La Amɛ 46

Mawu, wa he wami kɛ wesa he

1Mawu ji wa wesa he kɛ wa he wami. Lɛ e yeɔ kɛ buaa wɔ ngɛ wa haomi behi a mi. 2Enɛ ɔ he je ɔ, ke je ɔ hɛ mi kpata, nɛ yokuhi hia kɛ ya nɔ wo mi tete, wa be gbeye yee. 3Ke wo ɔmɛ gli nɛ yokuhi hoso po, wa be gbeye yee.

4Pa ko ngɛ wa Mawu ma a mi nɛ haa nɔ bua jɔmi. Lejɛ ɔ ji Mawu Ope ɔ sihi he klɔuklɔu. 5Akɛnɛ Mawu nitsɛ sihi he ji jamɛ a ma a he je ɔ, ke haomi ko na lɛ ɔ, ke zugba hoso tete, e be he nue, Mawu maa ye kɛ bua lɛ oya. 6Mahi naa abofu nɛ a gliɔ, se ke Mawu wo gbi ɔ, zugba a he jɔɔ dii nɛ nɔ yemihi a hɛ mi kpataa.

7Yehowa, tahi a Mawu ɔ kɛ wɔ ngɛ. Yakob Mawu ɔ ji wa wesa he. 8Nyɛɛ ba, nyɛɛ ba nɛ nyɛ ba hyɛ nyakpɛ níhi nɛ wa Mawu ɔ tsu ɔ, bɔ nɛ e kpataa je ɔ hɛ mi. 9E gbee tahi a nya ngɛ je ɔ mi tsuo. E kuɔ ta hwumi níhi dukuduku nɛ e saa mɛ la. 10“Nyɛɛ pee dii! Nyɛɛ le kaa Ami ji Mawu Ope ɔ! Je ɔ tsuo maa wo ye hɛ mi nyami.”

11Yehowa, tahi a Mawu ɔ kɛ wɔ ngɛ. Yakob Mawu ɔ ji wa wesa he.