Dhankavi Bible
उत्पत्ति 11
बुली मा गड़बड़ी
आखी कोळी पोर एकुत भाषा आरु एकुत बुली होती। तेन टेम मानुस उगेवना भिनी जाता हुता शिनार देश मा एक खोयड़ु जोड़्यु चां वोस गोया। तोत्यार चे हियेत कोहने लग्या, “चालु, आपनु ईटड़ा बोना बोनईन वारु पाकाड़ता।” आरु चे दोगड़ान जागे ईटड़ा सी आरु चूना क जागा पोर धूळा क गारो सी काम लीदा। ओळतेन हिये कोया, “चालु, आपनु एक नगर आरु एक गुम्मट बोनावता, तेरी चोटी आकाश सी वात कोरे, ओसा कोरीन आपनु म्हारो नाळ कोरजे। ओसो नी होये की आपनु क आखी कोळी मा वेरवायनो पोड़ जाय।” जोत्यार मानुस नगर आरु गुम्मट बोनावने लग्या, ती हीनुक देखने योहोवा उतरीन आयु। आरु योहोवा कयो, “हांव काय देखो की आखा एकुत दल मा छे। आरु बुली वी इनु आखान एकुत छे, आरु हियो ओसो काम शुरु कर दिदा; आरु हिमी जो काय कोरनेन क यत्न कोरसे, एरेमा काय वी इनदरे वाटू वातड़ो नी होयसे। ओतरान कोरीन आवु, आपनु उतरीन इन्दरी बुली मा गोड़बोड़ी कोरता, तेरे सी एक दिसरा क बुली क पोल्ले नी पोड़ सोके।” ओस कोरीन योहोवा ओकी होंया सी आखी कोळी उपोर फैला दिदो: आरु हिये उना सोहोर क बनावनो छुड़ दिदा। ओस कोरीन हिना सोहोर क नाव बेबीलोन पोड़्यो; काहकी आखी कोळीक बुली मा जी गोड़बोड़ी छे, ची योहोवा हीयांत नाखलु छव, आरु हियांत सी योहोवा मानुसक आखी कोळी क उपोर फैलाय दीदो। शेम की ओवलीयाद छे। जळ–प्रलय क दुय साल क वाद जोत्यार शेम एक सोव साल क हुयो, ती हिना सी अर्पक्षद क जोन्मो हुयो; आरु अर्पक्षद क जोन्म क वाद मा शेम पांच सोव साल जीवत्लु रोयु; आरु ओकी आरु वी पुर्या पुरायटा पोयदा हुया। जोत्यार अर्पक्षद पोयतीस साल क हुयो, ती हिना सी शेलह क जोन्मो हुयो; आरु शेलह क जोन्म क कवाद मा अर्पक्षद चार सोव तीन साल आरु जीवत्लो रोयो, आरु ओकी आरु वी पुर्या पुरायटा पोयदा हुया। जोत्यार शेलह तीस साल क होयो, ती ओको द्वारा एबेर क जोन्मो होयो; आरु एबेर क जोन्म क वाद मा शेलह चार सोव तीन साल आरु जीवत्लो रोयो, आरु ओकी आरु वी पुर्या पुरायटा पोयदा हुया। जोत्यार एबेर चोवतीस साल क हुयो, ती ओको द्वारा पेलेग क जोन्म हुयो; आरु पेलेग क जोन्म क वाद मा एबेर चार सोव तीस साल आरु जीवत्लो रोयो, आरु ओकी आरु वी पुर्या पुरायटा पोयदा हुया। जोत्यार पेलेग तीस साल क हुयो, ती ओको द्वारा रु क जोन्मो हुयो; आरु रु क जोन्म क वाद मा पेलेग दो सोव नोव साल आरु जीवत्लो रोयो, आरु ओकी आरु वी पुर्या पुरायटा पोयदा हुया। जोत्यार रु बोत्तीस साल क हुयो, ती ओको द्वारा सरुग क जोन्मो हुयो; आरु सरुग क जोन्म क वाद मा रु दो सोव सात साल आरु जीवत्लो रोयो, आरु ओकी आरु वी पुर्या पुरायटा पोयदा हुया। जोत्यार सरुग तीस साल क हुयो, ती ओको द्वारा नाहोर क जोन्मो हुयो; आरु नाहोर क जोन्मो क वाद मा सरुग दो सोव साल आरु जीवत्लो रोयो, आरु ओकी आरु वी पुर्या पुरायटा पोयदा हुया। जोत्यार नाहोर उनतीस साल क हुयो ती ओको द्वारा तेरह क जोन्मो हुयो; आरु तेरह क जोन्म क वाद मा नाहोर एक सोव उन्नीस साल आरु जीवत्लो रोयो, आरु ओकी आरु वी पुर्या पुरायटा पोयदा हुया। जोत्यार लोगुन तेरह सोत्तोर साल क हुयो, ती लोगुन ओको द्वारा अब्राम आरु नाहोर आरु हारान पोयदा हुया।
तेरह की ओवलीयाद
तेरह क ओवलीयाद यी छे। तेरह अब्राम, नाहोर आरु हारान क जोन्मो हुयो; आरु हारान सी लुत क जोन्मो हुयो। हारान आपसा बाबा तेरह क सामनेत कसदियो क ऊर नावोन सोहोर मा, जो ओकी पोयदा होयनेन जागु होतु, मोर गोयु। अब्राम आरु नाहोर दुयु ईयाव कोर्या। अब्राम क लाड़ी क नाव सारै आरु नाहोर क लाड़ी क नाव मिल्का हुतो। यी हारान क बेटी होतली, जी मिल्का आरु यिस्का दुयो क बाबो हुतो। सारै ते वान्टी होती; ओकी ओवलीयाद नी होयी। तेरह आपसा पुर्य अब्राम, आरु आपसा पोता लुत, जौ हारानक पुर्य हुतो, आरु आपसी उहड़ीस सारै, जौ ओकी अब्राम क लाड़ी हुती, इनु आखा क लीन कसदियोम क ऊर सोहोर सी नीकोळीन कनान देश जाने कोरीन गोयु; बाखुन हारान नावोन देश मा पुगीन हीयांत रोहने लाग्यु। जोत्यार तेरह दो सोव पांच साल क हुयो; ती हुयो हारान देश मा मोर गोयो।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.