Dhankavi Bible
गिनती 1
इसराएलिया लोगहनन पेहली गिनती
इसराएलियान मिसर देश मा सी निकळीन जानेन दूय सालन दिसरे मयनेन पेहले दाहड़े, योहोवा परमेश्वर सीनाय नवान बयड़ा मा मेळभेटन तम्बू मा मूसा सी कयो, “इसराएलियान सारी मण्डळीन जातीन आरू वेगला डाहडान घरानान अनसारे, एक-एक ओदेमड़ान नाव ली लीन गिनती करजी। जतरा इसराएली वीस साल नी ते ओका सी जादा उमरन हय आरू जो लड़ाय करने लायक छे, हेनू सबन क टुळान क तू आरू हारून हेनूक गिन लेय। आरू तुमरे सात मा हर एक कुळन एक एक ओदेमड़ो हुयनो जुळे जो आपसा घरन डाहलो हय; जो तुमरी मद्त करसे इन लोगहन को नाव या छे; रुबेनन कुळ मा सी शदेऊरन पोर्यो एलीशूर; शिमोनन कुळ मा सी सूरीशद्देन पोर्यो शलूमीएल; यहूदान कुळ मा सी अम्मीनादाबन पोर्यो नहशोन; इस्साकारन कुळ मा सी सूआरन पोर्यो नतनेल; जबूलूनन कुळ मा सी हेलोन को पोर्यो एलीआब यूसुफन पोर्या मा सी या छे, मतलब कि एप्रैमन कुळ मा सी अम्मीहूदन पोर्यो एलीशामा, आरू मनश्शेन घराना मा सी पदासूरन पोर्यो गमलीएल; बिन्यामीनन कुळ मा सी गिदोनीन पोर्यो अबिदान; दानन कुळ मा सी अम्मीशद्दैन पोर्यो अहीएजर; आशेरन कुळ मा सी ओक्रानन पोर्यो पगीयेल; गादन कुळ मा सदी दूयेलन पोर्यो एल्यासाप; नप्तालीन कुळ मा सी एनानन पोर्यो अहीरा।” मण्डळी मा सी जो ओदमी आपसा-आपसा आड़ा बुड़ान कुळोन डाहडा हुईन हेनको बुलाया, त्या या छे, आरू या इसराएलीयान दिसरी मण्डलीया मा मुखी ओदेमड़ा हुता। जिनु ओदेमड़ान नाव उपर लिखला छे हेनको सात मा लीन मूसा आरू हारून, दिसरे मयनेन पेहले दाहड़े सारी मण्डळीन, तव इसराएलीया आपसी-आपसी जातीन आड़ा बुड़ान घराना अनसारे वीस साल या ओका सी जादा उमर वाळान नावन गिनती करावीन आपसा-आपसा पोर्यान क नाव लिखाड़ीया; जिनीये रीतिये योहोवा भगवान मूसा को हुकुम आपलो हुतो ओकात् अनसारे सीनाय बयड़ा मा हेनकी गिनती करीया। आरू इसराएलन पेहल खुळीया रुबेनन जातीन जतरा ओदेमड़ा आपसा कुळन आरू आड़ा बुड़ान घराना अनसारे वीस सालन या ओका सी जादा सालन हुता आरू लड़ाय करे हसला, त्या सब आपसा-आपसा नाव गिनाय गीया; आरू रुबेनन घोरानान गिनायला ओदेमड़ा चाळीस ने छव हजार हुता। शिमोनन वंशन लोगहन जतरा आपसी जातीन घरानान अनसारे वीस सालन ओका सी जादा उमरन हुता, आरू जो लड़ाय कर सके हलान सब आपसा-आपसा नाव सी गिनाय गीया; आरू शिमोनन कुळन गिनायला ओदेमड़ा पचास ने नोव हजार तीन सोव हुता। गादन वंशन जतरा ओदेमड़ा आपसी जातीन आरू आपसा आड़ा बुड़ान घराना अनसारे वीस सालोन या ओका सी जादा उमरन हुता आरू जो लड़ाय करे हसला हुता, त्या सब आपसा-आपसा नाव सी गिनाय गीया: आरू गादन कुळन गिनायला ओदेमड़ा चाळिसस ने पाच हजार छव सोव ने पचास हुता। यहूदान अवलियाद जतरा आपसी जातीन घरानान अनसारे वीस साल या ओका सी जादा उमरन हुता आरू जो लड़ाय करे हसला हुता, त्या सब आपसा-आपसा नाव सी गिनाय गिया। आरू यहूदा कुळन पोर्यान गिनायला ओदेमड़ा सत्तर ने च्यार हजार हुता। इस्साकारन वंशन जतरा ओदेमड़ा आपसी जातीन आरू आपस आड़ा बुड़ान घरानान अनसारे वीस सालन या ओका सी जादा उमरन हुता आरू लड़ाय करे हला हुता,त्या सब आपसा ना सी गिनाय गीया; आरू इस्साकारन कुळन गिनायला ओदेमड़ा पचास ने च्यार हजार ने च्यार सोव हुता। जबूलूनन अवलियादन जतरा ओदेमड़ा आपसा कुळन आरू आपसा आड़ा बुड़ान घरानान अनसारे वीस साल या ओका सी जादा उमरन आरू जो लड़ाय करे हसला हुता, त्या सब आपसा-आपसा नाव सी गिनाय गिया। आरू जबूलूनन जातीन गिनायला ओदेमड़ा पचास ने सात हजार ने च्यार सोव हुता। यूसुफन पोर्या मा सी एप्रैमन पोर्यान जतरा ओदेमड़ा आपसा कुळन आरू आपसा आड़ा बुड़ान घरानान अनसारे वीस सालन या ओका सी जादा उमरन हुता आरू जो लड़ाय करे हला हुता, त्या सब आपसा-आपसा नाव सी गिनाय गीया; आरू एप्रैमन जातीन गतिनायला ओदेमड़ा चाळीस हजार पाँच सौव हुता। युसूफन पोर्यान मनश्शेन वंशन जतरा ओदेमड़ा आपसा कुळन आरू आपसा आड़ा बुड़ान घरानान अनसारे वीस सालन या ओका सी जादा उमरन हुता आरू लड़ाय के हसला हुता, त्या सब आपसा-आपसा नाव सी गिनाय गीया। आरू मनश्शेन कुळन गिनायला ओदेमड़ा बत्तीस हजार ने दूय सोव हुता। बिन्यामीनन वंशन जतरा ओदेमड़ा आपसी जातीन आरू आपसा आड़ा बुड़ान घरानान अनसारे वीस सालन या ओका सी जादा उमरन हुता आरू जो लड़ाय करे हसला हुता, त्या सब आपसा-आपसा नाव सी गिनाय गीया; आरू बिन्यामीनन कुळन गिनायला ओदेमड़ा पयतीस हजार ने च्यार सोव हुता। दानन वंशन जतरा ओदेमड़ा आपसी जातीन आरू आपसा आड़ा बुड़ान घरानान अनसारे वीस सालन या ओका सी जादा उमरन हुता आरू जो लड़ाय करे हसला हुता, त्या सब आपसा-आपसा नाव सी गिनाय गीया। आरू दानन कुळ गिनायला ओदेमड़ा बावसाठ हजार ने सात सोव हुता। आशेरन वंशन जतरा ओदेमड़ा आपसी कुळ आरू आपसा आड़ा बुड़ान घरानान अनसारे वीस सालन या ओका सी जादा उमरन हुता आरू जो लड़ाय करे हसला हुता, त्या सव आपसा-आपसा नाव सी गिनाय गिया। आरू आशेरन जातीन गिनायला ओदेमड़ा साढी इकताली हजार हुता। नप्तालीन वंशन जतरा ओदेमड़ा आपसी जातीन आरू आपसा आड़ा बुड़ान घरानान अनसारे, वीस साल या ओका सी जादा सालन जता आरू जो लड़ाय कर हला हुता, त्या सब आपसा-आपसा नाव सी गिनाय गीया। आरू नप्तालीन कुळ गिनायला ओदेमड़ा तिरपन हजार च्यार सोव हुता। इनीये रीतिये मूसा आरू हारून आरू इसराएलन बारेह जातीन डाहडा मेळीन, जो आपसा-आपसा आड़ा बुड़ान घरानान मुखी हुता,हेनु सबन को गिनीया आरू हेनकी गीनती यीत् हुती। आरू जतरा इसराएली वीस सालन या ओका सी जादा उमरन हुयनेन कारण जो लड़ाय कर हसला हुता त्या सब आपसा आड़ा बुडान घरानान अनसारे गीनाया, आरू त्या सब गिनायला ओदेमड़ा छव लाख ने तीन हजार साढ़ी पाच सोव हुता।
इनु मा लेवी आपसा अड़ा बुड़ान जातीन अनसारे नी गिनाया। काहकी योहोवा भगवान मूसा सी कयलो हुतो, “ लेवी कुळन गिनती इसराएलीयान सात मा नी करनो; पुण तू लेवी कुळन लोगहन क गवाहन तम्बू पर, आरू ओका सारा समान पर , मतलब जो काय ओका सी नातो राखे उना पर हकदारीयो बनावजी; आरू सारा समान को सात मा ताम्बा क त्या हाकलीया करे, आरू त्यात् ओका मा सेवा चाखरी बी करीया करसे, आरू तम्बून आड़े-धोड़े त्या आपसा डेरा न्हाकीया करसे। आरू जव-जव तोम्बा क उबो करनो हय ती तव-तव लेवीया उको नेड़ा पाड़ देय, आरू जव-जव तोम्बा क उबो करनो हय तव-तव लेवीयात् उको उबा करीया करसे; आरू कदाम कोय बाहरला पास मा आवे ती ती ओकी सजा मोत छे उको मार न्हाकजो। आरू इसराएली आपसा-आपसा डेरा आपसा-आपसा टुळा मा आरू आपसा-आपसा झेण्डान क पास मा उबा करीया करे; पर लेवीया हेनका डेरा तम्बून च्यारो मेर उबा करीया करे, कदाम असो नी हुय जाय कि इसराएलीयान मण्डळी पर म्हारी रीस भड़की उठे; आरू लेवीया गवाहन तम्बून राकवाळी करीया करे।” जो हुकुम योहोवा भगवान मूसाक आपलो हुतो, इसराएलीया ओकत् अनसारे करीया।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.