Dhankavi Bible
लैव्यव्यवस्था नी कीताब 6
पछु योहोवा मूसा सी कयो, “कदाम कोय योहोवा सी विश्वासघात करीन पापी ठरसे, जोसो की धरोहर, या लेनदेन, या लूट क विषय मा आपना भाईस्यक साथे कपट करे, या ओका पर आंधारो करे, या पड़ रयली चीज जड़े ती हेका वारा मा झूठ बुले आरू झूठी कसम बी खाय; ओसी कुई भी वात काह नी होय जेको करीन मानुस पापी ठरतु छे, ते जव चु ओसो काम करीन दोषी होय जाय, तव जु भी चीज ओको लुट्यो, या आंधारो करीन, या धरोहर, या खुवायली चीज जो हेको जोड़ली हय ; चाहे काहनी भी चीज काह नी होय जेका विषय मा उको झूठी शपथ खादली होसे; ते ची उको सब वापस कर दे, आरू पाचवु भाग भी बढ़ावीन भर दे, जेके दाहड़े यो मालुम होसे की चु दोषी छे उके दाहड़े चु उका चीज क ओका स्वामी क वापस कर दे। आरू चु योहोवा क सामने आपना दोषबलि भी ली आया, मतलब एक पूरो आरेगलो गाडरा दोषबलि क करता याजक क जु ली आया, चा ओतरी कीमत होय जोतरो याजक ठरावसे। ओका प्रकार क याजक उकान करता योहोवा क सामने पश्चाताप करे, आरू जेका काम क करीन चु दोषी होय गया छे उकाह मापी जोड़से।”
भाँति-भाँति न बलिदान क विधि
होमबलि
आरू योहोवा मूसा सी कयो, “हारून आरू ओकान पोर्या क हुकुम आपीन यो कयो की होमबलि क व्यवस्था यी छे: होमबलि भाट्टीन ऊपर रात भर भोर तक वेदी पर पवड़ा रवे, आरू वेदी क आगठो वेदी पर धोपती रवे। आरू याजक आपना सनी क छिंदरा आरू आपना डील पर आपनी झारली जाँघिया पेहरीन होमबलि क मेक, जी आग्ठा सी भस्म करने सी वेदी पर रय जाय, ओका उठावीन वेदीन धड़े मेक दे। तव चु आपना छिंदरा उतारीन दिसरा छिंदरा पेहरीन रूखड़ा क पड़ाव सी बाहरते काहना शुद्ध स्थान पर ली जाय। वेदी पर आगठो धोपतो रवे, आरू कभी उलवायने नी जुवे; आरू याजक हर एक दाहड़े पहाटे उका पर लाकड़ा धोपाड़ीन आग्ठान बलि क टुकड़ा क ओकान ऊपर सजाड़ीन धर दे, आरू ओकान ऊपर मेलबलिया क चरबा क धोपाड्या करे। वेदी पर आगठो लगातार धोपतो रवे; चो कभी बुझायनो नी जुवे।
अन्न भेंट
“अन्नबलि क व्यवस्था इना गत छे: हारून क पोर्यो ओकाह वेदी क सामने योहोवा क सामने ली आया। आरू चु अनाज बलिन तेल भेस्कायलो मयदा मा सी मुठ भरीन आरू उका परलो सब लोबान उठावीन अनाजन बलि क यादन ओका भाग क योहोवा क सामने सुखदायक सुगन्ध क करता वेदी पर धोपाड़े। आरू ओका मा सी जो शेष रय जाय ओका हारून आरू ओकान पोर्या खाय; चु बिना खमीर चुखलीजागा मा खाया जासे, मतलब चा मिलापवाळा तम्बू क आंगना मा उका खाये। चो खमीर क साथे रांदनो नी; काहकी हाव आपना हव्य मा सी उकाह ओकान निज भाग होयने क करता हेका देदा छे; एरकरता जोसो पापबलि आरू दोषबलि घण चुखो छे, तोसोज चो भी छे। हारून क वंश क सब मानुस उका मा सी खाय सकता छे, तुमरी पीढ़ी मा योहोवा भगवान क हवन मा सी यो उकान भाग हमेशा बवनो रवसे; जु कुई उना हवनो क हाथ लागाड़े चु चुखलु ठरसे।” पछु योहोवा मूसा सी कयो, “जेके दाहड़े हारून क अभिषेक होसे उके दाहड़े चु आपना पोर्या क साथे योहोवा क यो चढ़ावु चढ़ायु; मतलब एपा क दसवु भाग मयदो नित्य अनाज बलि मा चढ़ाया, उका मा सी आधो पहाटे आरू आधो सांतेन टेमे चढ़ाया। चो तवा पर तेल क साथे रांदलो जासे; जव चो तेल सी तरी होय जाय तव उका ली आवनो, ओका अनाज बलि न चुल्लो टुकड़ो योहोवा भगवान क सुखदायक सुगन्ध करता चढ़ावनो। हारून क पोर्या मा सी जु भी उका याजक पद पर अभिषिक्त होसे, वी विधि हमेशा क करता छे। की योहोवा क सामने चो सब चढ़ावो धोपाड्यो जासे। याजक क सब अनाज बलि भी सब धोपाड्या जासे; चो कभी नी खातो जासे।”
पापबलि
आरू योहोवा भगवान मूसा सी कयो, “हारून आरू उकान पोर्या सी यो कयो की पापबलि की नियम यो छे: जेका जागा मा आग्ठान बलिपशु क बलि कर्या जाता छे उका मा पापबलिपशु भी योहोवा भगवान क सामने बलि कर्या जासे; चु परमपवित्र छे।” जु याजक पापबलि चढ़ावु चु ओका खाये; चु चुखली जागा मा, मतलब मिलापवाळा तम्बू क आंगना मा काया जासे। जो काहय उकान मांस सी हाथ लागाड़े जासे, चु पवित्र ठरसे; आरू कदाम उकान लुहूय क छिटळा एकदा छिंदरा पर पड़ जाय, ते उकाह काहना चुखला जागा मा धुव देदु। आरू त्यो धुळान ठिकरा मा त्यो पाकाळलो गयो तुड़ दि जासे; कदाम चु पितवन पात्रा मा उबाळलो गयो छे, ते चो उजाळीन, आरू पाणी सी धुव देल्लो जासे। याजक मा सी सब मानसे उकाह खाय सकता छे; चु परमपवित्र चीज छे। पुन जेका पापबलिपशु क लुहूय मा सी काहय भी लुहूय मिलपवाळा तम्बू क माहयता चुखलो जागा मा पश्चाताप करने क पुगाड्या जासे, उकान मांस कभी नी खाय जासे; चो आग्ठा मा धोपाड़ दे जासे।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.