La Amɛ 85

Kpɔmi kɛ nyɔguɛ mi jemi

1Tsaatsɛ Mawu, o nɛ jɔɔmi kɛ pue zugba nɛ ɔ nɔ babauu. O kpale Israel nyɔguɛ ɔmɛ kɛ ba. 2Nɛ o ngɔ o bi ɔmɛ a yayami ɔmɛ kɛ ke mɛ. O tsi a yayami ɔmɛ tsuo nɔ. 3O ngmɛɛ o mi mi fumi ɔ kulaa he, nɛ o mi mi la nɛ nya wa a se po.

4Oo Neneene Tsɛ, wa yi wami helɔ, moo kpale wɔ kɛ ba o ngɔ, konɛ o mi mi fumi ɔ nɛ ko te si kɛ wo wɔ ekohu. 5Anɛ o mi mi ma fu wɔ kɛ ya neneene lo? Anɛ o maa ngɔ o mi mi la kɛ pue yi nɔhi kulaa nɔ lo? 6O be wɔ he wami woe ekohu, konɛ o bi ɔmɛ nɛ a na o he bua jɔmi lo? 7Oo Tsaatsɛ Mawu, moo nɛ o suɔmi kɛ o mi mi jɔmi ɔ kɛ pue wa nɔ nɛ wa yi nɛ na wami.

8I ma nu nɔ́ nɛ Tsaatsɛ Mawu nɛ ji Yehowa a ma de, ejakaa e maa tu he jɔmi munyu kɛ ha e bi ɔmɛ kɛ e nimli klɔuklɔu ɔmɛ, ke ji a ma kpa a yayami ɔmɛ peemi kɛkɛ. 9Niinɛ, e yi wami hemi ɔ na nihi nɛ yee lɛ gbeye ɔ ta; nɛ wa zugba a nɔ ma hyi tɔ kɛ e anunyami ɔ.

10Mɔbɔ nami kɛ anɔkuale pee kake. Nɛ dami kɛ he jɔmi pee huɛ. 11Anɔkuale maa te si ngɛ zugba a nɔ; nɛ dami maa je hiɔwe kɛ ba zugba a nɔ. 12Anɔkuale, Tsaatsɛ Mawu maa nɛ e jɔɔmi kɛ pue zugba a nɔ, nɛ e maa ba ni babauu. 13E dami ɔ maa je blɔ ha wɔ, nɛ e maa ngɔ wɔ kɛ nyɛɛ e nane mami he ɔmɛ.