La Amɛ 86

Pɛɛ kpami kɛ ha yemi kɛ buami

1Oo Tsaatsɛ Mawu, moo ba o tue si nɛ o bu ye kue fami ɔ tue, ejakaa i ngɛ haomi agbo mi.

2Moo bu ye he nɛ o je mi kɛ je gbenɔ mi, ejakaa i bɔɔ mɔde nɛ ma ye o mlaa amɛ a nɔ. Mo he ye yi wami, ejakaa i ngɛ mo sɔmɔe nɛ i heɔ o nɔ yeɔ. 3Oo Tsaatsɛ Mawu, moo na mi mɔbɔ, ejakaa i ngɛ mo blɔ hyɛe kɛ hɛ nɔ kami be fɛɛ be. 4Oo Neneene Tsɛ, mo ha mi bua jɔmi, ejakaa mo pɛ i sɔmɔɔ. 5Oo Neneene Tsɛ, o hi hluu nɛ o mi mi jɔ. O pee klaalo nɛ o maa ngɔ yayami kɛ ke. O hyi kɛ mɔbɔ nami, nɛ o buu nihi kulaa nɛ tsɛɔ mo ɔ tue.

6Oo Tsaatsɛ Mawu, moo bu ye kue fami ɔ tue, nɛ o pee ye hiami ni ɔmɛ kɛ ha mi. 7Ke i sɛ haomi mi ɔ, ma tsɛ mo, nɛ o maa ye kɛ bua mi.

8Mawu ko be mawu ɔmɛ a kpɛti nɛ ngɛ kaa mo, oo Tsaatsɛ Mawu; nɛ ni tsumi ko hu be nɛ ngɛ kaa o ni tsumi ɔmɛ. 9Oo Tsaatsɛ Mawu, je ɔ nɛ o bɔ ɔ tsuo ma ba sɔmɔ mo nɛ a ma je o biɛ klɔuklɔu ɔ yi. 10Ejakaa o kle nɛ o tsuɔ nyakpɛ níhi. Mo pɛ ji Mawu.

11Oo Tsaatsɛ Mawu, moo tsɔɔ mi o blɔ ɔ, nɛ i ma nyɛɛ ngɛ o anɔkuale ɔ nya. Mo ha nɛ ma na juɛmi kake, nɛ ma ye o biɛ ɔ gbeye. 12I ma je o yi kɛ ye tsui kulaa. I ma wo o biɛ ɔ hɛ mi nyami kɛ ya neneene. 13Ejakaa o mɔbɔ nami ɔ kle ha mi, nɛ o je ye susuma kɛ je abosiamihi a je.

14Oo Tsaatsɛ Mawu, he nɔ woli te si kɛ wo mi, nɛ awi yeli ngɛ ye susuma hɛ mi kpatami he blɔ hlae, nɛ a susuu we kaa o ngɛ. 15Oo Neneene Tsɛ, moo lɛɛ Mawu nɛ naa mɔbɔ ji mo. Anunyamitsɛ ji mo, o mi mi fu we mla, nɛ o hyi tɔ kɛ suɔmi kɛ anɔkuale. 16Moo hyɛ mi nɛ o na mi mɔbɔ. Moo wo o sɔmɔlɔ ɔ he wami, nɛ o he ye yi wami. 17Moo tsɔɔ mi o mɔbɔ nami ɔ he okadi, konɛ nihi nɛ sume mi ɔ, a na nɛ zo nɛ gbe mɛ. Ejakaa mo Mawu o ye kɛ bua mi nɛ o ha mi bua jɔmi.