La Amɛ 72

Sɔlemi ke ha Matsɛ

1Oo Tsaatsɛ Mawu, moo ye kɛ bua matsɛ ɔ, nɛ e kojo bɔ nɛ o suɔ, nɛ o ye kɛ bua e bi ɔ, nɛ e nyɛɛ ngɛ dami nya. 2Moo ye kɛ bua lɛ nɛ e kojo o we bi ɔmɛ, kɛ ohiafo ɔmɛ tete ngɛ dami nya. 3Mo ha nɛ yoku ɔmɛ a ba ni ngɛ e matsɛ yemi kpakpa he je. 4Moo ye kɛ bua lɛ nɛ e fa ohiafohi kɛ nihi nɛ e fi mɛ ɔ a he, nɛ e kpata a haoli ɔmɛ a hɛ mi. 5Mo ha nɛ ohiafo ɔmɛ kɛ nihi nɛ e fi mɛ ɔmɛ, a ba a he si kɛ ha mo daa be fɛɛ be, be abɔ nɛ pu kɛ nyɔhiɔ ngɛ Hiɔwe nɛ ɔ.

6Mo ha nɛ ye bi nɛ ɔ e matsɛ yemi ɔ nɛ e hi, nɛ e wo yiblii kaa bɔ nɛ hiɔmi nɛɛ kɛ pueɔ nga amɛ a nɔ nɛ a peeɔ mlɔmlɔɔmlɔ ɔ, aloo bɔ nɛ hiɔmi fiaa nɛ e haa zugba a he jɔɔ ɔ. 7Nimli kpakpahi kulaa a ya nɔ ngɛ e matsɛ yemi ɔ mi, nɛ a na tue mi jɔmi babauu kɛ ya nyagbe. 8Mo ha nɛ e matsɛ yemi ɔ nɛ je wo nya kɛ ya wo nya, kɛ je Yufrate Pa a nya kɛ ya si zugba a nyagbe he. 9Si kpali ngɛ zugba a nɔ ɔ, a kpla si kɛ ha lɛ; nɛ e he nyɛli ɔmɛ a ngɔ a hɛ mi kɛ bu si. 10Nɛ matsɛmɛ nɛ ngɛ Mediteranea wo ɔ nya, kɛ matsɛmɛ nɛ je Tarsis kɛ wo kpɔ ɔmɛ a nɔ ɔ, kɛ ni nɛmɛ nɛ je Sheba kɛ Seba a, a ngɔ nike ni kɛ ba ha lɛ. 11Matsɛmɛ nɛ ngɛ he fɛɛ he ɔ maa ba a he si kɛ ha lɛ, nɛ mɛ tsuo a ma sɔmɔ lɛ.

12E maa hyɛ nihi nɛ be nɔ́ ko ɔmɛ, kɛ ohiafo ɔmɛ a nɔ, ke a kpa ngmlaa kɛ tsɛ lɛ ɔ, ejakaa a be nɔ kpa ko nɛ ma fa a he. 13Gbɔjɔli ɔmɛ kɛ nihi nɛ e fi mɛ ɔmɛ a he mɔbɔ maa pee lɛ nɛ e maa ye kɛ bua mɛ. 14E ma je mɛ kɛ je nɔ yemi yaya kɛ basabasa mi, ejakaa a wami he jua wa ha lɛ.

15E yi ma na wami, nɛ a maa ngɔ Sheba sika tsu ɔ kɛ ha lɛ. Nihi maa sɔle kɛ ha lɛ be fɛɛ be. E nimli ɔmɛ ma je e yi kɛ je mɔtu kɛ ya si gbɔkuɛ. 16Moo jɔɔ wɔ kɛ ngmɔ ni babauu ngɛ zugba a kulaa nɔ, kɛ yoku ɔmɛ tete a nɔ. Tso yiblii nɛ ba kaa Lebanon ni ɔmɛ; nɛ ma amɛ a mi nɛ hyi tɔ kaa bɔ nɛ zugba a nɔ nga ngɛ ɔ. 17A wo e biɛ hɛ mi nyami daa; e biɛ kpakpa nɛ hi si daa kaa bɔ nɛ pu ngɛ ɔ, nɛ e mi a je kɛ jɔɔ je ɔ tsuo; nɛ mahi tsuo a je e yi.

18A je Yehowa Israel Mawu ɔ yi, nɔ nɛ lɛ pɛ e tsuɔ nyakpɛ níhi ɔ. 19A je e anunyami biɛ ɔ yi kɛ ya neneene. Zugba a tsuo nɛ hyi tɔ kɛ e anunyami ɔ! Amen, Amen.

20David, Isai bi ɔ, sɔlemi la amɛ a nyagbe ji enɛ ɔ nɛ.