उत्पत्ति 12

अब्राम नु बुलाहट

1योहोवा अब्राम सी कयो, आपना देश, आरु तारा घोरल्याक, आरु तारा बाबा क घोर छुड़ीन उना देश मा चाल जो हांव तुखे देखाड़ीस। (प्रेरीत 7:2-3, इब्रानियो 11:8) 2आरु हांव तार सी एक मोटली जाती बोनावीस, आरु तुखे बोरकोत आपीस, आरु तारो नाव मोटो कोरीस, आरु तु बोरकोत क मुल रोहीस। 3जो तुखे बोरकोत आपे, तेनाक मे बोरकोत आपीस, आरु जु कुदु वेला पाड़से, तेनाक हांव शाप आपीस; आरु कोळी क आखा कुल तारे लारे बोरकोत पावसे (गलातीयो 3:8) 4योहोवा क इना बुलो क अनसारे अब्राम चाल्यो, आरु लुत वी ओका सात मा‍ चाल्यो; आरु जोत्यार अब्राम हारान देश सी निकोळ्यो तेन टेमे हुयो पचहत्तर साल क हुतो। 5ओस कोरीन अब्राम हेरी लाड़ी सारै, आरु हेरा भोतेरज्यास लुत क, आरु जो धोन हुयो एकठो कोर्‌यो हुतो, आरु ढुरे हुयो हारान मा जोड़्ला हुता, आखाक लीन कनान देश मा जाने क निकोळी गयो; आरु हुये कनान देश मा आय गुया। 6तेना देश क वीचो सी जाता होता अब्राम शकेम मा, चां मोरे क बांज झाड़ छे, पुग्या। तेन टेमे हिना देश मा कनानी मानुस रोहता हुता। 7ओळतेन योहोवा अब्राम क दर्शन आपिन कयो, “यो देश मे तारा ओवलीयाद क आपीस।” आरु हुयो चां योहोवा क लीय, जो हेनाक दर्शन आप्यो हुतो, एक वेदी बनायो। (गलातीयो 3:16, प्रेरीत 7:5) 8ओळतेन होयां सी ओगा बोड़ीन होया तेना बोयड़ा पोर आया, जु बेतेल क उगेवनो भीनी छे, आरु हिन्दरो तंबु हेना जागा मा उबो कीया जीना बुडेवनो भिनी बेतेल आरु उगेवनो भीनी ऐ छे। चां वी हुयो योहोवा क लीय एक वेदी बनायो आरु योहोवा सी वीनता करीयो। 9आरु अब्राम ओगु जाईन कनान दोखेवरे देश भीनी जात रोयो।

मिसर देश मा अब्राहम

10तेना देश मा काळ पोड़्यु: ओतरान कोरीन अब्राम मिसर देश मा जात रोयु की चां जाईन पोरदेशी बोनीन रोहे काहकी देश मा घोन जोबोर काळ पोड़लो हुतो। 11ओळतेन ओसो हुयो की मिसर क धोड़े पुगीन, हुयो हेरी लाड़ी सारै सी कयो, सोमोळ, मेखे मालुम‍ छे की तु घोन घाटावी बयोर छे; 12आरु जोत्यार मिसरी लोगहन तुखे देखसे ती कोवसे, यी हेरी लाड़ी छे, ओतरान कोरीने हीये मेखे मार नाखसे, बाखुन तार पोर जीती राख लेसे। 13ती: यो कोहजी, मे एरी बोहनीस छे, जीना सी तारे लारे मारो वी भलो होये, आरु मारु जीव तारे लारे वाचसे (उत्पत्ती 20:2, 26:7) 14ओळतेन ओसो हुयो की जोत्यार अब्राम मिसर मा आयो, ती मिसरी मानुस हेरी लाड़ीक देख्या की हीयी घोन घाटावी छे। 15आरु फिरोन क मुखी ओको देखीन फिरोन क सामने ओकी तारीफ कोर्या; ओतरान कोरीन हुयी बायर फिरोन क घोर मा पुगाड़ दिदा। 16आरु फिरोन हेरेन कोरीन अब्राम क भोलो हुयो; आरु ओको गाडरा बुकड़ा, गाय बुईल, दास दासीया, गदड़ा गोदड़ीया, आरु उटड़ा वी जोड़या। 17बाखुन योहोवा फिरोन आरु ओका घोराना पोर, अब्राम क लाड़ी सारै क कारण मोटी मोटी पिड़ा नाख्यु। 18ती फिरोन अब्राम क बुलावीन कयो, “तु मार साते काय कोर्यु? तु मेसे काहा नी कोयु की यी मारी लाड़ी छे? 19तु काहा कोयु की यी मारी बोहनीस छे? हांव हेनी काजे मारी लाड़ी बोनावने क लीय लेदु; बाखुन हीमी तारी लाड़ीक लीन यां गोथू जात रोव।” 20आरु फिरोन न आपसा मानषो क ओका वारा मा हुकुम आप्यु आरु हुये ओको आरु ओकी लाड़ी क, आखी धोनो भेव जी हेरी होती, मुकली देदा।