La Amɛ 135

Mawu yi jemi

1Nyɛ je Tsaatsɛ Mawu yi! Nyɛ je e biɛ ɔ yi! Nyɛ e sɔmɔli ɔmɛ tsuo nyɛ wo yi jemi kɛ ha lɛ. 2Nyɛ je Yehowa yi, nyɛ nihi nɛ daa si ngɛ Tsaatsɛ Mawu We ɔ. 3Nyɛ je Neneene Tsɛ ɔ yi, ejakaa e hi; nyɛ la kɛ je e biɛ ɔ yi, ejakaa e mi mi jɔ. 4E hla Yakob kɛ ha e he; lɛ nitsɛ e nihi ji Israel bi ɔmɛ.

5I le kaa wa Mawu ɔ kle, e kle hluu pe mawuhi kulaa. 6Nɔ nɛ e suɔ ɔ, lɔ ɔ nɛ e peeɔ ngɛ hiɔwe kɛ zugba a nɔ, kɛ wo ɔmɛ a hehi nɛ kuɔ ɔmɛ. 7E haa nɛ bɔ kuu woɔ ngɛ je ɔ mi tsuo; nɛ hiɔwe paa la; nɛ kɔɔhiɔ fiaa kɛ jee e je he. 8Lɛ nɛ e gbe Mizraim bi tɛte kɛ dede ɔmɛ, kɛ lohwehi a kekle bihi tsuo. 9Nɛ e ha okadihi kɛ nyakpɛ níhi ba Farao kɛ e we bi ɔmɛ tsuo a nɔ. 10E kpata mahi a hɛ mi nɛ e tane matsɛmɛ he wali a yi. 11Nɛ ji Sihon, Amor bi ɔmɛ a matsɛ ɔ, kɛ Og nɛ ji Bashan matsɛ ɔ, kɛ Kanaan matsɛ ɔmɛ tsuo. 12Nɛ e wo a zugba amɛ kɛ ha e ma Israel kaa gbosi ni.

13Oo Yehowa, o biɛ maa hi si daa; nɛ a ma kai mo kɛ ya yi nɔhi kulaa. 14Yehowa maa wo e nimli ɔmɛ nguɔ nɛ e maa na e sɔmɔli ɔmɛ mɔbɔ.

15Ma je li ɔmɛ jaa sika hiɔ kɛ sika tsu amagahi nɛ nimli pee. 16Amagahi nɛ ngɛ nya, se a tui munyu; a ngɛ hɛ ngmɛ, se a hyɛ we nɔ. 17A ngɛ tue, se a nui nɔ; nɛ a nyɛ we mumi tete womi. 18A ngɛ kaa nihi nɛ pee mɛ kɛ nihi nɛ woɔ a hɛ kɛ fɔɔ a nɔ ɔ!

19Oo Israel, mo je Yehowa yi! Aaron we osɔfo ɔmɛ, nyɛ je e yi. 20Levi we, nyɛ je Yehowa yi! Nyɛ nihi tsuo nɛ nyɛ yeɔ Yehowa gbeye ɔ, nyɛ je e yi. 21Nyɛ Yerusalem bihi tsuo nyɛ je Neneene Tsɛ ɔ yi, ejakaa Yerusalem ji e sihi he. Nyɛ je Tsaatsɛ Mawu yi!