लैव्यव्यवस्था नी कीताब 5

पापबलि क कारण

1“कदाम कोय गवा हुयीन सो पाप करे की कसम खावड़ावीन पुछने पर भी की काय तु यो समळ्यू नीते जाने, आरू ची वात उजेन्‍ती नी करे, ते ओका आपना गुणान भार झेलनो पड़से। 2कदाम कोय वीटोळ चीज क भुल चुक सी हाथ लगाड़े, ते चाहे चु अशुद्ध बनैल पशु क, चाहे शुद्ध घर माहयला पशु क, चाहे अशुद्ध रेंगनेवाळा जीव-जन्तु न धड़ हय, ती त्यो वीटोळ हुयीन गुणाको ठरसे। 3निते कदाम कुई मानुस काहनी वीटोळ चीज क भुल चुक सी हाथ ले, चाहे चु वीटोळ चीज काहनी भी प्रकार करे काह नी होय जेका सी मानसे अशुद्ध होय जाता छे, ते जव चु उका वात क जाव लेसे तव चु दोषी ठरसे। 4कदाम कुई बुरो या भलो करने क बिना सोचे समझे शपथ खादा, चाहे काहना प्रकारन वात बिना-विचारे शपथ खाईन कोया, ते ओसी वात मा चु दोषी उका टेमे ठरसे जव उका मालुम होय जासे। 5आरू जव त्यो इनी वातो मा सी काहनी भी वात मा गुणेगार हय, तव जेका विषय मा ओको पाप कर्‍या होय चु ओकाह मान ले, 6आरू चु योहोवा क सामने आपनो दोषबलि ली आया, मतलब उका पाप क कारण चा एक गाडरा या बुकड़ी पापबलि करने क करता ली आया; तव याजक उका पाप क विषय पश्चाताप करे।

7“पुन कदाम उका गाडरा या बुकड़ी आपने क सामर्थ्य नी होय, ते आपना पाप क कारण दुय हुली या पेरवीन दुय पिला दोषबलि चढ़ावनेन करता योहोवान क पास मा ली आया, उनामा सी एक ते पापबलिन क करता आरू दिसरा होमबलिन क करता लावे। 8चा ओकान याजक क जु ली आया, आरू उकान मुनका गवा सी पिव्वी नाखे, पुन अलग नी करे, 9आरू चु पापबलिपशु क लुहूय मा सी वेदी क बाजु पर छिड़के, आरू जो लुहूय शेष रवे ची वेदी क पाय पर पाड्या जासे; चो पापबलि ठरसे। 10तव दिसरा चिल्ला क ची विधि क अनसारे होमबलि करे, आरू याजक ओकान पाप क पश्चाताप करे, आरू तव चा माप कर्‍या जासे।

11“पुन कदाम चा दुय हुली या पेरवीन क दुय पिल्ला भी नी आप सके, ते चो आपना पाप क कारण आपना चढ़ावु एपा क दसवु भाग मयदा पापबलि करीन ली आया; उका पर नी ते चा तेल नाख्या, आरू नी लोबान मेक्या, काहकी चो पापबलि होयसे। 12चु उकाह याजक क जु ली जावु, आरू याजक उकामा सी आपनी मुठ भरीन फोम आपावनेवाळा भाग जानीन वेदी पर योहोवा क हवनो क ऊपर धोपाड्या; चो पापबलि ठरसे। 13आरू इनी वात मा सी काहनी भी वात क विषय मा को कुई पाप करे, याजक ओकान पश्चाताप करे, आरू तव चु पाप माप कर्‍या जासे। आरू ओका पापबलि क शेष अन्नबलि क शेष क समान याजक क ठरसे।”

दोषबलि क विधि

14पछा योहोवा मूसा सी कयो, 15कदाम कुई योहोवा क चुखी करली चीजन वारा मा गलती सी विश्वासघात करे आरू पापी ठरसे, ते चु योहोवा क जु एक आरगो गाडरा दोषबलि क क करता ली आया; ओकान कीमत पवित्रस्थान क शेकेल1 क अनसारे ओतरा ज शेकेल चाँदीन होय जोतरो याजक ठरसे। 16आरू जेका चुखली चीज क विषय उको पाप कर्‍या होय, उकामा चु पाचवु भाग आरू बढ़ावीन याजक क आप; आरू याजक दोषबलि क गाडरो चढावीन उकान पाप क ढाँके, तब उकान पाप माप कर्‍या जासे। 17“कदाम कुई ओसो पाप करे के उना कामो मा सी जेका योहोवा भगवान मना कर्‍यो छे काहना काम करे, ते चाहे चु हेको आपसा गुणान भार झेलनो पड़से। 18एरकरता चु एक आरगो गाडरा दोषबलि करीन याजक क जु ली आया, चा ओतरीज कीमत क होय जोतरा याजक ठराया, आरू याजक उकान करता ओकान ओकी भूल क जा ओकाह अनजावना मा करी होई पश्चाताप करे, आरू चु माप कर्‍यु जासे। 19यी दोषबलि ठरसे; काहकी चु मानुस पाक्को योहोवा क सम्मुख दोषी ठरसे।”