लैव्यव्यवस्था नी कीताब 15

शरीर क अशुद्ध स्राव

1ओळतेन योहोवा मूसु आरू हारून सी कोयु, 2“इसराएलिया सी कयु की जेका जेका ओदमीन सफेद पानी जातो होसे, ते चो प्रमेह कारण अशुद्ध ठरसे। 3चो चाहे वोहयतो रये, चाहे वोहयनु बन्द भी होसे, तेभी उकान अशुद्धता बनी रवसे। 4जेकान प्रमेह होसे चो जेका जेका खाटला पर लुटे चु अशुद्ध ठरसे, आरू जेका जेका चीज पर चु बठे भीत्यो अशुद्ध ठरसे। 5आरू जु कुई हेका खाटला क हाथ लागाड़े त्यो आपसा छिंदरा धुवीन पाणी सी उंगळ्या करे, आरू सांतो तक वीटोळ रये। 6आरू जेको प्रमेह होय आरू चा जीन चीज पर बठला छे, उका पर जा कुई बठला चा आपना छिंदरा क धुवीन पाणी सी उंगळ्या करे, आरू सांजु तक अशुद्ध ठरला रये। 7आरू जेकान प्रमेह होय उका सी जु कुई हाथ लागाड़े जासे चा आपना छिंदरा क धुवीन पाणी सी उंगळ्या करे आरू सांतो लग वीटोळ रये। 8आरू जेका प्रमेह होय कदाम चा काहना शुद्ध छिंदरा क धुवीन पाणी सी उंगळ्या करे, आरू सांतो तक वीटोळ रये। 9आरू जेका न प्रमेह होय ची सवारी क जेका चीज पर बोठ्या चो वीटोळ ठरे। 10आरू जु कुई काहनी चीज क जो उकान नेड़ा रया होसे हाथ लागाड़े, चो सांते तक अशुद्ध रये; आरू जो कुई ओसी काहनी चीज क उठावे चु आपना छिंदरा क धुवीन पाणी सी उंगळ्या करे, आरू सांतो लग वीटोळ रये। 11आरू जेका क प्रमेह होय चु जा काहना क बिना धुवीन हाथ लागाड़े चु आपना छिंदरा क धुवीन पाणी सी उंगळ्या करे, आरू सांतो लग वीटोळ रये। 12आरू जेका क प्रमेह होय चो धुवान जेका काहना पात्रा क हाथ लागाड़े तेनाक तुड़ न्हाख्या जासे, आरू काठ क सब प्रकार क पात्रा पाणी सी धुव्या जासे।

13“ओळता जेका क प्रमेह होय तेनाक जव आपना रोग सी आरगाय होय जाय, तव सी शुद्ध ठरने क सात दाहड़ा गिन लेवु, आरू उनाक वीतने पर आपना छिंदरा क धुवीन वोहयता पाणी सी उंगळ्या करे; तव चो शुद्ध ठरसे। 14आरू आठवे दाहड़े ची दुय हुली या पेरवान दुय पीला लीन मिलापवाळा तम्बू क झोपला पर योहोवा क सामने जाईन हेका पुजारा क आपे। 15तव याजक उना मा सी एक क पापबलि, आरू दीसरा क होमबलि क करता भेंट चढ़ाया; आरू याजक उकान करता उकान प्रमेह क कारण योहोवा क सामने पश्चाताप करे।

16“ओळता कदाम काहना मानस क वीर्य स्खलित होय जासे, ते चा आपना सब शरीर क पाणी सी धुवे, आरू सांतो लग वीटोळ रये। 17आरू जेका काहना छिंदरा या चामड़ा पर चा वीर्य पड़े तेनाक पाणी सी धुव्या जासे, आरू सांजु तक वीटोळ रये। 18जव कुई मानुस बायर सी सहवास करे, ते चा दुयु पाणी सी उंगळ्या करे, आरू सांतो लग वीटोळ रये।

19“ओळता जव कुई बायर‌ मासिकधरम रये, ते चो सात दाहड़े तक अशुद्ध ठरलो रये, आरू जु कुई ओका हाथ लागाड़े त्यो सांतो तक वीटोळ रये। 20आरू जव तक चो अशुद्ध रये तव तक जेका जेका चीज पर चा लुटे, आरू जेका जेका चीज पर बोठे चा सब वीटोळ ठरसे। 21आरू जु कुई ओकान खाटला क हाथ लागाड़े चु आपना छिंदरा धुवीन पाणी सी उंगळ्या करे, आरू सांतो तक वीटोळ रये। 22आरू जु कुई काहनी चीज क हाथ लागाड़े जेका पर ची बोठी होसे चा आपना छिंदरा धुवीन पाणी सी उंगळ्या करे, आरू सांतो तक वीटोळ रये। 23आरू कदाम खाटलो या दीसरो काहना चीज पर जेका पर ची बोठी होसे हाथ लागाड़नेन टेमे ओकान रुधिर लागाड़ होसे, ते सुनेहरो सांतो तक वीटोळ रये। 24आरू कदाम कुई मानुस उका सी प्रसंग करे, आरू ओकान रुधिर ओकाह लाग जाए, ते चु मानुस सात दाहडे तक अशुद्ध रये, आरू जेका जेका खाटला पर चु लुट्यु चा सब वीटोळ ठरसे।

25“ओळता कदाम काहनी बायरक आपना नावनीन टेम सी जादा दाहड़ा तक लुहूय वोहयतो रवे, या उका नेमला टेम सी जास्ती टेमे तक मासिकधर्म रवे, ते जव तक चो ओसी दशा मा रवे तव तक चो वीटोळ रये। 26उकान मासिक धर्म रवनेक सब दाहड़ा मा जेका जेका खाटला पर चो लुटे चा सब उकान मासिक धर्मान खाटलान समान ठरसे; आरू जेकी चीज पर चा बोठे चा भी उकान मासिक धर्म रयनेक दाहड़ान सारकी वीटोळ रये। 27आरू जु कुई उना चीजक हाथ लागाड़े चो वीटोळ ठरसे, एरकरता चो आपना छिंदरा क धुवीन पानी सी उंगळ्या करे, आरू सांतो तक वीटोळ रवे। 28पुन जव ची बायर आपना मासिक धर्म सी चुखी हुय जासे, तव सी चा सात दाहड़ा गिन ले, आरू उना दाहड़ाक जाने पर ची चुखी हुसे। 29पछा आठवे दाहड़े चा दुय हुली या पेरवान क दुय पीला लिन मिलापवाळा तम्बू क झोपला पर पुजारा जुळ जाय। 30तव याजक एक क पापबलि आरू दिसरान होमबलिक करता चढ़ाया; आरू याजक करता मासिक धर्मान वीटोळ हुयनेन कारण योहोवान सामने पछतावु करे।

31“ओका गत तुमु इसराएलियाक उनाक वीटोळ हुयने सी अलग मेक्या करे, का ओसो नी होए की चा योहोवाक निवास क जा उकान वीचमा छे अशुद्ध करीन आपनी वीटोळ हुयनेन कारण मर जाय।”

32जेकान प्रमेह होय आरू जा मानसे वीर्य स्खलित होयने सी वीटोळ रये; 33आरू जी बायर मासिक धर्म सी हय; आरू काय मानसे काय बायर अशुद्ध बायर सी प्रसंग सी करे, इना सभा क करता यी नियम छे।