Dhankavi Bible
यहोसु 15
यहुदाक गोत्राक आपलो गयो भाग
यहुदियाक गोत्राक भाग उनाक कुलोक अनसारे चीट्ठी न्हाखने सी एदोमक सीमा तक, आरु दोखेवरे क तरफ सीनक जंगल तक जी दक्षिण सीमा पर उबो रई छे। ओकान भागन दक्षिण सीमा खारला तालन ओका सिरेवाळा कोल सी सुरवात होई जी दोखेवरे तरफ वाढ़ती छे; आरु ची अक्रब्बीम नावन चढ़ाईक दक्षिण तरफ सी निकळीन सीन तरफ होता कादेशबर्नेक दोखेवरे क तरफ चढ़ गई, पछा हेस्रोनक जु होसे अद्दारक चढ़ीन करका तरफ फिर गई, चा रईन अम्मोन होता ची मिसरक नाला पर निकळी, आरु उका सीमान नास दरीयो होयो। तुमरी दोखेवरे वाळी सीमा यी होसे। पछी पुर्वी सीमा यरदनक मुहने तक खारा ताल ठरी, आरु उत्तर दिशाक सीमा यरदनज मुहानाक जु तालक कोल सी सुरवात करीन, बेथोग्लाक चढ़ता चढ़ता बेतराबाक उत्तरक तरफ होईन रुबेनी बोहन नावन दगड़ा तक चढ़ गई; आरु ची सीमा आकोर नावन तराई सी दबीरक तरफ चढ़ गई, आरु उत्तर होयता गिलगालक तरफ झुकली जी तराई दोखेवरे तरफली अदुम्मीमक चढ़ाईन सामने छे; चा सी चा एनशेमेश नावन सोता क जु पुगीन एनरोगेल पर निकळी; पछी ची सीमा हिन्नोमक पोर्याक तराई सी होईन यबुस (जो योरुसालेम कयाळतो छे) क दोखेवरे क तरफ सी चढ़ता चढ़ता ओका बोयड़ाल सिगा पर पुगी, जी पश्चीमक तरफ हिन्नोमक तरफ सामने आरु रपायीन तराईक उत्तरवाळा सिरा पर छे; पछी ची सीमा ओका बोयड़ाक सिगे रईन नेप्तोह नावन सोतेक जात रई, आरु एप्रोन बोयड़ाक नगर पर निकळी; पछा चा रईन बालाक (जो कीर्यत्यारीम भी कहवाये छे) पुगी; पछा चा बाला सी पश्चीमक तरफ फिरीन सेईर बोयड़ा तक पुगी आरु यारीम बोयड़ा (जो कसालोन भी कयाड़तो छे) ओकान उत्तरक तरफ सी होईन बेतशेमेशक उतरी गयी, आरु चा रईन तिम्ना पर निकळी; चा रईन ची सीमा एक्रोनक उत्तर तरफ जु होयता होयता शिक्करोन गयी, आरु बाला बोयड़ा पर होईन यब्नेल पर निकळी; आरु ओकी सीमान आखरी दरीयाक कीनार जोड़ी। आरु पश्चीमक सीमा महादरीयाक कीनार ठरी। यहुदियाक जु भाग उनाक कुलक अनसारे जोड़ी ओकान चार तरफन सीमा यी होई।
कालेबक हेब्रोन आरु दबीर पर वीजय
योपुन्नेक पोर्यो कालेबक योहोसु योहोवान हुकुमोन अनसारे यहुदियाक वीच माहयलो भाग आप्या, मतलब कीरयतरबा जो हेब्रोन भी कयाड़तो छे (चो अर्बा अनाक बास हतु)। आरु कालेब चा सी शेशै, अहीमन, आरु तल्मै नावन अनाक क तीनु पोर्याक निकाळ देदा। पचा चा रईन दबीरक निवासिया पर चढ़ गया; पुर्वकाल मा ते दबीरक नाव कीर्यत्सेपेर हतो। आरु कालेब कयो, “जो कीर्यत्सेपेरक मारीन लीले ओका सी हाव आपनी पोराय अकसाक इयाव कर दिस।” तव कालेबक भाई कनजीक पोर्यो ओत्नीएल ओका सी ली लेदु; आरु ओको ओका सी आपनी पोराय अकसाक इयाव कर देदो। जव ची ओका जु आवी, तव ओको उका बास सी थुड़ीक जमीन मागनेक उभार्यो, पछी ची आपना गदड़ा पर सी उतर पड़ी, आरु कालेब ओकाह पुछी, “तु काय चाहती छे?” ची बुली, “मखे सय बोरकोत आप; तु मखे दोखेवरे देश मा काहय जमीन ते आपी छे, मखे पाणी क सोते भी आप।” तव ओको उपरला सोते, नेवड़ा सोते, दुयु ओका आप्यो।
यहुदाक कुलन नगर
यहुदियाक गोत्राक भाग ते उनाक कुलक अनसारे यो छे।
यहुदियाक गोत्राक कीनारवाळा नगर दोखेवरे देश मा एदोमक सीमाक तरफ या छे, मतलब कबसेल, एदेर यागुर, कीना, दीमोना, अदादा, केदेश, हासोर, यित्नान, जीप, तेलेम, बालोत, हासोर्हदत्त, करिय्योथेस्रोन, (जो हासोर भी कयाड़तो छे), आरु अमाम, शमा, मोलादा, हसर्गद्दा, हेशमोन, बेत्पालेत, हसर्शआल, बिज्योत्या, बेरसेबा बाला, इय्यीम, एसेम, एलतोलद, कसील, होर्मा, सिकलग, मदमन्ना, सनसन्ना, लबाओत, शिल्हीम, ऐन, आरु रीम्मोन; या सब नगर उन्तीस छे, आरु ओका गाव भी छे।
नेड़ला देश मा या छे: मतलब एशताओल, सोरा, अशना, जानोह, एनगन्नीम, तप्पुह, एनाम, यर्मुत, अदुल्लाम, सोको, अजेका, शारैम, अदीतेम, गदेरा, आरु गदेरोतेम; या सब चोवदे नगर छे, आरु इनाक गाव मा भी छे।
पछा सनान, हदाशा, मिगदलगाद, दिलान, मिस्पे, योक्तेल, लाकीश, बोस्कत, एग्लोन, कब्बोन, लहमास, कीतलीश, गदेरोत, बेतदागोन, नामा, आरु मक्केदा; या सोलह नगर छे, आरु इनाक गाव भी छे। फिर लीब्ना, ऐतेर, आशान, यिप्ताह, अशाना, नसीब, कीला, अकजीब आरु मारेशा; या नोव नगर छे आरु इनाक गाव भी छे।
पछा नगर आरु गाव समेत एक्रोन, आरु एक्रोन सी लीन दरीया तक, आपना आपना गाव समेत जोतरा नगर अशदोदक तरफ छे।
पछा आपना आपना नगर आरु गाव समेत अशदोदो, आरु अज्जा, वरन् मिसरक नदी तक आरु महादरीयाक कीनारा तक जोतरा नगर छे। बोयड़ा वाळा देश मा या छे: मतलब शामीर, यत्तीर, सोको, दन्ना, कीर्यत्सन्ना (जो दबीर भी कहवाये छे), अनाब, एशतमो, आनीम, गोशेन, होलोन, आरु गीलो; या ग्यारा नगर छे। इनाक गाव भी छे। पछा अराब, दुमा, एशान, यानीम, बेत्तप्पुह, अपेका, हुमता, कीरयतरबा (जो हेब्रोन भी कहवाये छे, आरु सीओर); या नोव नगर छे, आरु इनाक गाव भी छे। पछा माओन, कर्मेल, जीप, युता, यिज्रेल, योकदाम, जानोह, केन, गिबा, आरु तिम्नाह; या दस नगर छे, आरु इनाक गाव वी छे।
पछो हलहुल, बेतसुर, गदोर, मरात, बेतनोत, आरु एलतकोन; या छव: नगर छे, आरु इनाक गाव भी छे।
पछा कीर्यतबाल (जो कीर्यत्यारीम भी कहवाये छे), आरु रब्बा; या दुय नगर छे, आरु इनाक गाव भी छे
जंगल मा या नगर छे: मतलब बेतराबा, मिद्दीन, सकाका; निबशान, लोनवाला नगर, आरु एनगदी, या छव: नगर छे, आरु इनाक गाव भी छे। 1
यरुश्लेमक निवासी यबुसियाक यहुदीन निकाळ सके; एरकरता आजुन दाहड़े तक यबुसी यहुदियाक संग योरुसालेम मा रयता छे।
Source notes (1)
- Cross-reference 1 इतिहास 11:4
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.