አዳ። ሄ ዎደ ምኖ ዎልቃማ ጫርኩ ደርያ ጳልቀሬዳ፤ ዛላቱዋካ ክንቼሬዳ፤ ሽን መና ጎዳይ ሄ ጫርኩዋ ግዶን ባዋ። ጫርኩዋፐ ስምና ቢታይ ቃጼዳ፤ ሽን መና ጎዳይ ሄ ቢታ ጋጻንካ ባዋ። ቢታ ጋጻፐ ስምና ታማይ ከሴዳ፤ ሽን መና ጎዳይ ታማ ግዱዋን ባዋ። ታማፐ ስምና ሳሱከይ ስሰቴዳ። ኤላስ ሄ ሳሱከ ስሴዳ ዎደ፥ ባረ ዴሙዋ ካባን ካሜዳ። ያቲደ ካረ ከሲደ ጎንጎሉዋ ፐንግያን ኤቄዳ።
ኤላሳኮ ኮሻይ ዪደ፥ “ኤላሳ፥ ሀዋን አይ ኦይ?” ያጌዳ።
ኤላስ፥ “ኡባፐ ዎልቃማ መና ጎዳ ጾሳዉ ታን ዳሮፐ ምሸታድ። አያዉ ጎፐ፥ እስራኤልያ አሳይ ኔናና ጫቀቴዳ ጫቁዋ አዳ፤ ነዉ ያርሽያ ሳካ ክንቼዳ፤ ነ ሱንን ትምቢትያ ኦድያዋንታካ ማሻን ዎዳ። ያትና፥ ታን ታረካ አታድ፤ ሀእ ኡንቱንቱ ታ ሸምፑዋካ አካናዉ ኮይኖ” ያጌዳ።
መና ጎዳይ ኤላሳ፥ “ኔን ዬዳ ሳኣና ስማደ፥ ዳማስቆ ባዙዋ ባ። ያ ጋካደ፥ ሀዛኤል ሶርያ ቦላ ካተታናዳን ኦካ።3 ቃይ ንምሻ ናአይ ዬሁ እስራኤልያ ቦላ ካተታናዳን ኦካ። ነ ሳኣን ትምቢትያ ኦዳናዳን አቤል ማሆላፐ ዬዳ ሻፋጻ ናኣ ኤልሳአ ኦካ።4 ሀዛኤላ ማሻፐ ከስ አክያ ኡባ ዬሁ ዎና፤ ቃይ ዬሁ ማሻፐ ከስ አክያ ኡባ ኤልሳእ ዎና። ባኣላዉ ጉልባትቤና ዎይ ባረንቱ ዶናን ባኣላ ኤቃ የርቤና ላፑን ሻአ አሳ ታን እስራኤልያን ታዉ አሻና” ያጌዳ።5
ኤላስ ኤልሳአ ጼሴዳ
ኤላስ ሄ ሳፐ ደንድ ቢደ፥ ሻፋጻ ናአይ ኤልሳእ ታማነ ላኡ ዋ ቦራን ጋድያ ጎሽያዋ ደሜዳ፤ ታማነ ላኤን ዋ ኤልሳእ ባረ ሁጲያዉ ኦይቂደ ጎሼ። ኤላስ አ ማታና አደ፥ ባረ ካባ አ ማይዜዳ። ኤልሳእ ቦራቱዋ የግ አግ፥ ኤላሳ ጌዱዋ ዎጺደ፥ “ታን ታ አዉዋነ ታ ዳዮ ሳሩዋን ጋደ፥ የራ አካደ፥ ሄዋፐ ስማደ፥ ኔና ካላና” ያጌዳ።
ኤላስ ኤልሳአ፥ “ባ። ታን ነዉ አይ ኦድታ?” ያጌዳ።
ሄዋ ድራዉ፥ ኤልሳእ አጊደ ጉየ ስሚደ ዋ ቦራቱዋ ሹኬዳ፤ ቦራ ሚሻ ጳልቂ ኤደ አሹዋ ዶይሴዳ፤ አሹዋ አና አሳይ ሜዳ። ሄዋፐ ጉይያን ደንድ ቢደ፥ ኤላሳዉ ኦዳ።
Source notes (5)
- Cross-reference ዮሃ. 4:3
- Cross-reference ሮመ 11:3
- Cross-reference 2 ካታ. 8:7-13
- Cross-reference 2 ካታ. 9:1-6
- Cross-reference ሮመ 11:4
Dawro Full Bible Ethiopic. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.