Dhankavi Bible
गिनती 34
कनान देश न सीमाएँ
ओळतेन योहोवा मूसा सि कोयो, इसराएलियान क यो हुकुम आप : जव तुमु कनान मा पुगसे, जो देश तुमरा वाटान होयसे हुयो ते च्यारू मेर सिमा क कनान देश छे, ती तुमरो दक्षिणी प्रांत सीन नावोन जंगल सी लीन एदोम देश क किनारे-किनारे होये चाली जाय, आरू तुमरा दक्षिणी सीमा खारला दरियान काठा पोर सुरू होईन बुडेवने क भिनी चाले; होंया सी तुमरी सीमा अक्रब्बीम नावोन चोढ़ाई क दक्षिण क भीनी पुगिन वोवे, आरू सीनाय लोगून आवे, आरू कादेशबर्ने क दोखेवरे क भिनी निकळे,आरू हसरद्दार लोगुन वोदीन अस्मोन लोगुन पुगे; ओळतेन हुये सीमा अस्मोन सी फिरीन मिस्र क नाळे लोगुन पुगे, आरू आखरी दोरिया क काठो रय।
ओळतेन बुडेवने सीमा महादोरिया होय; तुमरे बुडेवनी सीमा यित कोहाये। “तुमरी उत्तरी सीमा यीत् होये, यानी तुमू महादोरीया सी लीन होर बोयडे लोगुन सीमा बाँदजू; आरू होय बोयड़ा सी हमात क घाटि लोगुन सीमा बाँदजू, आरू हुयो सदाद पर निकळे; आरू हयो सिमा जिप्रोन लोगुन पुगे, आरू हसरेनान पोर निकळे; तुमरी उत्तरी सीमा योत कोहायसे।
“ओळतेन आपनी उगेवनी सीम हसरेनान सी शपाम लोगुन बादजू; आरू हुये सीमा शपाम सी रिबला लोगुन , ऐन क उगेवने क औख्ये छे, नेचा क उतरता-उतरता किन्नेरेत नावोन दोरीया क बुडेवनी सी लाग जाय आरू हुये सीमा यरदन लोगुन उतरीन खारा दरिया क तट पोर निकळे। तुमरा देश क च्यारू सीमाएँ येत कोहायसे।”
तब मूसा न इसराएलियों सी ओळी कोयो, “ जेना देश क तुमू चिट्ठी नाखीन होकदारीयो होयसे, आरू योहोवा न हेनाक साढ़े नोव कुळ क मानसे क आपने क हुकुम आपे छे हुये येत छे; बाखुन रुबेनियो आरू गादियो क कुळ त आपना आपना पितरो क कूलो क ओनसारे आपनो आपनो वाटो पाय चुके छे, आरू मनश्शे क आदा कुळ क मानसे वी आपनो वाटो पाय चुके छे; यानी हेनू ढाई कुळ क मानसे यरीहो क पास यरदन क पार उगेवने दिसा मा, जाँ दाहडु उगे छे आपना आपना वाटो पाय चुके छे।”
जागा वाटने वाला डाहला
ओळतेन योहोवा न मूसा सि कयो, “ज मानसे तुम मानसो क लिय हेना देश क वाटसू ओक नाव ये छे : एलीआजर याजक आरू नुन क पुर्य यहोशू। आरू जागान क वाटने करता हेनकी मदत करने करीन एक एक कुळन एक एक डाहलो मेकजी। आरू हेनू मानसो क नाव यै छे : यहूदा गोत्र योपुन्ने क पुर्य कालेब, शिमोन कुळ अम्मीहूद क पुर्य शमूएल, बिन्यामीन कुळ किसलोन क पुर्य एलीदाद, दानन कुळन डाहलो योग्ली क पुर्य बुक्की, यूसुफियों मासी मनश्शेइयो क कुळ क डाहलो एपोद क पुर्य हन्नीएल, आरू एप्रैमियो क कुळ क डाहलो शिप्तान क पुर्य कमूएल, जबूलूनियो क कुळ क डाहलो पर्नाक क पुर्य एलीसापान, इस्साकारियों क कुळ क डाहलो अज्जान क पुर्य पलतीएल, आशेरियों क कुळ क डाहलो शलोमी क पुर्य अहीहूद, आरू नप्तालियों क कुळ क डाहलो अम्मीहूद क पुर्य पदहेल।” जिना मानसो क योहोवा न कनान देश क इसराएलियों क लिय वाटने क हुकुम आप्योच येत छे।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.