Skip to content
BibleKenya

Dhankavi Bible

लैव्यव्यवस्था नी कीताब 16

पश्चातापन दाहड़ा

जव हारून न दुय पोर्‍या योहोवान सामने जाईन मर गीया, हेको बाद योहोवा मूसा सी वातु कर्यो; आरू योहोवा मूसा सी कयो, थारा भाईस हारून सी कय की पेटारा न ऊपर पश्चातापवाळा ढाकनान अगोळ, वीचमाहायला परदान माहायता, चुखला जागा मा हर टेमे नी प्रवेश करे, नी ते मर जासे; काहकी हाव पश्चातापवाळा ढाकनेक ऊपर बादल मा दिखाई देसे। जव हारून चुखलास्थान मा प्रवेश करे तव ओका रीति सी प्रवेश करे, मतलब पापबलिन करता एक केवड़ाक आरू होमबलिन करता एक गाडराक लीन आया। ची सनीन छिंदराक चुखलो चोगला, आरू आपना डील परला छिंदरान चड्डी पेहरीन, आरू सनन छिंदराक कटिबन्द, आरू सनीक छिंदरान पागड़ी भी पाणी सी ऊंगव्या करीन हेका पेहरे। पछा चा इसराएलियान मण्डलीन जु सी पापबलिन करता दुय बुकड़ा आरू होमबलिन करता एक गाडरो लेदा। तोत्यार हारून आपसा पापोन बादा चोड़ावसे एने आपसा ओळी आपसा घोराना जुगू पोसतावू कोरसे। ओळतेन हारून दुय बुकड़ा लीन भोगवानो ओगोव मिलापवावा तम्बू पोर उबू कोरसे। हारून एनू दुयु बुकड़ा जुगु चि़ट्ठी नाखसे। एक योहोवा भोगवान जुगु दिसरी ओजाजेल देवो जुगु। आरू जिना बुकड़ी पोर योहोवा भोगवानोन चिट्ठी निकळे तिनाक हारून पापोन बादा जुगु चोड़ावसे। पुन जिना बुकड़ा पोर ओजाजेलो जुगु चिट्ठी निकळे चो योहोवा भोगवानो ओगोळ जिवत्लो उबो कोरसे की तेरे पोर पोसतावू कोरे आरू तिनाक उजाड़ी मुलुक मा ओजाजेलोन जा मुकली देय तोसे। हारून तिना पापोन बादान गाडरा काजे जो हेरेत् जुगु होयसे चो धोड़े ली आवे , आरू तिनाक बादा चोड़ावीन आपसा आरू आपसा घोराना जुगु पोसतावू कोरे तोसे। आरू जो बेदी योहोवा भोगवानो ओगोव छे तेर पोरून धोपत्ला कुयला सी भोरला धुपोन टाहरा काजे लीन, आरू आपसा दुयु मुठो मा कुटला गोंदायन्या धुपो सी भोरीन, इचमा वावा पोरदा धोड़े ली आवीन तीना धुप काजे योहोवा भोगवानो ओगोव आगठा मा मेकजी, जेरेसी धुपोन धुवाडू गोवान चिट्ठी पोर पोसतावान ढाकना उपोर छावाय जाय, नी ते हुयो मोर जासे; तोत्यार हुयो गाडरान लुहुय मा गोथो इतरोक लुहुय लीन उगेवनो पोसतावान ढाकनान उपोर आपसी आंगवी सी छाट देसे, आरू ओली तेना लुहुय मा गोथो इतरोक आपसी आंगवी सी तेना ढाकना ओगोव वी सात कावा छाट देजी। ओळी हारून मानसोन कोरता पापोन बादान बुकड़ाक चोड़ावसे चो हेरा लुहयोन इचमा वावा पोरदान धोड़े ली आवे, आरू जिने रिते बुकड़ान लुहयो पुठी कोर्यू तोसुत् कोरसे, तिना लुहयोक गिनोन पाटड़ी उपोर एने हेरे ओगोव छाट देसे। आरू हुयो इसराएलीन भाति भातिन विटोळ, आरू गुना, आरू हेंदरा आखा पापोन कोरता चुखला जागा जुगु पोसतावू कोरसे; आरू मिलापवावा तम्बू जो हेरे भेव हेनाक भाति भातिन विटोवोन इचमा रोवे हेरे जुगू वी हुयो तोसोत् कोरे। जोत्यार हारून पोसतावा जुगु चुखला जागाम भोरायसे आरू जोत्यार लोगुन हुयो आपसा, आपसा घोरल्या एने आखा इसराएली मानसे जुगु पोसतावू कोरीन खोयड़े नी निकवे, ती लोगुन मिलाप वावा तम्बू मा कुदु वी मानुस उबु नी रोवे। हुयु योहोवा अगोळ वाळी वेदीन चा खोयड़े आवसे आरू हेरे जुगु पोसतावू कोरसे। हुयु गाडरा एने बकड़ान थुड़ोक लुहुय लीन वेदीन च्यारू मेर सिंगड़ा पोर लुहयोक लगाड़से। आरू उना लुहुय मा सी आंगळीये करीन सात वार लुहुय छाटसे। ओस कोरीन हुयु इसराएली मानसोन विटोळ गोथु वारु एने चुखा झोन कोरसे।

बलिन बकड़ो

जोत्यार हुयो चुखलाजागान आरू मिलापवावा तम्बू आरू बेदी जुगु पछतावो कर लेये, ती जिवतला बुकड़ाक ओगा ली आवजु; हुयो आपसु दुयु हात जिवतेला बुकड़ान मुनका पोर मेसे, आरू इसरारली सोमाजोन आखा भुण्डला काम, आरू आखा पापन क मान लेये। हुयो हेनुक बुकड़ान बुनका पोर नाख देसे, आरू तिना मानसोन हाते कोरीन, जु इना काम जुगु नेवाड़लु होयसे, बुकड़ाक उजाड़ी जागा मुकली छुड़ देसे। बुकड़ु हेन्दरा आखा ओधोरोमन कामोक आपसे उपोर हुचलिन सुनसान जागा मा ली जासे। चो मानुस बुकड़ाक उजाड़ी मुलुकोम छुड़ देसे। तोत्यार हारून मिलापवावा तम्बू मा आवसे। हुयो तेनु आखा सुतिन छिंदराक निकावीन चां मेक से जे हुयो चुखला जागाम भोरायते टेमे पेहलु होतु। हुयो चुखला जागाम पानीम उंगेवसे आरू आपसा छिन्दरा पेहरीन खोयड़े आवसे। तोत्यार हुयो आपसे एने मानसोन आगठान बादा चोड़ावसे आरू आपसे एने मानसो जुगु पोच्छाताप कोरसे। हुयो पापोन बादान वावा ढुरोन चोरबी बेदी पोर धोपाड़से। ओजाजेलोन चा बुकड़ाक ली जानेवावु मानुस आपसा छिन्दरा छुवसे आरू पानीम उंगेवसे। ओळतेनुत् चु पोड़ाव मा माहाय भोराय सोकसे। पाप बादान वाछड़ो एने पाप बादान बुकड़ो, जेरो लुहुय पोच्छाताप जुगु चुखला जागाम लावला होता, पोड़ावोन खोयड़े ली आवसे आरू चा हेन्दरा खालड़ा, मास आरू गुबोर आगठाम धोपाड़ देसे। हेनुक धोपाड़नेवावु ओदमी आपसा छिन्दरा धुवसे आरू पानीम उंगेवसे। ओळतेनुत चु पोड़ाव मा भोराय सोकसे।

पोच्‌छातापोन दाहड़ाक माननो

तुमु मानसो जुगु यी जोलोमोन रिती होयसे की सातवे मोहनेन दोसवे दाहड़े तुमु आपसा-आपसा जिव काजे उपास राखिन दुख देजु, तेने दाहड़े कुदु वी मानुस चाहाय चु यांत् वावु होय तेने तुमरे विच मा रोवने वावु होय, काम नी कोरनो जुवे; काहकी इने दाहड़े तुमरे जुगु, तुमुक चुखा कोरने कोरिन पोसतावु कोर्यु जासे। तुमु योहोवा ओगोव आपसा आखा पापो सी चुखा होय जासु। यो तुमरे जुगु बेसकु आरामोन दाहड़ु छे। तुमु आपसा काजे उपासोन लारे दु:ख देजो। यी जलोमन रिति छे। आरू जु पुजारू, आपसा बासोन जागा पोर पुजारान जागा जुगु अभिषेक आरू चुखो कोरनेन रिति कोरे, चु पुजारू पोसतावु कोर्या कोरे, एने चु चुखला सुतीन छिंदरा पेहरिया कोरोसे। होयु बेसका चुखला जागा, मिलापवावा तम्बू आरू बेदी जुगु पोसतावु कोरसे। हुयो पुजारा एने आखा मोन्डळीन मानसो जुगु वी पछतावो करे। यी तुमरे जोलोम जुगु रिति छे की इसराएली मानसे आखा पापोन कोरता हेन्दरे जुगु सालोम एक वार पोसतावु कोरे। जोसु योहोवा मुसाक हुकुम आपलु होतु, हारून वी तोसुत कोर्यु।

Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.