Dhankavi Bible
योहेजकेल 36
इसराएल पोर परमेश्वरोन बोरकोत
हे मानसोन ओवलीयाद, तु इसराएलोन बोयड़ा सी भोगवानो वोगे गोथी वात कोरीव कोव, हे इसराएलोन बोयड़ा योहोवान बुल सोमळु। परमेश्वर योहोवा ओसु कोवे: वेरी ते तुमरा वाराम कोवे, आहा! हेमी पेहलेन उचला बोयड़ा हेमी हामरा होकोम आय गोया।
ओस कोरीन भोगवानो वोगे गोथी वात कोरीन कोव, परमेश्वर योहोवा ओसु कोवे: मानसे जे तुमुक उजाड़ीया आरु च्यारु मेर गोथा तुमुक ओसा कुसनी देदा की तुमु वाचली देसोन होकोम होय जावु, आरु तुमरे वारा मानसे वात आरु कानटा मा खुसुखुसु कोरीया। ओस कोरीन, हे इसराएलोन बोयड़ा, परमेश्वर योहोवान बुल सोमळु, परमेश्वर योहोवा तुमरे सी कोवे; बोयड़ा आरु टेकड़ा सी आरु खुदरा आरु घाटी सी, आरु उजेड़ला ठारला आरु नाखला सोहोर सी, जे च्यरु मेरोन दिसरा देसोन लारे लुटाया आरु वायकेड़ान वात होय गोया।
परमेश्वर योहोवा ओसु कोवे: छाचीन हांव आपसी रीसोन आगठा मा वाचली जातीन आरु आखा एदोमोन वीरुद् मा कोवे की जे मारा देस काजे आपसा मोनोन खुस होया आरु वारु आपसा होकोम कोर लेदा की होयो पारको होयीन लुटाय गोयो।
ओस कोरीन की इसराएल देसोन वाराम हांव भोगवानो वोगे गोथी वात कोरीन बोयड़ा, टेकड़ा, खुदरा आरु घाटी सी कोव परमेश्वर योहोवा ओसु कोवे; देखु, तुमु जातीन वायकेड़ा वेठीया, कोरीन हांव आपसी रीसोन जोलोजोलाहोट सी कोवलु छे। परमेश्वर योहोवा ओसु कोवे: हांव यो वायदो कोरीयो की छाचीन तुमरे च्यारु मेरोन देस छे, हेनुक ओबरु आपसुत वेठनो पोड़से।
पुन इसराएलोन बोयड़ा, तुमरे पोर डाळ्या उगसे आरु हेंदरा फोव मार मानसो जुगु लागसे; काहाकी होये छाटा पोछा आवनीया छे। देखु हांव तुमरे पुठी छे। आरु तुमरे पोर गिनोन निंगा कोरीस, आरु तुमु जागाम खेती वाड़ी कोरसु; आरु हांव तुमरे पोर बेसका मानसे इसराएलोन आखा घोरानाक वोसाड़ीस; आरु सोहोर ओळी वोसाड़ीस आरु नास होयला जागा नोवला जागान तोसा बोनसे। हांव तुमुक बेसका मानसे आरु जोनवारे आपीस। होये वोदसे आरु हेंदरा बेसका पुर्या होयसे। हांव तुमरे पोर रोवने वाळा मानसोक तोसात तुमुक आपाड़ीस, जोसा तुमु पेहलो कोरला। हांव तुमुक तुमरा पेहला गोथु वारुस बोनावीस। तुमु ओळी कोदी हेनुक, हेंदरी ओवलीयाद सी छेटा नी होयसु। तोत्यार तुमु जानसु की हांव योहोवा छे। हाव, हांव आपसा मानसोक इसराएल काजे तुमरा जागा पोर चालाड़ीस। होये तुमरे पोर होक कोरसे आरु तुमु हेंदरा होयसु। तुमुक हेंदरा वीगुर पुर्यान ओळी कोदी नी बोनावो।
परमेश्वर योहोवा ओसु कोवे, जे मानसे तुमुक कोवे, तु मानसोक खानीया छे, आरु आपसा पोर बोसला मुलुक काजे छेटा कोर देये, कोरीन हेमी तु मानसोक नी खायीस, आरु नी आपसा पोर बोसला मुलुक काजे छेटु कोरीस, परमेश्वर योहोवान यो बुल छे। हांव देस दसोन मानसो सी तुसेक नी लाजवाड़ो। आरु तुसेक देस दसो भेनी ओळी वायकेड़ा नी सोमेळनो पोड़े, आरु तारे पोर बोसला देस तु ओळी नी ठोगे, परमेश्वर योहोवान यो बुल छे।
इसराएलोन नोवली जीवाय
ओळी योहोवान यो बुल मारेन्चा पुग्यो: हे मानसोन ओवलीयाद, जोत्यार इसराएलोन घोरानो आपसा देस मा रोवतो होतो, ती आपसी चालचालोन आरु कामोन लारे होये हेनाक वीटोळ कोरतो होतो; हेंदरी चालचालोन मेसे दुर होयने सी वीटोळ सी जानतेला। कोरीन जे होये देसोम मानसोक मार्या, आरु देसोन मुरतीयान लारे वीटोळ कोर्या, ऐरे लारे हेनु पोर आपसी रीस भोड़कायु। हांव हेनुक मुलुक मुलुक मा रीवन्या तीवन्या कोरीया, आरु होये देस देस मा खोव्वाय गोया; हेंदरा चालचालोन आरु कामोन ओनसारे हांव हेनु डोन आप्यो। पुन जोत्यार होये हेनु देसोम पुग्या जेनुम होये पुगाड़ला छे, तोत्यार होये मार चुखला नावोक वीटोळ कोवाड़्या, काहाकी मानसे हेरा वाराम ओसा कोवने लाग्या, ये योहोवान मानसे छे, पुन हेंदरा मुलुक सी निकावला छे। पुन हांव आपसा चुखला नावोक फोम राखीयो, जेनाक इसराएलोन घोरानो हेनु देसोन इचमा वीटोळ कोवाड़्यो, जां होये गोया।
ओस कोरीन तु इसराएलोन मुलुकोन घोराना सी कोव, परमेश्वर योहोवा ओसु कोवे: हे इसराएलोन घोराना, जां तुमु गोया चां मार नाव काजे वीटोळ कोरीया। एनाक रुकने जुगु हांव काहीन कोरनेम छे। हां यो तुमरे जुगु नी कोरीस। इसराएल, हांव एना आपसा चुखला नाव जुगु कोरीस। हांव आपसा मोटा नावोक चुखो कोवाड़ीस, जेनु देसोम वीटोळ कोरावला, जेनुम तुमु हेन्दरे इचमा वीटोळ कोरला; आरु जोत्यार हांव हेन्दरी निंगा मा तुमरे इचमा चुखलो कोवाड़ीस, तोत्यार होये देस जानसे की हांव योहोवा छे। परमेश्वर योहोवान यो बुल छे। हांव तुमुक हेना देस सी खोयड़े निकाळीस, एक जागे एकठा कोरीस आरु तुमुक तुमरा आपसा देस मा लावीस। तोत्यार हांव तुमरे पोर चुखलो पानी छाटिस आरु तुमु चुखा होयसु। हांव तुमरो आखो वीटोळ छे तीनाक धुवीस आरु हेनु घाड़ायीन देवोन मुरतीया सी पोयदा होयलो वीटोळ काजे धुवीस। हांव तुमुक नोवलो मोन आपीस, आरु तुमरे माहाय नोवलो जीव उबेजसे, आरु तुमरो डिलोम गोथो दोगड़ान काळजो निकाळीन तुमुक मासोन काळजो आपीस। हांव आपसो जीव तुमरे माहाय आपीन ओसो कोरीस की तुमु मार कायदा पोर चालसु आरु मारी पाळनीन ओनसारे कोरसु। तोत्यार तुमु तेना देसोम रोवसु जेनाक तुमरा डाहडाक आपलु। तुमु मार मानसे रोवसु आरु हांव तुमरो परमेश्वर रोवीस। हांव तुमुक वाचाड़ीस वी आरु तुमुक वीटोळ होयने सी रुकीस। हांव ओन काजे उगनेन हुकुम आपीस। हांव तुमरे वीरुद् काळोन टेम नी लावो। हांव झाड़ोन फोव आरु खेतोन मेर वोदाड़ीस, की जातीम काळोन टेम ओळी तुमुक ओसो नी लागसे। तोत्यार तुमु आपसा भुनला कामोक फोम कोरसु जे तुमु कोरला। तुमु फोम कोरसु की चे काम वारला नी होता। तोत्यार तुमु पाप आरु घाड़ायीन काम कोरला हेंदरे जुगु तुमु आपसा सी घाड़ाय कोरसु। परमेश्वर योहोवान यो बुल छे, तुमु जान लेवु की हांव तुमरे भोलाय जुगु ये काम नी कोर रोयु! हांव हेनुक आपसा वारला नावोन कोरता कोर रोयु। ऐ इसराएलोन घोरानो, तुमुक आपसा रोवनेन ढोंग पोर लाज आवनो जुवे आरु तुमरो मुय काळो होयनो जुवे।
परमेश्वर योहोवा ओसु कोवे: जोत्यार हांव तुमुक तुमरा आखा पाप सी चुखो कोरीस, तोत्यार तुमु सोहोर काजे वोसाड़सु; आरु तुमरा नास होयला सोहोर काजे ओळी बोनावसु। तुमरो देस जो आखा आवने जानेवाळा ओगोळ उजाड़ु छे, होये उजाड़ होयनेन बोदले जुपनो वेरनो होय जासे। मानसे कोवसे, यो देस जो उजाड़ होतो होयो ओदोनोन वाड़ी सारको होय गोयो, आरु जो सोहोर नास होय गोयलो आरु उजाड़ होय गोयलो आरु ढारलो होतो पुन हेमी होंया वारला छे आरु होंता मानसे रोवे। तोत्यार जे देस वावा तुमरे आड़े धोड़े वाचली रोवसे, होये जान लेसे की हांव योहोवात उदारलाक पोछी बोनायु, आरु उजाड़ी मा झाड़का लागाड़ीयु, हांव योहोवा ओसु कोयु, आरु ओसुत कोरीस।
परमेश्वर योहोवा ओसु कोवे: इसराएलोन घोरानो ओळी मारे सी वीनता कोरसे की हांव हेंदरे जुगु यो कोरो, हांव हेनु मा मानसोन गिनाय गाडरा-बुकड़ा सारकी वोदाड़ीस। जोसा चुखला टेमोन गाडरा-बुकड़ा, टाकला तिहवारोन टेमे योरुसालेम मा गाडरा-बुकड़ा निगिनाये ओसा होता तोसात जो सोहोर नास होय गोयला छे चे निगिनाये ओसा मानसोन टुळा सी भोराय जासे। तोत्यार होये जान लेसे की हांव योहोवा छे।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.