Dhankavi Bible
गिनती 2
टुळा मा कुळन लेन
ओळतेन योहोवा न मूसा आरू हारून सी कोयो, इसराएली मिलापवाले तम्बू क च्यारू मेर आरू ओका ओगोळ आपना-आपना झोन्डा आरू आपनअ-आपना पितरो क घोराना क सोहलानी न धोड़े आपसा डेरान क उबो कोरे। आरू जे उगेवने ओखे क भेनी जाँ दाहड़ू उग्ये, आपना-आपना टुळा क ओनसारे डेरो उबो कोरे, चेत यहूदा क टुळान झोन्डान लोगहन हसे, आरू ओका डाहला अम्मीनादाब क पुर्य नहशोन होयसे, आरू ओका टुळा क गिनला मानसो चौहत्तर हजार छ: सौ छे। हेको धोड़े जे डेरा उबा कोर्या कोरे हुये इस्साकार क कुळ क होय, आरू हेको डाहलो सूआरन पोर्यो नतनेल हुयसे, आरू ओका टुळा क गिनला मानसे चौवन होजार चार सौ छे। ओका पास जबूलून क कुळ वाळा रोहसे,आरू ओको डाहलो हेलोन क पुर्य एलीआब होयसे, आरू हेका टुळान क गिनायला मानसे सत्तावन होजार चार सौ छे। इन रीते सी यहूदा न टुळा मा जतरा आपना-आपना टुळा क ओनसारे गिनायला हुये मेळीन एक लाख छियासी हजार चार सौ छे।पेहले येत चाल्या कोरे। दक्षिण भेणी रुबेन क टुळान झुण्ड क मानसे आपसा-आपसा टुळा क ओनसारे रोहे, आरू ओको डाहलो शदेऊर क पुर्य एलीशूर होयसे, आरू ओका टुळा क गिनायला मानसे छियालीस होजार छे। ओका पास जे डेरो उबो कोर्या कोरे हूये शिमोन क कुळ क होयसे, आरू ओको डाहलो सूरीशद्देन क पुर्य शलूमीएल होयसे, आरू ओका टुऴा क गिनायला मानसे उनसठ हजार तीन सौ छे। ओळतेन हेनको पास गाद क कुळ क रोहे, आरू ओको डाहलो रूएल क पुर्य एल्यासाप होयसे, आरू ओका टूळा क गिनला मानसे पैंतालिस हजार साढ़े छ: सौ छे। रुबेन क सेनान टुळा मा जत्रा आपना आपना टुळा क ओनसारे गिनायला हुये आखा मिळीन एक लाखी इक्यावन हजार साढ़े चार सौ छे। दूसरा कूच इन्दरो होये। हेका पछोळ आरू आखी सेना ठुळान बीचों बीच लेवीया क डेरा भेळ मिलापवाले तम्बू क अगोळ चाल्या करे; जेरे क्रम सी हुये डेरा उबा कोरे ओकात क्रम सी हुये आपना-आपना जागा पोर आपना-आपना झुण्ड क धोड़े-धोड़े चाले। बुडेवने क भेनी एप्रैम क सेनान टुळान क झोनडा क मानसे आपना-आपना टुळा क ओनसारे योहे आरू ओका डाहला अम्मीहूदन क पुर्य एलीशामा होयसे, आरू ओका टुळा क गिनायला मानसे साढ़े चाळीस होजार छे। हेरे धोडे मनश्शे क कुळ क रोहे, आरू ओको डाहलो पदासूर क पुर्य गमलीएल होयसे, आरू ओका टुळा क गिनायला मानसे बत्तीस होजार दुय सौ छे। ओळतेन बिन्यामीन क कुळ क रोहे, आरू ओको डाहलो गिदोनी क पुर्य अबिदान होयसे, आरू ओका टुऴा क गिनायल मानसे पैंतीस हजार चार सौ छे। एप्रैम क डेरा मा जोतरा आपना-आपना टुळा क ओनसारे गिनायला हुये सब मिलीन एक लाख आठ हजार एक सौ मानसे छे। तीसरा कूच इंदरो होये। “बोखवरे भिनी दान क सेनान टुळान क झौनडा क मानसे आपना-आपना टुळा क ओनसारे योहे आरू ओको डाहलो अम्मीशद्दैन क पुर्य अहीएजर होयसे, आरू हेनदरा टुळा क गिनायला मानसे बासठ हजार सात सौ छे। आरू ओका पास जे डेरा उबा कोर्या हुये आशेर क कुळ क रोहे, आरू ओको डाहलो ओक्रान क पोर्यो पगीयेल हुयसे, आरू हेनदरा टुळा क गिनायला मानसे साढ़े इकतालिस हजार छे। औळतेन नप्ताली क कुळ क रोहे, आरू ओको डाहलो एनान क पुर्य अहीरा होयसे, आरू हेनदरा टुळा क गिनायला मानसे तेरपोन हजार चार सौ छे। आरू दानन सेनान टुळा मा जोतरा गिनायला चे सब मिलीन एक लाख सत्तावन हजार छ: सौ छे, ये आपना-आपना झौनडा क पास-पास होईन आखासी पोछोळ चालीया कोरे।” इसराएलियो मासी जो आपना-आपना पितरो क घोराना क ओनसारे गिनायला हुये येत छे; आरू सब सेनान टुळान क जतरा मानसे आपना-आपना टुळा क ओनसारे गिनायला हुये मिलीन छ: लाख तिन हजार साढ़े पाच सौ हुता। बाखुन योहोवा न मूसा क हो हुकूम आप्यो हुतो ओकेज ओनसारे लेवीय ते इसराएलियो मा गिनाया नी गोया। ओस कोरीन जो-जो हुकूम योहोवा न मूसा क आप्यो हुतो, इसराएली हेनू हुकूम क ओनसारे आपना-आपना कुळ आरू पितरो क घोरना क ओनसारे , आपना-आपना झुण्ड क पास डेरो उबो कोरतला आरू अगा बढ़ता हुता।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.