La Amɛ 73:26

Mi Gbami 3

La 73:1—89:52

Yi mi wali a nɔ yami kɛ a nyagbe

1Tsaatsɛ Mawu mi hi kɛ ha Israel kɛ nihi nɛ a tsui mi tsɔ ɔ. 2Se ami lɛɛ i su muɔ ɔ nya haa. Ye nanehi ngɛ sanee nɛ i nɔ mi ta. 3Ejakaa ye tsui ngɛ mi haoe ngɛ fiali kɛ yi mi wali a ni nami fuu ɔ he. 4Anɔkuale, ngɛ a wami si himi mi kulaa a, a nɛ nyagba ko. Ni sɔuu kɛkɛ se a ngɛ nae. 5Haomi bɛ a nɔ be fɛɛ be, nɛ a nɛ nyagba ko kaa bɔ nɛ ni kpa amɛ ngɛ nae ɔ. 6Lɔ ɔ he je ɔ, a fiaa nɛ a hyɛ we a se, nɛ yi mi wami ni nɛ a tsuɔ. 7A na ni kpɔtɔɔ nɛ a pee tɔbɔtɔbɔ, a nine suu nɔ́ tsuaa nɔ nɛ a ngɛ hlae ɔ nɔ. 8A yeɔ Mawu he fɛu, nɛ a woɔ e nimli ɔmɛ a he gbeye. A fiaa ngɛ a munyu tumi mi. 9A fiaa kɛ siɔ hiɔwe tete, nɛ a nuu a he ngɛ he fɛɛ he.

10Lɔ ɔ he je ɔ, Mawu nimli ɔmɛ a kɔni mi jɔɔ, nɛ a juɛmi futuu, se a de we nɔ́ ko. 11A biɔ ke, “Anɛ Mawu naa nɔ́ nɛ ngɛ nɔ yae ɔ lo? 12Nyɛɛ hyɛ fiali nɛ ɔmɛ, a nɛ haomi ko, be fɛɛ be nɛ ɔ ni kɛkɛ se a ngɛ nae.”

13Anɛ ami lɛɛ tsa pi be nɛ i ngɛ puɛe nɛ ɔ lo? Mɛni he je nɛ i ngɛ nɔ́ nae kaa ye tsui mi nɛ tsɔ? 14Nɔ́ nɛ kɛkɛ nɛ i ngɛ nae ngɛ mi ji haomi kɛ aywilɛho be fɛɛ be. 15Ke ja a ji bɔ nɛ i de niinɛ ɔ, lɛɛ i pee o nimli ɔmɛ a se blɔ tsɔɔlɔ. 16Se kɛ ɔ, bɔ nɛ nimli nɛ sume Mawu ɔ a ngɛ ni nae ɔ, e nya tsɔɔmi wa.

17Nɛ ligbi kake ɔ, i ho Mawu he klɔuklɔu ɔ ya nɛ ma ya sɔle, nɛ i susu nimli yayami nɛ ɔmɛ a hwɔɔ se si himi he. 18A ngɛ blɔ nɛ nɔ saneɔ nɔ nyɛɛe, nɛ tlukaa a, Mawu ma tsitsɛɛ a kue se mi kɛ je muɔ ɔ tue kɛ ya hɛ mi kpatami mi. 19Nɛ lɔ ɔ maa pee a bua jɔmi ɔ e nyagbe kɛ neneene pimi. 20A piɔ si himi ɔ ngɛ kaa nlami kɛkɛ. A hɛ maa tsiɛ nɛ a maa na nɔ́ nɛ ji anɔkuale ɔ kaa bɔ nɛ nɔ ko hɛ tsiɛɛ kɛ jee nlami je nɛ e naa kaa nihi nɛ e nla amɛ a pi nihi nɛ ngɛ ɔ.

21Benɛ i na enɛ ɔ, i pee basaa. 22I na kaa i jee kuasia nɛ i li nɔ́ ko. Oo Tsaatsɛ Mawu, i pee kaa lohwe ko kɛkɛ ngɛ o hɛ mi. 23Se ja a tete po ɔ, o suɔ mi. O hɛɛ ye hiɔ nine mi. 24O maa ya nɔ ma kudɔ mi kɛ o nile kɛ ga womi ngɛ ye wami be ɔ kulaa mi; nɛ pee se ɔ, o maa ngɔ mi kɛ ya o hiɔwe anunyami ɔ mi. 25Mɛnɔ i ngɛ ngɛ hiɔwe pe mo? Nɛ i hla we nɔ ko ngɛ zugba a nɔ ja mo. 26Ye he wami ngɛ gbɔjɔe; nɛ ye mumi si we nɔ, se Mawu ngɛ. Lɛ ji ye tsui he wami, nɛ e ngɛ kɛ ha mi daa.

27Se nihi nɛ a sume nɛ a sɔmɔ Mawu ɔ, a hɛ mi ma kpata, ejakaa e kpataa nihi nɛ sɔmɔɔ mawu kpahi ɔ a hɛ mi.

28Se ami lɛɛ i sa kɛ su e he bɔ nɛ ma nyɛ. I ngɔ lɛ, nɛ i ma jaje kɛ de nɔ tsuaa nɔ bɔ nɛ e kpɔɔ mi ngɛ nyakpɛ blɔhi a nɔ ɔ.