La Amɛ 136:1

Mawu yi jemi

1Oo, nyɛɛ na Neneene Tsɛ ɔ si; ejakaa e hi, nɛ e suɔmi ngɛ daa.

2Nyɛɛ na mawuhi a Mawu ɔ si, ejakaa e suɔmi ngɛ daa. 3Nyɛɛ na nutsɔhi a Nutsɔ ɔ si, ejakaa e suɔmi ngɛ daa. 4Nɔ nɛ lɛ pɛ nɛ e tsuɔ nyakpɛ ni nguahi ɔ, ejakaa e suɔmi ngɛ daa. 5Nyɛ je e yi, nɔ nɛ bɔ hiɔwe ɔmɛ kɛ je e nile mi, ejakaa e suɔmi ngɛ daa. 6Nɔ nɛ gba zugba a kɛ wo ɔmɛ a kpɛti ɔ, ejakaa e suɔmi ngɛ daa. 7Nɔ nɛ bɔ pu kɛ nyɔhiɔ kɛ hlami dodoe ɔmɛ, ejakaa e suɔmi ngɛ daa. 8Nɛ e ha pu tsoo ke je na, ejakaa e suɔmi ngɛ daa. 9Nɛ hlami kɛ dodoehi kpɛɔ ke je jɔ, ejakaa e suɔmi ngɛ daa. 10Nɔ nɛ gbe Mizraim nimli kɛ lohwehi a kekle bihi, ejakaa e suɔmi ngɛ daa. 11Nɛ e je Israel kɛ je a kpɛti ɔ, ejakaa e suɔmi ngɛ daa. 12Nɔ nɛ kɛ kɔni si wami tsu kikɛmɛ a ni nɛ ɔ, ejakaa e suɔmi ngɛ daa. 13Nɔ nɛ ha nɛ Wo Tsutsu ɔ mi gba nɛ e je blɔ ha mɛ ɔ, ejakaa e suɔmi ngɛ daa. 14Nɛ e kpaka mɛ kɛ manye kɛ gu kpɛti kɛ be ɔ, ejakaa e suɔmi ngɛ daa.

15Se e ha nɛ Farao ta a tlɔ wo ɔ mi, ejakaa e suɔmi ngɛ daa.

16Nɔ nɛ kpaka e nimli ɔmɛ kɛ gu nga a nɔ́ ɔ, ejakaa e suɔmi ngɛ daa. 17Nɔ nɛ gbe matsɛ nguahi, ejakaa e suɔmi ngɛ daa. 18Nɛ e kpata matsɛhi nɛ he biɛ a hɛ mi ɔ, ejakaa e suɔmi ngɛ daa. 19Amor bi a matsɛ Sihon, ejakaa e suɔmi ngɛ daa.

20Kɛ Bashan bi a matsɛ Og, ejakaa e suɔmi ngɛ daa. 21Nɛ e wo a zugba a ngɔ ha Israel kaa gbosi ni, ejakaa e suɔmi ngɛ daa. 22Kaa gbosi ni kɛ ha e sɔmɔlɔ Israel, ejakaa e suɔmi ngɛ daa.

23Lɛ nɔ nɛ kai wɔ benɛ wa gbɔjɔ ɔ, ejakaa e suɔmi ngɛ daa. 24Nɛ e kpɔ wɔ kɛ je wa he nyɛli ɔmɛ a dɛ mi ɔ, ejakaa e suɔmi ngɛ daa.

25Lɛ nɔ nɛ e lɛɛ nɔ́ tsuaa nɔ nɛ woɔ mumi ɔ, ejakaa e suɔmi ngɛ daa. 26Oo, nyɛ wo sina kɛ ha Hiɔwe Mawu ɔ, ejakaa e suɔmi ngɛ daa.